شەوی چوارشەممە 2023/10/4 نێچیرڤان بارزانی، سەرۆكی هەرێمی كوردستان، پێشوازی لە پاتریك دورێل ڕاوێژكاری سەرۆكی فەرەنسا بۆ كاروباری ڕۆژهەڵاتی ناوەڕاست و باكووری ئافریكا كرد.
لە دیدارێكدا دەربارەی بەرنامەی سەردانی چاوەڕوانكراوی ئیمانوئێل ماكرۆن سەرۆكی فەرەنسا بۆ عێراق، پەیوەندییەكانی فەرەنسا لەگەڵ عێراق و هەرێمی كوردستان و دۆخی ناوخۆی هەرێمی كوردستان، بیروڕایان گۆڕییەوە.
هەردوولا جەختیان لە گرنگیی پەیوەندییەكانی فەرەنسا لەگەڵ عێراق و هەرێمی كوردستان كردەوە و ئاماژەیان بە ڕۆڵ و بەشداریی كارای فەرەنسا لە هاوپەیمانیی نێودەوڵەتیی دژی داعشدا كرد، هەروەها لەسەر بایەخ و پێویستیی پشتگیریی فەرەنسا لە عێراق لەم قۆناغەدا، هاوڕا بوون.
دەربارەی دۆخی ناوخۆی هەرێمی كوردستانیش، هەردوولا داكۆكییان لە گرنگیی تەبایی و یەكڕیزیی لایەنە سیاسییەكان لە هەرێمی كوردستان و یەكدەنگی و یەكهەڵوێستییان لە بەغدا كردەوە، هەروەها باسیان لە پەیوەندییەكانی هەولێر ـ بەغدا و گفتوگۆی چارەسەركردنی كێشەكانیان كرد.
نێچیرڤان بارزانی سوپاس و پێزانینی بۆ ڕۆڵی سەرۆك ماكرۆن و پشتگیریی فەرەنسا لە عێراق و هەرێمی كوردستان دەربڕی، دەربارەی كێشەكانیش لەگەڵ بەغدا دووپاتی كردەوە كە هەرێمی كوردستان بەپێی دەستوور و سیستمی فیدراڵی، هەمیشە ئامادەی چارەسەرییە.
دۆخی ئاوارە و پەنابەران و پێكهاتەكان لە هەرێمی كوردستان، پەیوەندییەكانی عێراق و هەرێمی كوردستان لەگەڵ وڵاتانی دراوسێ و ناوچەكە، دوایین پێشهاتەكانی شەڕی دژی داعش لە عێراق و سووریا، دۆخی ناوچەكە بەگشتی و چەند پرسێكی دیكەی جێی بایەخی هاوبەش، تەوەرێكی دیكەی دیدارەكە بوو.
نێچیرڤان بارزانی پێشوازی لە بەرپرسێكی ئەلیزێ كرد
