مەسرور بارزانی، سەرۆکی حکومەتی هەرێمی کوردستان بەشداری لە یەکەمین دیداری لاوان لە دهۆک کرد و تیشکی خستەسەر ژیانی چەند لایەنێکی لاوانی کوردستان و بنێت.
سەرۆکی حکومەتی هەرێمی کوردستان، ئاماژەی بەوەشدا، لە سەردەمی شاخ پێشمەرگە ئاواتیان بەوە دەخواست بە ئازادی لە کوردستان بژین ئەگەر لەژێر تەڕاشێكیش دابێت، ئێستا کوردستان ئازادە و له هه‌موو عێراق ئاوه‌دانتره.
دەقی وتەکانی سەرۆکی حکومەتی هەرێمی کوردستان:
رۆژه‌كانی راپه‌ڕین و ئازادكردنی شار و شارۆچكه‌كانی كوردستان له هه‌موو خه‌ڵكی كوردستان پیرۆز ده‌كه‌م، یادێكی مه‌زن و پیرۆزه بۆ رزگاركردنی گه‌له‌كه‌مان له‌ژێر ده‌ستی زۆرداری و، وه‌رچه‌رخانێكی مێژوویی بوو له ژیانی هه‌موو خه‌ڵكی كوردستاندا. ئه‌وانه‌ی پێش راپه‌ڕین ژیاون، له عێراق و ئه‌وانه‌ی ئاوا‌ره‌ی ده‌ره‌وه‌ش بوونه، ژیانی ئاواره‌یی و بنده‌ستییان بینیوه. له‌بیرم دێت، زۆر جار كه له‌گه‌ڵ هاوڕێكانمان و پێشمه‌رگه‌كان داده‌نیشتین، ده‌یانگوت، خوزگه گه‌ڕاباینه‌وه كوردستان و به ئازادی ژیاباین، با له‌ژێر “ته‌راشێكدا” ژیاباین، هه‌زار جار سوپاس بۆ خوا گه‌ڕاینه‌وه كوردستان، كوردستان ئێستا ئازاده، نه‌ك له‌ژێر ته‌ڕاشدا نین، به‌ڵكو كوردستان له هه‌موو عێراق ئاوه‌دانتره”.
چه‌ندین نه‌وه دوای ئه‌و راپه‌ڕینه له‌دایكبوونه، گه‌وره‌بوونه و چوونه‌ته زانكۆ و په‌یمانگه‌كان و خوێندنه‌كه‌شیان ته‌واوكردووه. به‌ڵام ئه‌وه‌ی ئێستا دیاره، به‌شێكی زۆر له‌و گه‌نجانه ئه‌و ئێش و ئازارانه‌یان نه‌بینیوه، له‌وانه‌یه قه‌در و قیمه‌تی ئه‌م ئازادییه‌ی ئێستا نه‌زانن، ئینشائه‌ڵڵا هەرگیز ئه‌و ژیانه نه‌بینن، كه ئێمه بینیومانه. هه‌موو كاتێك به‌سه‌ر به‌زری بژین و ئه‌وه‌ی له‌سه‌ر هه‌ردووكمان پێویسته به‌یه‌كه‌وه كاربكه‌ین بۆ ده‌سته‌به‌ركردنی ژیانێكی باشتر بۆیان.
ئه‌وه‌ی شاره‌زایی له مێژووه‌كه‌ی نه‌بێت، ناتوانێت داهاتوویه‌كی باشتر بۆ خۆی بونیادبنێت. پێویسته له‌سه‌ر هه‌موومان مێژوو بیر خۆمان بینینه‌وه و بزانین له كوێوه ده‌ستمان پێكردووه و گه‌یشتووینه‌ته كوێ. زۆر جار كێشه و گرفت هه‌بوونه، پێویسته بزانین سه‌رچاوه ئه‌و كێشانه چ بوونه، بۆ رێگری لێمان كراوه و داواكانمان وه‌كو پێویست جێبه‌جێ نه‌كراون. ئه‌مه كاری ئێمه به ته‌نها نییه، كاری هاوبه‌شه، پێویسته هه‌ر كه‌سێك له ماڵه‌كه‌یدا، ئه‌و باوكه‌ی پێشمه‌رگایه‌تی، نه‌خۆشی و بنده‌ستی بینیوه، به‌بیری كچ و كوڕه‌كانی بهێنێته‌وه، چ ژیانێكیان بینیوه و ئێستا له چ ژیانێكدان و بۆ پاراستنی ئه‌م ژیانه پێویسته به‌یه‌كه‌وه كاربكه‌ین و له‌سه‌ر نوێ پێویسته ئه‌م ئه‌زموونه بپارێزێت. له‌سه‌ر حكومه‌تی هه‌رێمیش پێویسته ده‌رفه‌ت بۆ گه‌نجان بڕه‌خسێنێت بۆ ئه‌وه‌ی داهاتوویه‌كی باشتر بۆ خۆیان بونیاد بنێن.
