پەیڤدارێ رێڤەبەرییا گشتی یا گەشت و گوزارێ ل پارێزگەھا دھۆک :رێژا هاتنا گەشتیاران دئەڤ ساڵە دا بۆ دھۆکێ ژپار ساڵ پترە
سەجا شێرزاد – دهۆک
ساڵ بۆ ساڵێ ل ھەرێما کوردستانێ کەرتێ گەشتیاری خورتتر و ب ھێزترە ژساڵا بەری، ئەڤە ژی بۆ کەش و ھەوا و خزمەت گوزاریێن ھەرێما کوردستانێ و جوان پێشوازی و مامەلەکرنا خەلکێ ھەرێمێ دزڤریت، و خورت بوونا ڤێ کەرتی کارتێکرنەکا ھەرە باش ل سەر خورت بوونا کەرتێن دیتر ل ھەرێما کوردستانێ ھەیە، وەکو ئالوگورا بازرگانی و ڤەژاندنا بازاری، پەیدابوونا دەلیڤێن کاری، و گەش بوونا کەرتێ پێشەسازی و ئاڤەدانکرنێ.
رێوار موحەمەد رەشید، پەیڤدارێ رێڤەبەرییا گشتی یا گەشت و گوزارێ ل پارێزگەھا دھۆک ژی ل سەر ڤێ چەندێ بۆ رۆژنامەیا “هەولێر” گوت: ب خۆشحالیڤە ھاتنا گەشتیاران بۆ ھەرێما کوردستانێ و پارێزگەھا دھۆکێ بەردەوامە و ساڵانە رێژا ھاتنا گەشتیاران بۆ پارێزگەھا دھۆکێ پترە، و رێڤەبەرییا گەشت و گوزارا دھۆکێ ژی بەردەوام پلانێن باش رێکدئێخیت بۆ ھندێ بازارگێرییا گەشتیاری ل پارێزگەھا دھۆکێ خورتتر لێ بگەت و بشێت زورترین رێژا گەشتیاران بەرەف ھەرێما کوردستانێ و پارێزگەھا دھۆکێ بینیت.
ب گور ئامارێن رێڤەبەرییا گەشت و گوزاری ل پارێزگەھا دھۆکێ رێژا ھاتنا گەشتیاران دئەڤ ساڵە دا و بەرامبەر ب پار ساڵ پترە، کو دساڵا بوری دا ل سنوورێ پارێزگەھا دھۆکێ ب تنێ ملیونەک و ٥٠٠ ھزار گەشتیاران سەرەدانا پارێزگەھا دھۆکێ کربوو، لێ دئەڤ سالە دا وھەتا دویماھییا ھەیڤا حەفت، نێزیک ملیون گەشتیاران سەرەدانا پارێزگەھا دھۆکێ کرییە، و بلند بوونا رێژا ھاتنا گەشتیاران ب ڤی رەنگی دبیتە ئەگەرێ زێدەبوونا بنگەھێن گەشتیاری،
“ژبەرکو ساڵانە رێژا ھاتنا گەشتیاران بۆ جھێن گەشتیاری یێن پارێزگەھا دھۆکێ پترە، رێژا ڤەکرنا بنگەھێن گەشتیاری ژی ل سنوورێ پارێزگەھا دھۆکێ بەرەف زێدەبونێ نە، و ب تایبەتی ل سەر دەمێ ڤێ کابینا حکومەتا ھەرێما کوردستانێ کو ھەمی ئاسانکارییان دچارچووڤێ یاسایان دا بۆ وەبەرھێنەر و خۆدانێن بنگەھێن گەشتیاری پێشکێش دکەت بۆ ھندێ بەردەوام کەرتێ گەشت و گوزاری خورت ببیت”رێواری گوت.
ل سنوورێ پارێزگەھا دھۆکێ پتری ٩٠٠ بنگەھێن گەشتیاری ھەنە، و دئەڤ ساڵە دا ھەتا دویماھییا ھەیڤا ٧ زێدەتری ٦٠ بنگەھێن گەشتیاری ل سنوورێ پارێزگەھا دھۆکێ دخزمەتا گەشتیاران دا ھاتینە ڤەکرن، و ب ڤێ چەندێ ژی، سەدان دەلیڤێن کاری بۆ گەنجێن بێ کار ھاتینە پەیداکرن.