قەهار شێخانی
ماوەیەك بوو تۆ رووناكیت
دەبەخشی بەژیانم
بۆ لەخۆڕا تاریكت كرد
بەردیدەم، نووری چاوانم !
***
دە وەرەوە وەكو جاران
دەست لەملم بئاڵێنە
وەرە ڕازی دڵی خۆتم
بەگوێچكەدا بچرپێنە .
***
چۆن بتوانم بێ تۆ هەڵكەم
من لێرەبم ئەتۆش لەوێ
بەبینینی كێ لەمەودا
زمانم لەگۆ بكەوێ
***
كێ گەڵای عومری پایزی
تەنیایی من كۆكاتەوە ؟
ئەو كاتانەی خەمم هەیە
كێ بێ دڵم بداتەوە ؟
***
بۆچی وەكو زەردەپەڕێ
ئاوا زوو ون بووی لەچاوم
خۆمن ئێستا لەدووری تۆ
لەبیری خۆشم نەماوم
***
پێمبڵێ ئێستا بۆ كوێ برۆم
خۆم و ئەم دڵە شەیدایەم
پێم نەوتی كچێ شێتە
لەگەڵ دووری تۆ ڕانایەم !