مەكتەبی كاروباری دەوڵەتی كوردستان،لە‌پارتیی دوای كۆنگرە‌دا
مەشخەڵ كەوڵۆسی
پارتی كۆنگرەی خۆی دەبەستێت، لەكاتێكدا كە بڕیاری گۆڕانكاری لەناو ئەو ژینگە سیاسییەی ناوچەكەو ئێراقدا، بوێرییەكی زۆری دەوێت. دەستكاریكردنی هاوسەنگییەكان و خەریتەی جوڵەكان پێویستی بە حیكمەتێكی زۆر گەورە هەیە.
ئەوەی پەیوەندی بەناوخۆی پارتییەوە هەیە، بەجێیدەهێڵین بۆ پارتی،
بەڵام ئەوەی كەپەیوەندی بەدەرەوەی پارتییەوە هەیە، پێویستە هەڵوێستەی پێشوەختی لەسەر بكرێت. چونكە هەر جۆرە گۆڕانكاریی و زیادكردن و لێكەم كردنەوەیەك، كاریگەری لەسەر دۆسیەی كورد دەبێت، هەم لەڕووی مێژووییەوە، هەم لەڕووی سیاسی و دیپلۆماتییەوە.
ئەوەی كە بۆ هێڵی نەتەوەیی كوردستان گرنگە، ئەوەیە پارتی كۆمەڵێك
بڕیار لەكۆنگرەدا بدات كە ببێتە دۆكیۆمێنت و دوای پێوانەی ئەدای پارتی بەرانبەر دۆسیە جێگە بایەخەكانی نەتەوەی كورد بەگوێرەی ئەو بڕیارانە بكرێت. من زۆر دوور بۆی ناچم و تەنها چەند پێشنیارێك دەخەمە بەرچاو:
یەكەم: مەسەلەی دەوڵەتی كوردی بەشێوەیەك ڕاست و ڕەوان لەناو دەستوری پارتیدا ببڕێنرێتەوە. خاڵبەندی بۆ بكرێت وەك ئەولەویەتی كاری نەتەوەی كورد و، دوائامانج و ترۆپكی چاوەڕوانییەكان. كارێكی پەسەندە ئەگەر مەكتەبێكی تایبەت هەبێت لەناوپارتی، ئەندامێكی مەكتەبی سیاسی سەرپەرشتی بكات، با ناوی مەكتەبی دەوڵەتی كوردستان بێت. یان هەر ناوێك كە بگونجێت، بۆ بەدواداچوونی ئەو دۆسیەیە و كاركردن لەسەری و ئامادەكردنی بیرۆكە و پرۆژە و دروستكردنی لۆبی و دابینكردنی پێداویستییەكانی لەڕووی تیۆر و پراكتیكەوە. ئەوەش دەبێتە دەستپێشخەرییەكی زۆر گەورەو تازە و یەكەمجاریشە لەناو حیزبەكانی كوردستان و تەنانەت لەناو ئەو نەتەوانەشدا كەخاكیان داگیركراوە، حیزبێك دەستپێشخەرییەكی لەم شێوەیە بكات.
دووەم: ستراتیژی ئاسایشی نەتەوەیی كوردستان، ڕوون بكرێتەوە، خاڵەكانی، ئەدگارەكانی، سنورەكانی، چەمكەكانی، شێوازی بەرقەراركردنی، هۆكارەكانی تێكدانی…هتد، هەموو ئەوانە بەڕوونی لەبڕگەیەكی ئەو دەستورەدا ڕووبەری شایستەیان بۆ دیاری بكرێت. چونكە بەبێ ئەوەی ڕووئیایەكی ڕوون هەبێت سەبارەت بەم چەمكە،
زەحمەتە بتوانرێت هەنگاوەكانی داهاتوو دیسپلین بكرێن.
سێیەم: كۆی دنیابینی پارتی بۆ مەسەلەی ئاسایشی نەتەوەیی، گەڵاڵە بكرێن، دواجار وەكو پرۆژەیەك كاری لەسەر بكرێت تاكو لەپەرلەمانی كوردستان بكرێتە یاسا.
چوارەم: بریا پارتی بیتوانیایە لەكۆنگرەكەدا بڕیار لەسەر دروستكردنی دەستەیەكی تایبەتمەند لەنوسەران و بیرمەندانی كورد لەهەر چوارپارچەی كوردستان، بۆ نوسینەوە و تیۆریزەكردنی فیكری ناسیۆنالیزمی كوردی.
ئەوەی جێگەی ئاماژەیە، تاكو ئێستا فیكری نەتەوەیی كورد، تاكو ئەم چركەیە نەنوسراوەتەوە. بەڵام نەتەوەكانی تر، بۆنمونە عەرەب و تورك، هەریەكەیان خاوەنی تیۆری نەتەوەیی خۆیانن، تەنانەت جوەكان لەو ڕووەوە پێشەنگن.
بیرمەندان و نوسەران و ڕۆشنبیرانی نەتەوەیی هەرچوار پارچەی كوردستان
پێویستە بەشداری بكەن لەنوسینەوەی تیۆرەكەدا، هەر پارچەیەكی كوردستان، ڕیشاڵە كەلتوری و سیاسییەكانی خۆیانی تێدا جێبكەنەوە.
پێنجەم: پارتی لەدوای كۆنگرە بتوانێت مەكتەبێك بۆ كاروباری جینۆساید و بەدواداچوونی دۆسیەكان و كۆكردنەوەیان دروست بكات. دواجار بتوانێت هاوكاری دەزگاكانی حكومەت بێت لەم بوارەدا.
پێشنیارەكان بەگوێرەی هەموو سێكتەرەكانی ژیانی كۆمەڵگەی كوردستان زۆر و زەوەندن، پارتیش خۆی بڕیار دەدات كامیان بەهەند وەردەگرێت و، كامیان فەرامۆش دەكات.
بەڵام پاساوەكانی پێشكەشكردنی هەركام لەو پێشنیارانەی بەپارتی دەگەن، قورسایی خۆیان هەیە و، چاوەڕوانییەكانیش لەپارتی لەهەر چوار پارچەی كوردستانەوە، زۆر و زەوەندن. ئایا كۆنگرەی ۱٤ ی ئەو حیزبە، دەتوانێت وەڵامی هەموو چاوەڕوانییەكان بداتەوە؟ چاوەڕوان دەبین.