سێ دادوەری دادگەی پێداچوونەوەی هەرێمی کوردستان لەبەردەم سەرۆکی هەرێمی کوردستاندا سوێندی یاساییان خوارد و دەستبەکار دەبن.
ئه‌مڕۆ يه‌كشه‌ممه 24-12-2023 له رێوڕه‌سمێكدا له‌به‌رده‌م نێچيرڤان بارزانى، سه‌رۆكى هه‌رێمى كوردستان و پاش ئه‌وه‌ى فه‌رمانى هه‌رێمييان بۆ ده‌رچوو، هه‌ريه‌ك له دادوه‌ر جاسم جه‌زا جافر، دادوه‌ر جاسم محه‌مه‌د مسته‌فا و دادوه‌ر تاهیر عه‌لى حه‌سه‌ن بۆ ئه‌ندامێتيى دادگەى پێداچوونه‌وه‌ى هه‌رێمى كوردستان، سوێندى ياساييان خوارد و ده‌ستبه‌كار ده‌بن.
بەپێی سەرۆکایەتیی هەرێمی کوردستان، له رێوڕه‌سمه‌كه‌دا كه سه‌رۆكى ئه‌نجوومه‌نى دادوه‌رى و جێگرانى و سه‌رۆكى داواكارى گشتى ئاماده بوون، دواى سوێندخواردن، له ديدارێكدا نێچيرڤان بارزانى وێڕاى پيرۆزبايى و هيواى سه‌ركه‌وتن بۆ دادوه‌ران، جه‌ختى له پارێزگارى و پشتيوانيى ته‌واوى خۆى بۆ سه‌ربه‌خۆيى ده‌سه‌ڵاتى دادوه‌رى و دادگەكان كرده‌وه، به شێوه‌يه‌ك كه ببێته مايه‌ى جێبه‌جێبوونى دادوه‌رى، هه‌روه‌ها جێى دڵنيايى و متمانه‌ى هاووڵاتيیان.
له چوارچێوه‌ى بايه‌خدان به دامه‌زراوه‌ى دادوه‌ريدا و بۆ پڕكردنه‌وه‌ى پێداويستييه‌كانى ده‌سه‌ڵاتى دادوه‌رى، پاڵپشت به بڕگه‌ى 16یەم له ماده‌ى ده‌يه‌مى ياساى سه‌رۆكايه‌تيى هه‌رێمى كوردستان ـ عێراق، ژماره 1ى ساڵى 2005ى هه‌مواركراو و له‌به‌ر رۆشنايى داواكاريى ئه‌نجوومه‌نى دادوه‌ريى هه‌رێمى كوردستان، نێچيرڤان بارزانى فه‌رمانى هه‌رێمیى بۆ دامه‌زراندنى ئه‌و سێ دادوه‌ره بۆ دادگەى پێداچوونه‌وه‌ى هه‌رێمى كوردستان واژۆ كردووه.