پێموایه له هه‌موو قۆناغه‌كانی ژیاندا، مرۆڤ پێویستی به نوێكردنه‌وه و به‌ره‌وپێشچوون هه‌یه، ئه‌گه‌ر سه‌یری ئێستا و رابردووی ئاستی خوێندن بكه‌ین، ده‌بینین به‌ره‌و پێشچوونێكی زۆری به‌خۆیه‌وه بینیوه، ئێستا چه‌ندین زانكۆ و په‌یمانگه‌ی گه‌وره‌مان هه‌ن له‌سه‌ر ئاستی هه‌موو كوردستان، ئه‌مه‌ش ئاماژه‌یه‌كه بۆ به‌ره‌و پێشچوونی پڕۆسه‌ی خوێندن له هه‌رێمی كوردستان، له سه‌ره‌تاییه‌وه تا قۆناغه‌كانی زانكۆ و په‌یمانگه‌كان. ئه‌گه‌ر ئاماژه به هه‌بوونی كه‌موكورتیش بكرێت، ئه‌مه‌ش شتێكی باشه، چونكه ئه‌مه ئه‌و چه‌نده پیشان ده‌دات، كه تموحاتی ئێمه زۆر له‌وه‌ی كه هه‌یه زیاتره. ئه‌مه شتێكی باشه، بۆ ئه‌وه‌ی ئێمه به‌رده‌وام هه‌وڵ بده‌ین خۆمان نوێبكه‌ینه‌وه و به‌ره‌و پێشه‌وه بچین. خوێندن و په‌روه‌رده هه‌ردووكی شان به شانی یه‌ك پێویستن، په‌روه‌رده ته‌نها له قوتابخانه و زانكۆكان ناكرێت، په‌روه‌رده له كۆمه‌ڵگه و ماڵه‌وه‌ش ده‌كرێت. له‌سه‌ر دایك و باوكان پێویسته به‌شێوه‌یه‌كی باش په‌روه‌رده‌ی منداڵه‌كانیان بكه‌ن، له‌سه‌ر مامۆستاش پێویسته له قوتابخانه درێژه به‌و په‌روه‌رده‌كردنه بدات، ئه‌مه‌ش ئه‌و چه‌نده ده‌رده‌خات، كه قوتابی هه‌ر له قۆناغی سه‌ره‌تاییه‌وه، تا ده‌گاته زانكۆش، ته‌نها خوێندن به‌س نییه، به‌ڵكو په‌روه‌رده‌كردنیشی پێویسته و ده‌بێت بۆ ئه‌و هه‌نگاوه‌ش هه‌موومان هاوكاری یه‌كتر بین.
