چونکە لە یاسای سروشتدا، لاواز پەماڵ دەکرێت. تێبینییەک بۆ سەرکردایەتیی بەڕێزی هەرێمی کوردستان سەرکردە بەڕێزەکانی هەرێمی کوردستان؛ بە ڕێز و پێزانینەوە، بە ئاگاداریتان دەگەیەنم کە زیاتر لە ٣٠ ساڵ بەسەر دامەزراندنی حکومەتی هەرێمی کوردستاندا تێپەڕیوە. لە ماوەی ئەم ساڵانەدا، هەرێم خاوەنی هێزی پێشمەرگە و هێزە ئەمنییەکان بووە و هەوڵی زۆر بۆ پاراستنی ئاسایش و سەقامگیریی کوردستان دراوە. بەڵام پرسیارێکی گرنگ لێرەدا هەیە: ئایا لە ماوەی ئەم سێ دەیەیەدا، بۆ دامەزراندنی پەیمانگایەکی تایبەت بە فێرکردنی فڕۆکەوانی سەربازی و پەروەردەکردنی ئەفسەرانی فڕۆکەوان، بە تایبەتی بە هاوکاریی وڵاتانی پێشکەوتوو و خاوەن تەکنەلۆژیای پێشکەوتووی ئاسمانی، پلانی جدی دانراوە و هەنگاوی کردەوەیی هەڵگیراوە؟ هیوادارم ئەم جۆرە پلانە هەبێت؛ بەڵام ئەگەر تا ئێستا هەنگاوی کاریگەر لەو بارەیەوە نەگیراوە، پێویستە ئەم بابەتە ببێتە یەکێک لە پێشینەکانی بەرنامە ستراتیژییەکانی هەرێم. ئەمڕۆ جیهان ڕووبەڕووی قەیران، ئاڵۆزیی سیاسی و هەڕەشەی ئەمنیی جۆراوجۆرە. دابینکردنی ئاسایش بۆ هاووڵاتیان و پاراستنی خاک و سنووری نیشتمان، پێویستی بە هێزی زەمینیی بەهێز، هێزی ئەمنیی کارا و بە تایبەتی توانای بەرگریی ئاسمانیی گونجاو لەگەڵ پێداویستییەکانی ئەمڕۆ هەیە. لەبەر ئەوە، پێشنیار دەکەم سەرکردایەتیی هەرێمی کوردستان بەبێ دواخستن، هەنگاوی جدی بۆ دامەزراندنی پەیمانگایەکی تایبەت بە پەروەردەکردنی ئەفسەرانی فڕۆکەوان بنێت و لەم پێناوەدا سوود لە هاوکارییە نێودەوڵەتییەکان و ستانداردە پێشکەوتووەکانی فێرکردن وەربگرێت. هەروەها داوا لە کچان و کوڕانی گەنجی کوردستان دەکەم کە خوێندنی ئامادەیییان تەواو کردووە، خۆیان بۆ بەشداری لە تاقیکردنەوەکانی وەرگرتن و خولی تایبەتی فڕۆکەوانی ئامادە بکەن و لە داهاتوودا ڕۆڵی خۆیان لە پاراستن و بەرگری لە ئاسمانی کوردستاندا بگێڕن. هێز، زانست و ئامادەباشی، سێ ستوونی سەرەکیی پاراستنی ئاسایش و سەربەخۆییی هەر نیشتمانێکن. کوردستان شایستەی داهاتوویەکی ئارام، بەهێز و پڕ لە زانست و تەکنەلۆژیای پێشکەوتووە.
شاعیر و نووسەر عەلی عەسکەر خەسرەوی گۆران
ستۆکهۆڵم – سوید