مەسرور بارزانی سەرۆکی حکومەتی هەرێمی کوردستان و جینین هێنیس پلاسخارت نوێنەری تایبەتی سکرتێری گشتیی نەتەوە یەکگرتووەکان لە عێراق کۆبوونەوە و جەختیان لە پاراستنی سەروەری خاکی عێراق و هەرێمی کوردستان و سنووردانان بۆ بۆردومانکردن و هێرشکردنە سەر هەرێمی کوردستان کردەوە.
ئەمڕۆ پێنچشەممە 24/11/2022، مەسرور بارزانی سەرۆکی حکومەتی هەرێمی کوردستان پێشوازی لە خاتوو جینین هێنیس پلاسخارت نوێنەری تایبەتی سکرتێری گشتیی نەتەوە یەکگرتووەکان لە عێراق کرد.
لە کۆبوونەوەکەدا دۆخی گشتیی عێراق و دوایین گۆڕانکاری و پەرەسەندنەکانی ناوچەکە و گرنگیی چارەسەرکردنی بنەڕەتی کێشەکانی نێوان حکومەتی هەرێمی کوردستان و حکومەتی فیدراڵیان لەسەر بنەمای دەستوور و کارنامەی وەزاری حکومەتی نوێ تاووتوێکرد.
بەگوێرەی راگەیەندراوی نووسینگەی سەرۆکی حکومەتی هەرێمی کوردستان، تەوەرێکی دیکەی گفتوگۆکانی نێوان مەسرور بارزانی و پلاسخارت، جەختکردنەوە بوو لە رێزگرتن و پاراستنی سەروەری خاکی عێراق و هەرێمی کوردستان و سنووردانان بۆ بۆردومانکردن و هێرشکردنە سەر هەرێمی کوردستان.