چه‌ندین جار گوتوومه و دووباره‌ی ده‌كه‌مه‌وه، هه‌ر تاكێكی ئه‌م وڵاته خاوه‌نی كوردستانه، هیچ حزب و لایه‌نێكی سیاسی ناتوانێت بڵێت من بڕیارده‌ر و خاوه‌نی ئه‌م وڵاته‌م و ئێوه‌ش ته‌نها “ئیتاعه‌ت” بكه‌ن. ئه‌گه‌ر ناكۆكییه‌كانی نێوان لایه‌نه سیاسییه‌كان بۆ ده‌ستبه‌ركردنی ده‌ستكه‌وتی نیشتمانی بن، شتێكی زۆر باشه، ئه‌گه‌ر حزب بوو به وه‌سیله‌یه‌ك بۆ به‌ده‌ستخستنی ئامانجی نه‌ته‌وه‌یی و نیشتمانی، شتێكی زۆر باشه و پێویسته پاڵپشتیی له‌و حزبه بكه‌ین، كه له‌سه‌ر ئه‌و ئامانجه نیشتمانی و نه‌ته‌وه‌ییانه ئه‌ركه‌كانی جێبەجێ دەکات و له‌سه‌ر هه‌ر هه‌ما بنه‌ما دامه‌زرێندراوه. به‌ڵام ئه‌گه‌ر حزب خۆی بووه گرفت له‌سه‌ر ده‌ستكه‌وته نیشتمانییه‌كان و بووه رێگر بۆ به‌ره‌و پێشبردن و ئاوه‌دانكردنه‌وه‌ی وڵات، پێویسته ئه‌و كاته هه‌ر تاكێك هه‌ڵوێستی هه‌بێت، له به‌رامبه‌ر هه‌ر حزب و لایه‌نێك بێت، ناكۆكی سیاسی له كۆمه‌ڵگه‌ی سیاسی بوونی هه‌یه، به‌ڵام به‌رژه‌وه‌ندییه‌كی نیشتمان هه‌موویان به‌یه‌كه‌وه ده‌به‌ستێته‌وه و ئه‌گه‌ر حزبه‌كان له‌و چوارچێوه‌یه‌دا بۆ به‌ره‌وپێشبردنی وڵات كاریان كرد، كۆمه‌ڵگه له ماوه‌یه‌كی زوودا ده‌گاته ئامانجه‌كانی. به‌ڵام ئه‌گه‌ر ئامانج ته‌نها بۆ دیارخستنی حزب و لایه‌نێك بێت، ئه‌و كاته بێگومان گرفت زیاتر دروست ده‌بن. ئه‌وه‌ی هه‌شه راسته، هه‌موو حزبێك به‌رژه‌وه‌ندی وڵاته‌كه‌ی له‌به‌رچاو نه‌گرتووه و زیاتر خۆی له‌به‌رچاو گرتووه. راسته ئه‌م ناكۆكییه‌كانه‌ش كێشه‌یان بۆ قوتابیان دروستكردووه. ئاساییه حزب له ده‌سه‌ڵات بێت و ده‌كرێت له ئۆپۆزسیۆنیش بێت. ئاساییشه حزب ركابه‌ری بكات بۆ ئه‌وه‌ی ده‌سه‌ڵات بگرێته ده‌ست، به‌ڵام هه‌روه‌كو گوتمان، هه‌ندێك هێڵی سوور هه‌ن، ئه‌وانیش پاراستنی به‌رژه‌وه‌ندییه‌كانی وڵاتن، نه ده‌سه‌ڵات و نه ئۆپۆزسیۆن نابێت ئه‌و هێڵانه تێبپه‌ڕێنن. كاتێك حزب و لایه‌نێك بۆ به‌رژوه‌ندی ته‌سكی خۆی، هه‌وڵیدا گه‌نجی ئێمه له وڵاته‌كه‌ی “غه‌ریب” بكات، یان وای لێكات وڵاته‌كه‌ی خۆشنه‌وێت و به‌جێی بهێڵێت، پێویسته ئه‌و كاته هاووڵاتی بزانێت، ئامانجی ئه‌م حزبه و ململانێیه، له به‌رژه‌وه‌ندی خۆی و وڵاته‌كه‌یدا نییه. پێویسته گه‌نجه‌كانمان و هه‌ر تاكێكی ئه‌م وڵاته هه‌وڵبدەن به‌خۆیان بیربكه‌نه‌وه، باش و خراپ له یه‌كدی جیا بكاته‌وه و هه‌ڵسه‌نگاندیان بۆ بكات، ئه‌و كاتیش ده‌توانێت خزمه‌ت به‌و رێگه‌یه بگه‌یه‌نێت كه له به‌رژه‌وه‌ندیدایه و رێگه‌ش به‌و لایه‌نانه نه‌دات له‌سه‌ر حسابی خۆی، ده‌ستكه‌وتی شه‌خسی به‌ده‌ست بهێنێت، پێویسته گه‌نجەکانمان وه‌كو حه‌كەم بن، كێ له خزمه‌تی وڵاته‌كه‌یدا بوو، پشتیوانی لێ بكه‌ن و كێ له خزمه‌تی وڵاته‌كه‌ماندا نه‌بوو، به‌رپرسیارێتی گه‌نجه‌كانمانه بڕیاربده‌ن، به‌ره‌و كوێ بڕۆن و كامه لایه‌ن هه‌ڵبژێرن.
