بەڕێوەبەری شوێنەواری هەرێمی کوردستان رایگەیاند، نزیکەی 100 پارچە شوێنەوار لە کۆیە لەلایەن کونسوڵخانەی ئەڵمانیا لە هەرێمی کوردستان چاکدەکرێنەوە.
ئەمڕۆ چوارشەممە، 27ـی کانوونی یەکەمی2023، کەیفی عەلی، بەڕێوەبەری شوێنەواری هەرێمی کوردستان، گوتی: لە رابردوودا نزیکەی 100 پارچە شوێنەوار لە شارۆچکەی کۆیە دۆزرانەوە لەناو شوێنەواری کۆیە دانراون و پێویستییان بە پاککردنەوە و چاککردنەوە هەیە، لەگەڵ دیاریکردنی سەردەمەکانیان هەیە”.
گوتیشی: “شوێنەوارەکان بۆ چاککردنەوەیان پێویستیان بە بودجەیە، لەلایەن کونسوڵخانەی ئەڵمانیا لە هەرێمی کوردستان بودجەی بۆ دابینکراوە بە هاوبەشی لەنێوان فەرمانگەی شوێنەواری کۆیە و شوێنەواری عێراقی لە هەولێر چاکدەکرێنەوە و ئەم پڕۆسەیە ماوەی مانگێک دەخایەنێت”.
بە گوتەی بەڕێوەبەری شوێنەواری هەرێم، کەلوپەلە مێژووییەکان پێکهاتوون لە کوپە، پەیکەر، سکە، پارە، گۆزە، چەقۆ، کەرەستەی جوانکاری، کە لە ساڵانی پێشوودا دۆزراونەتەوە.