ئاری ئاغۆک
نــــــەرمە گــــــریان
بۆ مومتاز حەیدەری
ئەو نەرمە گریانە
لە خۆڕانیە
هەورێکی تاریکی پڕ کەسەر
هۆکارەکەیەتی
ئەو بێ دەنگیە، هەروا سانا نیە
لەو دیو دەرگاوە
هەزار و یەک ئاخ و داخی لێ دەخوێندرێتەوە
ئەو دۆش داماویە
بێ هۆ نیە
سەدەها پرسیاری دووربینی لێ بەدی دەکرێ
ئەو وەستانە بە گۆچانە
تابلۆیەکی سادە نیە
پڕە لە ڕەنگی نەبینراو و نەگوتراو
ئەو بەو تەمەنە سپییەوە
کەوتۆتە فیراقێکی ڕەش
نەدەستەکانی بۆ تەوقەی ئەو دەچێ
نە گفت و لفتی!
نەچاوانی بۆ دیداری و
نە پێکەنینی بۆ تاقانەیی!
ئەو لە دنیای کتێبستان دا
مەرەکەبی هەموو قەڵەمە ئەرشیفیەکانی کۆکردۆتەوە
تەنیا بۆ ئەوەی ناوی (کاروان) پێ بنووسێ
لێ ناتوانێ و ناتوانێ و ناتوانێ!
بۆیە
هەموو کتێبەکان حەزین و ماتەمدارن
بۆ مەرگێکی تاقانەو
کەسەری ئەبەدی کاروانی تەمەنی.