ئومێدێكی زۆرم بۆ باشتربوونی ئه‌م دۆخه هه‌یه، چونكه بارودۆخی زۆر سه‌خترمان به‌ڕێكردووه و ئه‌گه‌ر ماندووبوونی گه‌نج، پێشمه‌رگه، داموده‌زگاكانمان و خۆڕاگری خه‌ڵكه‌كه‌مان نه‌بووایه ئه‌و بارودۆخانه‌مان تێنه‌ده‌په‌ڕاند و پێویسته مرۆڤ سوپاسگوزاری خوا و ئه‌م میلله‌ته بێت كه به‌رگه‌ی ئه‌م هه‌موو كێشانه‌ی گرتووه. له‌م كابینه‌یه‌دا كارمانكردووه بۆ دروستكردنی ژێرخانێكی ئابووری به‌هێز بۆ ره‌خساندنی ده‌رفه‌ت به گه‌نجان و به‌ره‌وپێشبردن و ئاوه‌دانكردنه‌وه‌ی وڵات. بۆیه ئومێدێكی زۆرم به داهاتووی وڵاته‌كه‌مان و توانای گه‌نجه‌كانمان هه‌یه.
حكومه‌ت خزمه‌تكاری خه‌ڵكه و له خه‌ڵكه‌وه دروستبووه و ئامانجیشی خزمه‌تكردنی هاووڵاتییانه، بۆیه دروستكردنی په‌یوه‌ندییه‌كی دروست له‌نێوان ده‌سه‌ڵات و گه‌نج و لاواندا پێویستییه‌كی هه‌نووكه‌یی و پێویسته، بۆ ئه‌وه‌ی بزاندرێت داواكاری خه‌ڵك چین، چونكه ئه‌گه‌ر ئه‌و گفتوگۆیه نه‌بێت و لاو شوێنی خۆی له ده‌سه‌ڵاتدا نه‌بینێته‌وه، تووشی نائومێدی ده‌بێت. هه‌موو كه‌سێك نابێته فه‌رمانبه‌ر و ده‌سه‌ڵاتدار، به‌ڵام ئه‌وه‌ی كه به‌رپرسیارێتی وه‌رده‌گرێت، له ئاستی به‌رپرسیارێتیدا بێت، ئه‌وه‌ی باش له جێگه‌ی باش دابنرێت. ئێستا له ئۆفیسه‌كه‌مان ژماره‌یه‌كی زۆری گه‌نجی به‌هره‌دار هه‌ن، كه ته‌نانه‌ت به‌بێ ئه‌وه‌ی بزانین پاڵپشتی چ لایه‌نێك ده‌كه‌ن، هێناومانن و كار ده‌كه‌ن و هاوكاری ئێمه‌یان كردووه، له‌سه‌رخستنی ژماره‌یه‌كی زۆری پرۆژه گه‌وره‌كان، له‌وانه‌ش هه‌نارده‌كردنی به‌رهه‌می خۆماڵی هه‌رێمی كوردستان بۆ ده‌ره‌وه‌ی وڵات، به‌شێوه‌یه‌كی به‌رده‌وام له‌گه‌ڵ وه‌زاره‌ت و لایه‌نه په‌یوه‌ندیداره‌كان له په‌یوه‌ندیدان بۆ به‌ڕێكردنی كاره‌كان.
