ئاریان دەرگەڵەیی – هەولێر
تیمی شاخەوانانی كوردستان، ئاڵای پیرۆزی كوردستان لە كامپی”میتۆ”ی چیای”كازبێك” لە وڵاتی جۆرجیا ھەڵکرد.
كامپی میتۆ تاكە كامپە كە لە بەرزایی ٣٦٠٠ مەتری چیای كازبێك دروست كراوە و زۆرێك لە شاخەوانان بۆ حەوانەوە و مانەوە كەڵكی لێ وەردەگرن.
بە پێی ڕاگەیێنراوێكی فیدراسیۆنی شاخەوانیی كوردستان دوای ئەوەی لەلایەن د. ئەنوەر عەلی محەمەد، سەرۆكی فیدراسیۆن و سەرپەرشتیاری گەشتی چیای كازبێك ڕوخسەت لە بەڕێوەبەری كامپەكە وەرگیرا، ئاڵای پیرۆزی كوردستانیش بە دیواری دیوی ناوەوەی كامپەكەوە ھەڵکرا.
ئاڵای كوردستان لە ئێوارەی ١٦ی ئەیوولی ٢٠٢٣ كاتێك تیمی شاخەوانانی كوردستان لە لوتكە چیای كازبێكەوە دەگەڕانەوە، لەناو خۆشی و شادی ئەو سەركەوتنە گەورەیەدا ئاڵای كوردستانیان لە كامپی میتۆ ھەڵکرد.
شایانی وتنە پێشتریش شاخەوانانی دیكەی جیهان ئاڵای وڵاتەكانیان بەو دیوارەوە ھەڵواسیوە.