بەكر كەریم حەسەن*
نووسەر و ڕۆژنامەنووسی ئەمریكی (نورمان كازنس) دەڵێ “جوانترین و ناوازەترین ئەندازەوانی لە جیهاندا، بریتییە لە دروستكردنی پردی هیوا بەسەر ڕووباری نائومێدیەوە”.
بێگومان مرۆڤ ئەو بوونەوەرەیە بەردەوام لە هەڵكشان و داکشان و هەوارز و نشێودایە لە ژیان و بەردەوامیش پێویستی بە پەرەپێدان و گەشەپێدانی خۆیەتی. پەرەپێدانی خۆت گەورەترە لە پەرەپێدانی ئەرك و بەرپرسیاریەتی، چونكە هەر ئەرک و بەرپرسیاریەتییەک ماوەیەكی دیاریکراوە و لە شوێنێكی دیاریكراودا، بەڵام كەسەكە خۆی بە درێژایی ژیانی لە شوێنێكی جیاوازدا دەردەكەوێت، بۆیە پەرەپێدانی خۆت لە ئەركە هەرە گرنگ و پێویستەكانە بۆ پەرەپێدانی كارامەیی بە گشتی و هەوڵدان بۆ بەدەستهێنانی شارەزایی و ئەزموونی زیاتر و بەردەوام؛ هەركەسێ بیەوێ پەرە بە خۆی بدات، دەبێ سەرەتا خۆی و خاڵی لاواز و بەهێزی خۆی بناسێ و، خاڵە لاوازەکانی کەم بکاتەوە و ئامانجەكانی دیاری بكات و بزانێ بۆچی تێدەكۆشێ و هۆكار و ئامرازەكانی بۆ دەستەبەر بكات، پلانی پەرەپێدانی بۆ دابڕێژێ و بەردەوام ڕاهێنان بكات و خۆی فێر بكات، چونكە فێربوون پرۆسەیەكی بەردەوام و پێویستە بۆ هەموو كەسێك گەر بیەوێ گەشە بە توانستەكانی خۆی بدات و بەردەوام هەوڵی فێربوون بدات بە ڕێگای جۆراوجۆر پەرەیان پێ بدات و نەوەستێ لە هیچ بەربەست و كۆسپ و تەگەرەیەكدا؛ هچ شتێ وەكو فێربوونی بەردەوام دڵ و دەروون و ویژدان ئارام و ئاسوودە ناكات. چونكە فێربوونی زیاتر هەمیشە بەرهەم و ئەنجامی زیاتری دەبێت و تێگەیشتن فراوانتر دەبێت، هەركەسێ پەرە بە خۆی بدات بەردەوام وزە و دڵسۆزی و بەخشینی زیاتر دەبێت هەم لە كارەكەی هەم لە ژیانی ئاسایی و ڕۆژانەیدا، بۆیە گرنگە بەردەوام دیدگای ڕوون و بیركردنەوەی ئەرێنی و پلانی دانراو و پابەندبوونی تەواو و تێپەڕاندنی بەربەستەكان و هەڵسوكەوت لەگەڵ كەسە سەركەتووەكان و دووركەوتنەوە لە كەسانی نەرێنی و زیانبەخش و پشوودرێژی و خۆبەراوردنەكردن لەگەڵ كەسانی تر و نەگەڕانەوە و بیرنەكردنەوە لە ڕابردوو، تێڕوانینی ئەرێنی بۆ پاشەڕۆژ و ڕاشكاوی لەگەڵ خۆمان و هەوڵدان و تێكۆشانی بەردەوام و هاوكاری و بەخشینی و یارمەتیدانی كەسانی پێویست بكەینە خاڵی سەرمەشقی ڕۆژانەمان؛ بیر بكەینەوە كەوا تەنها خۆمانین دەتوانین ببینە كلیلی بنەڕەتی و سەرەكی بۆ پاشەڕۆژێكی باشتر، بۆیە دەبێ گۆڕانكاری بەرەو باشتر و چاكتر بەردەوام لە خۆمان بكەین، فێر ببین كەوا دەبێ كاری ورد و زیاتر لەسەر خۆمان بكەین زۆر زیاتر لە كاركردن لە كار و ئەركەكانمان؛ چونكە گەر خۆمان بەرەوپێشەوە برد بە دڵنیاییەوە ئەرک و كارەكانیشمان بەرەوپێشەوە دەچن، تاكە ڕێگا بۆ باشتركردن و چاككردنی كاروبارەكان لەگەڵ خۆمان دەبێ خۆمان باش و چاك بكەین، چونكە لەوەتەی مرۆڤ و ژیان هەیە لە سەرەتای مێژووەوە ڕۆژ و شەو هەیە؛ دوای ڕۆژئاوابوون تاریكی دێت و دەبێتە شەو بۆ هەموو كەس، هەروەها لە گۆڕانكاری وەرزەكان هەمیشە زستان لە دوای پاییز دێت، هیچ ناگۆڕێ هەندێ جار كاروبارەكان باش دەبن هەندێك جار نا، بەڵام لە هەموو گۆڕانكارییەكی جۆراوجۆر كە ڕوو دەدات گرنگی لەوەدا نییە چی ڕوو دەدات، گرنگی لەوەدایە ئێمەی چی دەكەین لە كاتی هەر ڕوودان و گۆڕانكارییەكی كەشوهەوا، یان سووڕانەوەی زەوی بە دەوری خۆی و هەسارەكانی تردا، خەڵك چی دەكەن بۆ هەموومان وەكو یەكە، بەڵام گرنگی لەوەدایە بیر لەوە نەكەینەوە چی ڕوو دەدات ڕووداوەكان دووبارەن، بەڵكو بیر بكەینەوە لەوەی كە دەبێ چی بكەین، بەردەوام پەرە بە خۆمان بدەین و گۆڕانكاری لە خۆمان بەدی بكەین بەرەو باشتر و چاكتر ئەوەش پەرەپێدان و گەشەپێدانە لە خۆمان بەرەو فێربوونی زیاتر، بۆیە گەر بمانەوێ مەلە بزانین دەبێ خۆمان فڕێ بدەینە ناو ئاو هەروەكو شاعیر و نیگاركێشی ئینگلیزی (ولیام بلەیک) دەڵێ “دەگەڕێمەوە سەرەتای خاڵی وەرچەرخان و حاشاهەڵنەگر كە دەڵێ كلیلی سەرەكی و
بنەڕەتی بۆ پاشەڕۆژێكی باشتر تەنها خۆتی.