سەجا شێرزاد – دهۆک
دڤێ هەڤپەیڤینێ دا دگەل رۆژنامەیا هەولێر، موئەیەد تەیب شارەزایێ سیاسی، بەحس ل بارودوخێ سیاسی یێ عیراقێ دکەت هەر وەسا سەنگ و رولێ پارتی دیموکراتی کوردستان دمەشهەدێ سیاسی یێ عیراقێ دا ب گشتی وکارتێکرنا وێ دبریاردانێ دا.
- ٧٦ ساڵن پارتی دیموکراتی کوردستان ل ھەرێما کوردستانێ و عیراقێ بھێزترینە، چ نھێنییەک د ژدەست نەدا سەنگا پارتیێ دا ھەیە؟
- ل دەمێ ئەم بەحس ل ٧٦ ساڵان ژتەمەنێ پارتی دیموکراتی کوردستان دکەین، ئەم بەحس ل ٧٦ ساڵ ژدیروکا خۆ یا نوی و ھەڤچەرخ دکەین، ب ھەمی سەرکەفتن و سەروەری و کارەسات و شکەستن ڤە، پارتی دیموکراتی کوردستان وەکو حزبەک ئێک ژکەڤنترین پارتانە ل سەر ئاستێ ھەرێما کوردستان و عیراقێ، کو ھەتا نوکە سەنگا خۆ ژدەست نە دایە، و ل سەر ئاستێ ھەلبژارتنان دا، دەنگ و ژمارەیێن کوریسیێن وێ بەردەوام بلندن و یەکەمە ل سەر ئاستێ ھەرێمێ و ل سەر ئاستێ عیراقێ ژی ل پلەیێن دەسپێکێ یە، و ئەڤە ژی ل پلەییا ئێکێ بۆ کاریزمەیا سەرکردەیێ نەمر موستەفا بارزانی و ل دویف دا سەروک مەسعود بارزانی دزڤریت، کو ئەو کەسایەتیێن ب ھێز بووینە و بەردەوام ئەوان رولەکێ مەزن ددارشتنا پروسەیا سیاسی یا عیراقێ دا ھەبوویە.
- ل سەر ئاستێ ھەرێما کوردستانێ و عیراقێ دھەمی کەیس و کێشەیان دا حکوومەتا ھەرێمێ ب سەروکاتییا پارتیێ بەژدارە دچارەسەرکرنێ ودا، و دگەل ھەر ئاریشەیەکێ حکوومەتا عیراقێ قەستا ھەرێمێ دکەت؟
- سەروکێ پارتی دیموکراتی کوردستان مەسعورد بارزانی کەسایەتییەکا نافنەتەوەیی یە و پەیوەندیێن گەلەک بەرفرە ھەنە دگەل وەلاتێن ئەقلیمی و وەلاتێن دەرڤە و ب دەھان ساڵانە سەرکرداتییا پارتەکا مەزن و دێرین دکەت، و شورەش کرییە دیسان کەسەک راستگویە و جھێ باوەریێ یە ھەتا بۆ دوژمنێن خۆژی و ژگوتن و بریارێن خۆ لێ ڤەنەبوویە، ژلەوما ژی پێگەھەک مەزن دناڤا سونە و شیعەیان ژی دا ھەیە و جھێ رێزگرتنێ یە ھەتا بۆ ئەوان پارتێن ناکوکی دگەل پارتیێ ھەین، چونکە دزانن بێی سەروکی کێشە ناھێنە چارەسەرکرن و چ رێکەفتن ژی ناھێنە کرن.
- پترییا وەلاتێن جیھانی و یێن زل ھێز ژوانا، پارتی دیموکراتی کوردستان ب نوینەرێن کوردان دزانن و پترییا خەلکێ مە ژی دبینن نەمانا پارتیێ ئانکو لاوازبوونا کورداتیێ یە؟
- پشتی کەفتنا سەدامی سەروکێ بەرێ یێ عیراقێ، ھەردەم ھەلویستێن پارتیی یێن کوردینیێ بووینە و ئارمانجا وێ ئەوە مافێن گەلێ کورد وەکو نەتەوە ب پارێزیت و ئەڤ چەندە ژی بۆ ھەر کەسەکێ و لایەنەکێ دیارە، پارتی حزبە و حزباتیێ دکەت لێ بەری کو حزب بیت ئەوان کورداتی کرییە و بەردەوام بوویە ل سەر رێبازا کوردینیێ، دنوکەدا ل ھەرێمێ ژی چەندین حزب ھەنە لێ ب تنێ حزباتیێ دکەن لێ پارتی ھەردووکان دکەت حزباتیێ و کورداتیێ. و ب راستی ژی کێم پارت ھەنە ل جیھانێ کو دیرووکا وانا دگەل دیروکا نەتەوا وانا تێکەل ببیت.
- سەرەرای کو کوردستان ھەرێمە لێ پەیوەندیێن ھەرێما کوردستانێ دگەل وەلاتێن دەرڤە بەردەوام ب ھێز و خورتن و ئەو پەیوەندیێن ھەرێمێ دگەل وەڵاتان ھەین گەلەک ژوان عیراقێ ب دەستخۆڤە نە ئیناینە؟
-سەرەرایی کو کوردستان ھەرێمەکە دناڤا دەولەتەکێ دایە ئەو ژی عیراقە، لێ ئەگەر سەحکەینە پەیوەندیێن ھەرێمێ دگەل وەلاتێن دەرڤە، ھەرێما کوردستانێ ل پێش عیراقێ یە، و ھەر ئەڤە ژی بوویە کێشە بۆ عیراقێ، و بۆ خۆ ب بن کەفتن دبینن و ژلەوما ژی گەلەک جاران عیراق فشارێ ل ھەرێمێ کرییە چ ب رێیا بازرگانی یان گرتنا باڵەفرێن ھەرێمێ یان بوویە رێگر ژبۆ ھاتنا مێھڤان و شاندێن بیانی بۆ ھەرێمێ ھەتا ڤەکرنا کومپانیێن بیانی ل ھەرێمێ، ھەڤدەم ئەو ب سەر نەکەفتنیە پارتی دیموکراتی کوردستان پارتییەکا ب ھێزە و ژمارەیەکا گران و مەزنە دپرۆسەیا سیاسی دا.