پەیامنێری هەولێر
پەکەکە، بەدرێژایی مێژووی خۆی بە هەزاران ڕۆڵەی كوردی فریوداوە و ڕەنج و خەباتی بەباداون، تا ئێستا یەك گوندی لە كوردستانی باكوور ڕزگار نەكردوە، بەڵام سەدان گوندی هەرێمی كوردستانی بەبارمتە گرتوە، حزبێكی توندڕۆی خزمەتكارنو گوێلەمستی داگیركەرانی كوردستانە، نەك هەر خاوەنی هیچ دەستکەوتێک نییە بۆ هیچ کوردێک، بەڵكو لە كوێ خەبات و جوولانەوەیەكی ڕەسەنی كوردایەتی هەبێت، پەكەكە هەوڵی تێكدان و دژایەتی دەدات. ئەو حزبە لە ژێر ناوی بەرخوداندا خەریکی بە بادانی بەری ڕەنجی سەدان ساڵەی تێکۆشانی کوردە لە هەموو بەشەکانی کوردستان؛
پەکەکە خەریکی چییە؟
پەکەکە بەدرێژایی دەیان ساڵی ڕابردوو، هیچ هێڵێكی سوور و سنوورێكی نەتەوەیی و نیشتمانی نەبووە و هەمیشە دۆستایەتی دوژمنانی كورد و دژایەتی هەرێمی كوردستان بنەمای سیاسەت _ ستراتیژیان بووە.
پەكەكە چالاکی و دەستکەوتی خۆیان ساڵانە لە ڕۆژێكدا دەكەنەوە لە ژێرناوی ساڵی ( سەرفرازی بەرخودان!) بێ ئەوەی جارێک لە خۆیان پرسی بێت؛ کامە خەبات و بەرخودان.؟ كام ئامانج و ئازادیخوازی؟ ئایە سەرانەوەرگرتن و بازرگانیكردن بە ماددە هۆشبەرەكان و جێبەجێكردنی ئەجێندای داگیركەران دژ بە خەڵكی هەرێمی كوردستان ئەمەیە بەرخودان؟!
چاودێرێکی سیاسی لەو بارەیەوە بە “هەولێر” دەڵێت؛ ئەگەر بۆ ئەوانە پرسیار لە ئێمە بکەن دەڵێین؛ وێرانکردنی پێنجسەد گوندی کوردستان، دەربەدەر بوونی هەزاران جووتیار و گوندنشینی کورد! كوردایەتییە؟ ئاخر هەر لە سایەی سیاسەتی چەوتی ئەوانیشەوە؛ سیاسەت و خەبات و زمانی کوردی لە باکوری کوردستان پێشناكەوێت، سەركردەكانی جولانەوەی كوردی باكوور و خەباتی مەدەنییان بەبنبەست دەگات و یان دەخرێنە كونجی زیندانەوە یان وڵاتبەدەر دەكرێن، یان قەیوم دەبێتە ئەنجامی كاروخەباتیان. لەڕاستیدا پەکەکە ئۆباڵی تێكدان و ئاژاوە خستنە ناو ڕیزەكانی كوردایەتی و یەکڕیزی کوردستانیانە نەك لەباكوور بەڵكو لە هەموو پارچەکانی کوردستان.
هەموو کوردێکی دڵسۆزە ونیشتمانپەروەر ئەو ڕەفتارەی پەكەكە لەسەر ناوبانگ و ستراتیژی هەرێمی كوردستان بە مەترسی، ئەو حزبە ڕاگەیاندنەكانی بەشێوەیەك لەدژی كوردستان و حكوومەتی هەرێم خستۆتەگەڕ هیچ دوژمن و داگیرگەرێك هێندە ڕقهەڵگرتوو نەبووە، ڕاگەیاندنی چەواشەی ئەو حزبە تەنیا دژی كوردستان لە كوێ هەواڵێك بابەتێك هەبێت بۆ لێدانی هەرێم سەردێری باس و هەواڵەكانێتی. بەفڕوفیشاڵی درۆیانە میدیاكانی بۆ فریودانی عەوام خۆی لەو هەموو دەستێوەردان و دژایەتییەی خەڵكی كوردستان نەبان دەكات، بازاڕی كوردستان دەسووتێنن، منداڵ و مێرمنداڵ دەڕفێنن، كەسایەتی و كادران تیرۆر دەكەن، ژێرخانی كوردستان دەخەنە مەترسییەوە، كارخانەكان دەسوتێنن، جاسوسی بەسەر دامودەزگاكانی حكوومەت كوردستان و حزبەكان دەكەن تا كردەوەی تیرۆریان لەدژ بكەن.
