دلڤین خەلەف
ئەگەر ئەم ژ نێزیک هایداری رۆلێ ئافرەتا کوردستانی بین د بوارێ ئاڤەدانیا جڤاکێ کوردەواری دە و بەرێ خۆ بدەینە چاوانیا دەربازبوونا ژیارا خەلکێ مەیێ سادە و ئەوان هەموو پێلیێن دژوار و ئەوان جۆرێن زەحمەتیا د ژیانا وی یا رۆژانە دا دهاتنە پێش و ئەوێ دەردەسەری و مالوێرانیا ل درێژیا مێژوویێ بسەردا هاتی، دیار دبێ کو ئافرەتێ ژی باجا وێ نەهامەتێ دایە و بوویە قوربانی، لێ سەرەرای وێ چەندێ ژی ئەوێ ب سەربلندی ئەرکێ خۆ وەکو پالدەرەکا سەرەکی د گێرانا سەرکەفتنا کۆمەلگەهێ دە جی بجیکریە و بێ دودلی بارێ بەرپرسیارەتیێ هەلگرتیە و هەولێن نەمانا زۆرداریێ لسەر جڤاکێ خۆیێ ئازا و مرۆڤدۆست دایە.
بزاڤ و بەرخۆدانا ئافرەتا کوردستانی پێخەمەت بەختەوەریا خێزانێ دناڤ کۆمەلگەهێ وێ دە وەکو شۆرەشەکا سەرکەڤتی د قادا بەرەڤانیێ دە ژ هەبوونا دیرۆکا مللەتی هەردەم جهێ شانازیا تەڤایا ئافرەتێن ئازا و خودان بیروباوەر یێن کوردستانێ بوویە، ژبەرکو ئارمانجا وێ یا سەرەکی هەبوونا ژیانەکا ئارام و ئاڤەدانیا کۆمەلگەهەکی شارستانی و سەرفەرازیا ئازاد لسەر بنەمایێن یەکسانیا جڤاکی د وەلاتەکی سەربخۆ دە بوویە و هەر لسەر ڤێ چەندێ ژی یا بەردەوامە و ژبۆ قوناغێن داهاتی یێن ژیانێ و پاشەرۆژەکا گەش و ڕۆهن ژی یا بەرهەڤە و خۆ ئامادەکریە.
هەر دیسا ئافرەتا کوردستانی وەکو دلسۆزەکا بێ رەکابەر د ئازادیا وەلاتی دە رۆلەکی بەرچاڤ و کاریگەر د هەموو شۆڕەش و بەرخۆدانێن گەلێ خۆ دە ب سەربلندی گێرایە و بخۆراگریەکا مەزن خۆ لبەر زەحمەتیا هێرش و کاودانێن بسەر جڤاکێ وێ دە هاتین گرتیە و ژبۆ دەردەسەریێ و بندەستیا دوژمنی خۆ نەچەماندیە و دەرفەت نەدایە رەوشا جڤاکێ وێ بکەڤتە ژێر گەفێن دژواریا بارێ ژیانێ و هەردەم بهێز بەرگری ژ مافێ گەلێ خۆ کریە.
پیرۆزە خۆراگریا ئافرەتا کوردستانی و رۆلێ وێ یێ کاریگەر د هەموو بوارێن ژیانێ دە و جهێ رێزێیە ئەو زەحمەتیا دەربازکری پێخەمەت ئاڤەدانیا جڤاکەکی خۆ یێ سەرکەڤتی و جهێ شانازیێ بەرگریا وێ بەرامبەر ئەوێ شەپرزەیی و دەردەسەریا بسەردا هاتی ل درێژیا دیرۆکێ هەتا کو ئەڤرۆ خۆ دناڤا کۆمەلگەهێ خۆ دا سەربەست و سەرفەراز دیتی و ژبۆ نەڤیێن داهاتی بوویە پێشەنگ و سەربۆرەکا شارستانی یا مفادار، سەرکەڤتن بۆ ئافرەتا کوردستانی یا دلسۆز و ژێهاتی و خودان بیروباوەریێن موکم د گێرانا رۆلێ ئاڤەدانیا جڤاکەکی ساخلەم و وەلاتەکی ئازاد و پێشکەفتی دە.
*ئەنداما سکرتاریەتا ئێکەتیا ئافرەتێن کوردستانێ