مه‌رجیش نییه چاوی گه‌نج و لاوان له‌وه‌بێت، بێن له حكومه‌ت كاربكه‌ن، تێكه‌ڵی حكومه‌ت له‌گه‌ڵ گه‌نج و خه‌ڵكه‌كه‌مان بۆ ئه‌وه نییه ته‌نها ده‌رگای حكومه‌ت و ده‌سه‌ڵاتیان بۆ بكه‌یته‌وه، ده‌بێت هه‌لی كاریشیان بۆ بڕه‌خسێنی و له كه‌رتی تایبه‌ت هاوكاریان بكه‌ن، بۆ ئه‌وه‌ی گه‌نج خۆیان ببنه خاوه‌نی كاری خۆیان. ئه‌مڕۆ زۆر گه‌نجی به‌هره‌دارم بینی و داهێنانی زۆر باشیان له‌سه‌ر ئاستی نێوده‌وڵه‌تی كردووه، كه ئه‌مه‌ش جێگه‌ی دڵخۆشیمانه و به دڵنیاییه‌وه هه‌موو شتێك ده‌كه‌ین بۆ پاڵپشتیكردنی گه‌نجه‌كانمان. له‌سه‌ر گه‌نجه‌كانیشمان پێویسته ئه‌وه بزانن، چه‌ند هه‌وڵ له‌سه‌ر هاوكاریكردن و سه‌ركه‌وتنی گه‌نجه‌كانمان ده‌كرێت، هێنده‌ش هه‌وڵ بۆ له‌ناوبردنی ئومێدی گه‌نجه‌كانمان و رێگریكردن لێیان ده‌درێت، بۆیه ده‌بێت گه‌نجه‌كانمان ئاگاداربن نه‌كه‌ونه نێو ئه‌و هەڵانه و هاوكاربن له‌گه‌ڵمان و ئێمه‌ش هاوكاریان ده‌بین و داهاتووی وڵاته‌كه‌شمان زۆر گه‌شه.
زۆر شتی باش له كوردستان ئه‌نجامدراوه، باڵه‌خانه‌ی باش بونیادنراون، پارێزگاری له قه‌واره‌ی هه‌رێم كراوه و رێگه و بانی باش دروستكراون، به‌ڵام ئێمه ساڵ به ساڵ پێویستیمان به پته‌وكردنی ئه‌م ژێرخانه‌یه، ساڵ به ساڵ به دروستكردنی ژێرخانێكی ئابووری به‌هێزه، بۆ ئه‌وه‌ی له رووی سه‌قامیگری و ئاساییش و سیاسییه‌وه، ئێمه سه‌قامگیرییه‌كی باشترمان هه‌بێت، له‌و روانگه‌وه، هه‌ندێك شت له ئاستی پێویستدا نین، بۆ نموونه پڕۆسه‌ی هه‌ژماری من. له‌باره‌ی هه‌ژماری منه‌وه، پڕۆسه‌یه‌كمان ده‌ستپێكردووه وه‌كو نموونه‌یه‌ك له شوێنێك، 850 كه‌س به شێوه‌یه‌كی ئه‌لیكترۆنی و به كرێدێت كارد ده‌توانن مووچه‌كانیان وه‌ربگرن، به‌ڵام بێجگه له‌وه ده‌توانن له هه‌ر شوێنێك كه ئامێری خوێندنه‌وه‌ی كاردی كرێدێتیان هه‌بێت، ده‌توانن مامه‌ڵه‌ی پێوه‌بكه‌ن له فرۆشگه و سۆپه‌ر ماركێته‌كان. له ده‌ره‌وه ئێستا هێنان و بردنی پاره‌ی كاش باوی نه‌ماوه و رێگه‌ش پێنه‌دراوه، بۆیه خه‌ڵك پێویستی به‌‌م كرێدێت كارده هه‌بوو، بۆ ئه‌وه‌ی له ناوخۆ و ده‌ره‌وه ئیشی پێبكات. ته‌نانه‌ت ئه‌و هاووڵاتییانه‌ی له ده‌ره‌وه دێنه هه‌رێمی كوردستان، ئه‌گه‌ر كرێدێت كاردیان نه‌بێت ناتوانن مامه‌ڵه‌كانیان به‌ڕێبكه‌ن. بۆیه تا ئه‌و خزمه‌تگوزارییه سه‌ره‌تاییه‌مان نه‌بێت، ناتوانین زۆرێك له ئیشه‌كانمان به‌ڕێبكه‌ین. زۆرێك له وڵاته‌كان پێنج ساڵ و زیاتریان پێچووه تا سیسته‌می هه‌ژماری منیان جێبه‌جێكردووه، ئێمه له پلانماندایه له ماوه‌ی دوو ساڵدا ئه‌م پڕۆسه‌یه جێگیربكه‌ین، بۆ ئه‌وه‌ی هه‌موو تاكێكی ئه‌م وڵاته سوودمه‌ند بێت له‌م پڕۆسه‌یه و بتوانێت كاردی بانكه‌كه‌ی به‌كاربهێنێت. ئێستا دوو بانك به‌شدارن له‌و پڕۆسه‌یه، به‌ڵام كارده‌كه‌ین بۆ ئه‌وه‌ی له مانگی شه‌شه‌وه پڕۆسه‌كه فراوانتر لێبكه‌ین و چه‌ندین بانكی دیكه‌ش بێنه نێو پڕۆسه‌كه‌وه و له پلانماندایه له ماوه‌ی 18 مانگدا هه‌موو مووچه‌خۆرێك ببێت به خاوه‌ن كرێدێت كاردی خۆی. ئه‌وه‌ی ئێمه كردووه‌مانه پێویسته بۆ دروستكردنی ژێرخانێكی ئابووری.
