پێشنیوەڕۆی ئەمڕۆ چوارشەممە 21/6/2023 نێچیرڤان بارزانی، سەرۆكی هەرێمی كوردستان، پێشوازی لە هانس سادنی، باڵیۆزی هۆڵەندا لە عێراق كرد.
لە كۆبوونەوەیەكدا پتەوكردنی پەیوەندییەكانی عێراق و هەرێمی كوردستان لەگەڵ هۆڵەندا، دوایین پێشهات و دۆخی ناوخۆی هەرێمی كوردستان و عێراق و ناوچەكە بە گشتی و دۆخی ئاوارەكان لە كەمپەكانی هەرێمی كوردستان، خرانە بەر باس و گفتوگۆ.
نێچیرڤان بارزانی وێڕای پیرۆزبایی بۆ دەستبەكاربوونی، هیوای سەركەوتنی بۆ خواست و پشتگیریی هەرێمی كوردستانی بۆ كار و چالاكییەكانی نیشان دا، هەروەها سوپاسی هاوكارییەكانی هۆڵەندای بۆ عێراق و هەرێمی كوردستان كرد بەتایبەتی لە بواری هەمەچەشنكردنی سەرچاوەكانی ئابووری و پێشخستنی كەرتی كشتوكاڵدا.
لای خۆیەوە باڵیۆزی هۆڵەندا، وێڕای دەربڕینی خواستی وڵاتەكەی بۆ پتەوكردنی زیاتری پەیوەندییەكانی لەگەڵ عێراق و هەرێمی كوردستان، بەردەوامیی هاوكارییەكانی بۆ سەقامگیریی عێراق و هەرێمی كوردستان دووپات كردەوە و هاوكارییەكانی هەرێمی كوردستانی بۆ ئاوارە و پەنابەران بەرز نرخاند.
تاوتوێكردنی دۆخی مافی مرۆڤ، كاری ڕێكخراوە ناحكوومییەكان لە عێراق و هەرێمی كوردستان و چەند بابەتێكی دیكەی جێی بایەخی هاوبەش، لایەنێكی دیكەی كۆبوونەوەكە بوو كە بەڕێز كونسولی گشتیی هۆڵەندا لە هەرێمی كوردستان ئامادەی بوو.
سەرۆكی هەرێمی كوردستان پێشوازی لە باڵیۆزی هۆڵەندا كرد