پەکەکە و هێزە چەکدارەکەی
ئەوەی سەرنجی دابێت، پەکەکە، هیچ جۆرە چالاکییەک و هیچ مەجالێکی لە سیاسەتدا نییە کاری تێدا بکات، هەر بۆیە هەموو هێزەکەی خۆی لە هێزە چەکدارەکەی نیشان دەدات و تەنیا کاریش فریودانی لاوان و مێرمنداڵانە بۆ نێو ئەو هێزە چەکدارییەی هەیەتی، ئەگەر پرسیاریش بکرێت بۆچی پەکەکە بەوە ناسراوە مێرمنداڵان دەڕفێنێت؟ وەڵامەکەی هەر دەمانباتەوە سەر ئەو بابەتە و پەکەکە ساڵانێکی زۆرە سیاسەتی داعشیانە بەدیوێكی دی پەرەپێدەدات،.
پەکەکە ئێستا تەواو گۆشەگیركراوەو تەنیا ئەو ڕێگایەی لەبەردەم ماوەتەوە منداڵان فریو بدات و بە نایاسایی منداڵانی خوار ١٨ ساڵی چەکدار بکات و بێ پەروا بەكوشتیان بدات و گۆڕغەریبیان بكات تەنیا لە پێناوی چەند سەركردەیەكی دابەستەی ناو تونێلە حەماس ئاساكانیان لە قەندیل!
چاودێرێکی سیاسیی لەبارەی هێزە چەکدارییەکەی پەکەکەوە نووسیویەتی؛ پەکەکە ئەو گەنجانە فریو دەدات و بۆبەرژەوەندیە حیزبیەکانیان بەکاریان دێنێت کە هێشتا لەڕووی هۆشیارییەوە پێ نەگەیشتوون.
پەکەکە و هەرێمی کوردستان
پەکەکە هەر زوو کەوتە ئیستیغلال کردنی هەڵوێستی برایانەی هەرێمی کوردستان لە داڵدەدان و پاراستنیان، دوای ئەوە چەندین جار ئاژاوەی پەکەکە ڕاستەوخۆ یەخەی هێزە کوردستانییەکانی هەرێمی کوردستان گرتووە و هەندێکجاریش بە ناڕاستەوخۆ، بەڵام لە هەردوو حاڵەتەکدا هەر هێزەکانی هەرێمی کوردستان هەستیان بە بەرپرسیارێتی کردووە و خۆیان لە شەڕی نابەجێی پەکەکە لاداوە، ئێستا کە چەندین پیلانی گرووپێکی تێکدەری ئاشکرا بووە و ئەنجوومەنی ئاسایشی هەرێمی کوردستان پاڵەوانانە مەترسییەکی گەورەی گرووپێکی تێکدەری پەکەکەیان لە هەرێمی کوردستان پوچەڵ کردەوە و بۆ ڕای گشتی ڕایان گەیاند، دیسان قەوانە شڕەی ڕاگەیاندنەکانی پەکەکە بەو پەڕی زەلیلی و بە زمانێکی چەواشەكارانە خەریکی ئەوەن پەرێزی پۆخڵی خۆیان نیشان بدەن. چاودێرێکی سیاسی، باس لەوە دەکات، مەترسییەکانی پەکەکە لەسەر هەرێمی کوردستان تا دێت گەورەتر دەبێت و پێویستە سنوورێكیان بۆ دابنرێت و بەیاسا قەدەغە بكرێن.
حزبێك لە ڕێی تێكدان و كردەوەی تیرۆریستی مامەلە لەگەڵ هەرێمی كوردستان بكات، دەبێ بە یاسای ڕوبەڕوبونەوەی تیرۆر بەرەنگاری ببیتەوە.
پێویستە، هەموو هێزە کوردستانییەکان هەڵوێستی یەکگرتوویان هەبێت لە پێناو پاراستنی ئارامی و سەقامگیریی هەرێمی کوردستان و دوورخستنەوەی ئەو هێزەنامۆیەی زیان بەبەرژەوەندییەكانی حكوومەت و خەڵكی كوردستان دەگەیەنێت.