به‌دیجیتاڵكردنی كاره‌كانی رۆژانه‌ی خه‌ڵك ئاسانكاری بۆ به‌ڕێكردنی كاره‌كان له ماوه‌یه‌كی كه‌مدا ده‌كات، له‌وانه‌ش وه‌رگرتنی مۆڵه‌تی شۆفێری، ئه‌و كاته‌ی چوومه وه‌زاره‌تی ناوخۆ، له‌ماوه‌ی 15 بۆ 20 خوله‌كێكدا مۆڵه‌تی شۆفێریم نوێكرده‌وه، كه ئه‌و كاتی یه‌كه‌م هه‌نگاوی به‌دیجیتاڵكردنی كاره‌كانی داموده‌زگاكان بوو. هه‌ر له‌باره‌ی به‌دیجیتاڵكردنی كاره‌كانه‌وه، ئێمه له قۆناغێكی باشداین و قۆناغێكی باشیشمان بڕیوه و دڵنیاتان ده‌كه‌مه‌وه تا ساڵی 2025 ئێمه ده‌بینە وڵاتێك، حكومه‌تێك كه هه‌موو خزمه‌تگوزارییه‌كانمان به‌شێوه‌ی دیجیتاڵی و ئۆنڵاین ده‌بێت و پێویستیمان به كاغه‌ز نابێت و پێویست ناكات تا 2025 چاوه‌ڕێ بین، تا ئه‌و پێشكه‌وتنانه ببینن، به‌ڵكوو ساڵ به ساڵ ده‌یانبینین. ئومێدم وایه به جێگیركردنی ئه‌م سیسته‌مه‌ی هه‌ژماری من، ئیتر كێشه‌ی دابه‌شكردنی مووچه نه‌بێته هه‌واڵی كه‌ناڵ و ده‌زگاكانی راگه‌یاندن. پڕۆسه‌كه مانگانه به‌خۆی به‌ڕێوه‌بچێت.
كاره‌با پێداویستییه‌كی رۆژانه‌ی خه‌ڵكه و خه‌ڵك هه‌مووی چاوه‌ڕێی ئه‌وه‌یه كاره‌با بكرێته 24 كاتژمێری و ئێمه‌ش ده‌توانین ئه‌و كاره ئه‌نجامبده‌ین، به‌ڵام به‌شێك له كێشه‌كان رێگربوونه ، بۆ نموونه كێشه‌كانی نێوان حكومه‌تی هه‌رێم و به‌غدا و داهاته‌كانی هه‌رێمی كوردستان و داهاتی نانه‌وتی بووه، هیواداریشم هه‌موو هاووڵاتییان ئه‌وه بزانن، هه‌رێمی كوردستان ئه‌و ژێرخانه‌ی هه‌یه، كه بتوانێت كاره‌بای 24 كاتژمێری دابین بكات و به‌رهه‌مبهێنێت، به‌ڵام سووته‌مه‌نی پێویست بۆ ئه‌و مه‌به‌سته‌ی له‌به‌ر ده‌ست نه‌بووه و نه‌شتوانراوه به‌شێك له وێستگه‌كانی كاره‌با نۆژەن بكرێنه‌وه.
