نێچیرڤان بارزانی سەرۆکی هەرێمی کوردستان لە باکۆی پایتەختی ئازەربایجان لەگەڵ ئیلهام عه‌لیێف سه‌رۆکی ئەو وڵاتە کۆبووەوە.
ئەمڕۆ سێشەممە 18/7/2023، نێچیرڤان بارزانی سەرۆکی هەرێمی کوردستان بە سەردانێکی فەرمی گەیشتە ئازەربایجان، لەو سەردانەیدا سەرۆکی هەرێم لەگەڵ ئیلهام عه‌لیێف سه‌رۆکی ئازەربایجان کۆبوونەوە و په‌یوه‌ندییه‌کانی ئازه‌ربایجان له‌گه‌ڵ عێراق و هه‌رێمی کوردستان و بره‌ودان به هاریکاریی هاوبه‌ش له بواره جیاجیاکان تاوتوێکرد.
سەردانی نێچیرڤان بارزانی بۆ باکۆ دوای ئەوە دێت، لە مانگی شوباتی ئەمساڵدا، لە پەراوێزی کۆنفرانسی میونشن لە ئەڵمانیا سەرۆکی هەرێمی کوردستان و سەرۆککۆماری ئازەربایجان کۆبوونەوە و دەربارەی پەرەپێدانی پەیوەندییەکان و فراوانکردنی ئاڵوگۆڕە بازرگانییەکانی نێوان هەولێر و باکۆ هەروەها کردنەوەی کونسوڵخانەی ئازەربایجان لە هەرێمی کوردستان گفتوگۆیان لەبارەوە کرد.