مقداد شاسواری
ماوەیەك بوو “بێوار”ی هاوڕێم دەربەدەرو، گەڕەكاوگەڕەك و، كۆڵان بە كۆڵان و، نووسینگە بە نووسینگە عەوداڵی خانوویەكی كرێ بوو، دەستی نەدەكەوت. وابێ كرێیەكەی بەراورد لەگەڵ مووچەكەی، گیرفاندڕ و كەمەرشكێن نەبێت. ژمارەی مۆبایلی خۆی لای هەموو نووسینگەیەكی خانووبەرە دانابوو. عەسرانێك نووسینگەیەك پەیوەندی پێوەكرد و پێی گۆتبوو خانوویەكی بۆ دۆزیوەتەوە كرێكەشی لەقەدەر مووچەو گیرفانی ئەوە و موناسیبە! پێی گوتبوو خێرا وەرە هەتا لە كیسمان نەچووە. هاوڕێكەم گۆتبووی لە كوێیە؟ كابرای عەقارات گۆتبووی لە گەڕەكی “المرایا”. هاوڕێكەم گۆتبووی ئەوە لە كوێیە؟ كابرا گۆتی ” پێشتر لای خۆمان ناوی “ئاوێنە” بوو ڕەحمەتت لێ بێ! وەلحاسڵ تەكلیفی لێم كرد و منیش لەگەڵی چووم بۆ سەیری خانووەكە. سەروبیچمی خانووەكەو كرێیەكەشمان پەسەند كرد. بەدڵمان بوو. بەڵام بێواری هاوڕێم زۆری ئەزیەت و ئازار چەشتبوو بەدەست دراوسێی بێزاركەر و خراپ و ئاوها، بەینی خۆشمان بێ لە كوردایەتییا نەرمە ڕەگێكی شۆڤینیەتیشی تێدابوو، بۆیە ڕووی لە كابرای دەڵاڵ و عەقاراتەكە كرد و گۆتی: ئەرێ دراوسێكانم كێن و چۆنن؟ كابرای دەڵاڵیش وەك ئەوەی مێش لەخۆی بكاتەوە گۆتی: شتێكی وا لە باشی و خراپییان نازانم، بەڵام دەزانم دراوسێی لاتەنیشتی چەپت هینن، تەسەور دەكەم خەڵكی لای ئەنبار و مەنبار بن!
هاوڕێیەكەم ئەژنۆیەكی نووشتایەوە و گۆتی: هاوار بە حاڵم.. ئەدی دراوسێی لاتەنیشتی ڕاستەم؟ كابرای دەڵاڵ هەندێ پشتەملی خۆی خوراند و گۆتی: لاتەنیشتی راستەت… ئا.. تەسەور دەكەم ئەویش هەر هینە.. خەڵكی لای حەویجەو مەویجەیە!
– هاوار بە ماڵم.. ئەدی ئەوەی بەرامبەرمان؟
– ئەویان دەڵێی.. ئا.. وەڵلا ئەویش هینە، تەسەوڕ دەكەم خەڵكی لای موسڵ و ماموسڵە!
– قوڕی دنیا بۆ سەر سەری من… ئەی ئەو ماڵەی پشتیان بە پشتمانەوەیە؟
– ئەویانیش… بەخوا.. ئا.. ئەویانیش تەسەور دەكەم خەڵكی لای فەلوجەو مەلوجەیە!
– ئەی ئەو دەرگا ڕەشەی سەری كۆڵان… ئەوان خەڵكی كوێن؟
– ئەو دەرگا ڕەشەی دەڵێی.. ئەها.. تەسەور دەكەم ئەوانیش هین بن… لە ئەهالی ئەو گوندە بن، تۆ بڵێ.. ئا.. تەلەعفەر و مەلەعفەر.
هاوڕێكەم بە نائومێدی، ئاهێكی ساردی هەڵكێشاو گۆتی” كەواتە بە ئەلەنتەریكی یابانی بگەڕێی، لەم گوزەرەیا ماڵە كوردێك نابینیتەوە؟
– تەسەور ناكەم هەبێ…
هاوڕێكەم تەواو قەدەمی شكاو بە كزۆڵی ڕووی لە من كرد و گۆتی: جا من لەم غەریبیە چۆن دەتوانم بژیم. پەندێكی كوردی هەیە دەڵێ من بوومەتە بێگانەو… هەر لێ گەڕێ. چی لەم خانووە بكەم… بە ئیسم و كەلامی خوا بێمە ئێرە هەناسەم لەبەر دەبڕێ و، كورە هەر دەمرم لەم غەریبیە!!
***
ڕۆژێك پاشتر، هاوڕێكەم شڕە خێوەتێكی لەو شێخەڵلایە كڕی و بۆخۆی چوو لە دەرێی ئاوایی لەسەر زەوییەكی زێدەڕۆ دایكوتاو! پێی گۆتم: هەتا خیوەت هەرزانە بڕۆ دانەیەكیش بۆخۆت بكڕە! ئەو بایە لەو كونەی بێ، پێویستت پێ دەبێ!!!