ئێمه زیاتر له دوو ملیار دۆلار ته‌رخان ده‌كه‌ین بۆ ئه‌وه‌ی پاڵپشتیی له كاره‌با بكه‌ین وه‌كو حكومه‌ت، به‌ڵام هاووڵاتییان ده‌توانم بڵێم 15%ـی ئه‌و به‌رپرسیارێتییه‌ی هه‌ڵنه‌گرتووه، به‌شێك له هاووڵاتییان حه‌قی كاره‌با ده‌ده‌ن و پاپه‌ندن پێی، به‌ڵام به‌شێكیشیان نایده‌ن. كولفه‌ی دروستكردنی له‌سه‌ر حكومه‌ت نزیكی حه‌وت سه‌نته و له‌سه‌ر هاووڵاتی سه‌نت و نیوێكه، به‌ڵام له‌به‌ر ئه‌وه‌ی حكومه‌ت كاره‌بای 24 كاتژمێری پێنادات، ده‌چێت پاره‌یه‌كی زیاتر به خاوه‌ندی موه‌لیده‌یه‌ك ده‌دات، ئه‌گه‌ر بێت و له‌گەڵ حكومه‌ت رێكبكه‌وێت و به‌رپرسیارێتی خۆی جێبه‌جێبكات، دڵنیایی ده‌ده‌م حكومه‌ت ده‌توانێت كاره‌بای 24 كاتژمێری به هاووڵاتییان بدات. ئه‌مه ئه‌و چه‌نده‌یه كاری له‌سه‌ر ده‌كه‌ین و ده‌مانه‌وێت له داهاتوودا جێبه‌جێ بكه‌ین.
ئاستی مامۆستا و قوتابییه‌كانمان زۆر به‌رزه و لێهاتوونه، به‌ڕێوه‌بردنی ئه‌م زانكۆ و په‌یمانگه‌یانه پێویستییان به ئیمكانیات هه‌ن، چه‌ند ئیمكانیات زیاتر بن، ئاستی رۆشنبیری، زانست، ئه‌كادیمی و توێژینه‌وه‌كان به‌رزتر ده‌بێته‌وه. ئێمه له ئه‌نجوومه‌نی وه‌زیران دامه‌زراوه‌یه‌كمان دروستكردووه، تایبه‌ته به متمانه به‌خشین به زانكۆكان، كه ستانداردی نێوده‌وڵه‌تی بۆ پێشخستنی ئاستی زانكۆكان دیاریده‌كات و له‌گه‌ڵ زۆرێك له وڵاتان و به‌تایبه‌ت له‌گه‌ڵ به‌ریتانیا قسه‌مان كردووه، بۆ ئه‌وه‌ی بێن له‌ڕووی كه‌رتی په‌روه‌دره‌وه بێن هاوكاریمان بكه‌ن. به‌شێكی دیكه‌ی به‌رپرسیارێتییه‌كه ده‌كه‌وێته ئه‌ستۆی مامۆستاكانمان كه چۆن وانه‌كانیان ده‌ڵێنه‌وه و قوتابیان فێرده‌كه‌ن و گرنگی به ستاندارده نێوده‌وڵه‌تییه‌كان و ناوه‌ڕۆكی وانه‌كان ده‌ده‌ن.
پێموایه شتێكی هه‌ڵه‌یه هه‌ر كه‌سێك له زانكۆ ته‌واو بوو، داوا بكات له حكومه‌ت دابمه‌زرێت، ئه‌گه‌ر سه‌یری رێژه‌ی هاووڵاتییانی هه‌رێمی كوردستان و فه‌رمانبه‌رانی حكومه‌ت بكه‌ین، ده‌بینین رێژه‌كه زۆره و ئێمه پێویستیمان به‌و هه‌موو فه‌رمانبه‌ره نییه، له رابردوودا له‌به‌ر ئه‌وه‌ی كاری دیكه نه‌بوونه، چاوی هه‌مووان له دامه‌زراندن بووه له حكومه‌ت. له‌م كابینه‌یه‌دا كارمان له‌سه‌ر سێ پرس كردووه، یه‌كه‌میان، به‌رده‌ستكردنی مافی خانه‌نشینبوون بۆ هه‌موو ئه‌و فه‌رمانبه‌رانه‌ی له كه‌رتی حكومی و تایبه‌ت كارده‌كه‌ن. دووه‌میان، ره‌خساندنی هه‌لی كار بۆ گه‌نجان له‌لایه‌ن كه‌رتی تایبه‌ته‌وه، بۆ ئه‌و مه‌به‌سته‌ش حكومه‌ت پاڵپشتیی كه‌رتی تایبه‌ت ده‌كات. سێه‌میان، حه‌زی هاووڵاتییانمان بۆ ئه‌وه‌ی كار بكه‌ن، ئێستا ئه‌گه‌ر بۆ هه‌ر كارێك پێویستیمان به پسپۆڕی بیانیش هه‌بێت، پێویسته به تێپه‌ڕبوونی كات گه‌نجه‌كانیشمان فێری ئه‌و كاره بكرێن. پێویسته له هه‌موو ئه‌و شوێنانه‌ی كرێكاری بیانی تێیدا كارده‌كه‌ن، به رێژه‌یه‌كی دیاریكراو، ده‌بێت هاووڵاتییانی كوردستانیش له‌و شوێنانه كاربكه‌ن.
