مەشخەڵ كەوڵۆسی
زۆر شۆك نەبووم كاتێ بینیم، درۆی پەیچێك یان چەند پەیچێكی بێ دایك و باوك و ئەوەی پێ دەگوترێت علوج، توانی سەرلەبەری كورد بخاتە پاقلەكەوە.. بەڵام زۆر سەرسام بووم بەوەی كورد لەئاستی باڵای حكومییەوە بەبێ هیچ خۆماندوو كردنێك لەسەر سادەترین بابەت بێتە سەر هێڵ و، وەك پێدراوێكی فەرمی مامەڵە لەگەڵ درۆیەكدا بكات كە پەیچكەكان دروستیان كردبوو.
مەسەلەی شەریفەكەو ڕۆستەمە بێوەژنەكە، چی بوو؟ بۆ هەمووانی بەخۆیەوە سەرقاڵكرد؟ بۆچی لایەنی كوردی لەئاستێكی بەرزەوە وەڵامی دایەوە؟ ئەو فاوڵە چی بوو؟.
لەو كاتەوە مرۆڤ جەنگی ناسیوە، تاكو ئێستا، شەڕ بەبێ شەڕی دەرونی نەبووە و نابێت. كۆنترین تیۆرەكانی”سەنتزووی چینی” بۆ جەنگ، باسكردنە لەجەنگی دەرونی. جەنگی دەرونی ئامانجێكی سەرەكی ئەوەیە كەلەناخەوە بەرانبەر بڕوخێنیت. بڕستی لێ ببڕیت و، وای لێ بكەیت، ئەوە بكات كە تۆ دەتەوێت.
شەڕی دەرونی ئەوەندەی زەمینەسازییەكەی قورسە، نیو ئەوەندە خودی جەنگەكە قورس نیە. چونكە: تۆ كاتێ بڕیار دەدەیت لە بەرانبەرەكەت بدەیت و بەتەواوی سفری بكەیتەوە، پێشتر زەمینەسازیت كردووە، بۆنمونە: بۆ ئەوەی كورد ببێتە نێچیری ئەو جەنگە و بەتەواوی پەڕوباڵی بكەن، پێشەكی گوشارێكی ئابووری و دارایی وا گەورەیان لەسەر داناوە، كە بەپاڵێكی بچوك بكەوێت و، بڕوا بەهەموو شتێك بكات، تەنانەت بڕوا بەدرۆی پەیچێكی بێ دایك و باوكیش بكات و، بیكاتە بابەتێكی گرنگ و بینای لەسەر بكات.
چۆن بێ ئەوەی لێدوانێكی فەرمی، بەڵگەنامەیەك، نوسراوێكی فەرمی هەبێت لەبەغداوە لەسەر ئەو بابەتە، چۆن بینای لەسەركرا؟ بۆ سێرچێكتان نەكرد و، ئەوەندە بەدواداچوونتان نەبوو لەقاڵبی خۆی مامەڵەی لەگەڵدا بكەن؟ نەك بیكەنە ماڵ بەسەر هەڵوێستی سیاسییەوە؟
جێگەی سەرسامییە، لەلایەكەوە لەگەورەترین كێشە و ئاڵنگاری وجودیدا بیت، بەڵام قەت خەیاڵت بۆ ئەوە نەچێت كە زۆرینەی ئەوەی لەسەر تۆ، لەبارەی تۆوە دەگوترێن، شەڕی دەرونین، چونكە لەبنەڕەتدا تۆ لەنێو شەڕدایت؟ چۆن یەكسەر بڕواتان كرد بەوەی تەیف سامی، باسی شەریف و ڕۆستەمی كردووە؟.
بێگومان ئێستا لەبەغدا، دیراسەی كورد و ئەو كاردانەوانە دەكرێت كەبەرانبەر بڕیارەكانی بەغدا پیشانی دەدات. ئەوان لەو ڕێگەیەوە دەزانن كە ئێمەی كورد چەندە سادەو بێ ساویلكەین و، چۆن هەموو شتێك بەسەرماندا تێدەپەڕێت و، تەنها پەیچێك بەسە بۆ ئەوەی هەموومان بخاتە پاقلەكەوە!.
دەبوو بەرلەهەر لێدوانێك لەسەر ڕۆستەم و شەریفەكە، ڕاستەوخۆ بۆ بنەوانی شەڕە دەرونییەكە بگەڕاینایەتەوە، بەڵام بەهەرحاڵ ئەوەی چوو، ناگەڕێتەوە. گرنگ ئەوەیە لەهەر خەسارێك ئەقڵێك وەرگرین!.
هەقە دوای ئەو مەسەلەیە، حكومەتی هەرێم، پەلە بكات لەدروستكردنی خانەیەكی جەنگی دەرونی. چونكە جەنگی دەرونی بەشێكە لە پێكهاتەكانی بڕیار و بەرگری و هێرش.
خانەیەك بۆ پلاندانان بۆ جەنگی دەرونی و وەڵامدانەوەی پڕوپاگەندە و دروستكردنی مادەی پێویست بۆ مامەڵەی میدیایی و جەماوەری. تاكو بۆ تەنها جارێكیش ئێمە بتوانین وەك هێزێكی دەوڵەتی ڕەفتار بكەین و، ئەمجارەش ئێمە بتوانین بەرانبەرەكانمان بەرین بۆ ناو پاقلەكە. بەتایبەتی ئێستا ئیتر كوردستان دەچێتە وەرزی بەهارەوە و سەوزەڵانی زۆر دەبێت و، پێویستە زوو زوو نەیارەكانی قەوارەی كوردستان بەرین بۆ ناو كەوەر.