راسته كوڕی سه‌رۆك بارزانیمه، به‌ڵام هه‌موو كاتێك وه‌كو خزمه‌تكارێك بوومه له‌گه‌ڵیدا زۆر شت له‌وه‌وه فێربوومه، به‌ڵام ئه‌و شتانه‌ی كه ویستوومه لێیوه فێربم، سێ شت بوونه، له‌وانه‌ش راستگۆیی، نیشتمانپه‌روه‌ری و وه‌فاداری. زۆر پێی سه‌ربەزین و ئینشائه‌ڵڵا هه‌موو شتێك ده‌كه‌ین بۆ ئه‌وه‌ی رێبازه‌كه‌ی به‌رنه‌ده‌ین.
وه‌ك باوكێك نه‌متوانیوه وه‌كو پێویست ئه‌ركه‌كه‌م جێبه‌جێبكه‌م و زۆر كاتم بۆ منداڵه‌كانم ته‌رخان نه‌كردووه. هه‌وڵمداوه یه‌كێكیان ئه‌گه‌ر پێویستییان به شتێك بوو، ئه‌وكات لایان بم و هاوكاریان بكه‌م، زیاتر دایكیان یارمه‌تی داون لە خوێندن. هه‌ر چه‌نده شه‌ممه‌ش ده‌وام ده‌كه‌ن، به‌ڵام ئه‌گه‌ر هه‌ینیان مێوانمان نه‌بێت، ده‌چینە دەرەوە و پیاسه‌یه‌ك ده‌كه‌ین.
سۆشیاڵ میدیا به‌شێكه له ژیانی رۆژانه‌ی هه‌موومان، منیش وه‌كو هه‌موو كه‌سێك سۆشیاڵ میدیا به‌كاردێنم و رۆژانه له سایت و كه‌ناڵه جیاوازه‌كان هه‌واڵ ده‌خوێنمه‌وه و وه‌رده‌گرم، سۆشیاڵ میدیا وه‌كو هه‌موو شتێك شیرێكی دوو سه‌ره، بۆیه ده‌بێت گه‌نجه‌كانمان به‌شێوه‌یه‌ك به‌كاری بهێنن كه له سوودی خۆیاندا بێت و خێری لێ ببینن و نه‌یكه‌ن بە ئامرازێك بۆ زیانگه‌یاندن به كه‌سێكی دیكه. هیودارم هه‌موو لایه‌نێك سوود له‌م ته‌كنه‌لۆژیایه نوێیه وەربگرن. جار جاریش به‌پێی ئه‌و كاته‌ی له‌به‌رده‌ستمانه، كتێب ده‌خوێنمه‌وه.
له‌ناوخۆی هه‌رێمی كوردستان سه‌رسامم به بارزانی نه‌مر، نه‌ك ئه‌وه‌ی باپیرمه، به‌ڵكو كه‌سێك بوو بزووتنه‌وه‌ی نه‌ته‌وه‌ی له كوردستان دامه‌زراند و شۆڕشه‌كانی شۆڕشی سه‌رتاسه‌ری بوون و ناوه‌كه‌ی له هه‌ر چوار پارچه‌ی كوردستان دیارە و ئێمه‌ش شانازی پێوه‌ده‌كه‌ین. له‌سه‌ر ئاستی نێوده‌وڵه‌تیش زۆر سه‌رسامم به غاندی، چونكه یه‌كێك بوو له‌وانه‌ی دژی سته‌م و زۆرداری وه‌ستایه‌وه و رێگه‌ی ئازادی گه‌له‌كه‌ی له‌وه‌دا بینیه‌وه كه هاوكاری دوژمنه‌كه‌ی نه‌كات.