لەمڕۆوە پڕکردنەوەی فۆڕمی دامەزراندن دەستپێدەکات
گوتەبێژی وەزارەتی کشتوکاڵی حکوومەتی ھەرێمی کوردستان گوتی، لەمڕۆوە پرۆسەی پڕکردنەوەی فۆڕم بۆ پێنج ھەزار کەس دەستپێدەکات و تاوەکو یەک مانگ بەردەوام دەبێت و مووچەی ھیچیان لە ٣٥٠ ھەزار دینار کەمتر نابێت.
حوسێن حەمە کەریم، بۆ ماڵپەڕی فەرمیی پارتی دیموکراتی کوردستان گوتی: “لەمڕۆوە پرۆسەی پڕکردنەوەی فۆڕمی دامەزراندن دەستپێدەکات و تاوەکو یەک مانگیش بەردەوام دەبێت و دواتر سەیری فۆرمەکان دەکرێت و لەدوای ئەوەی بزانین چەند پڕۆژە لە شارەکان ھەیە کە پێویستی بەسەرپەرشتیارە و بەپێی فۆڕم و خاڵەکان و دواتر کە دیاریکران دەچنە خول و تاقیکردنەوەیان پێدەکرێت و کێ لەو تاقیکردنەوانە دەربچێت خاڵەکانی زۆربوو ئەوان وەردەگیرێن.
گوتەبێژی وەزارەتی کشتوکاڵی حکوومەتی ھەرێمی کوردستان وتیشی: “ئەو کەسانە دەبنە سەرپەرشتیاری پڕۆژەکانی کەرتی تایبەت و ئەوەش کارکردنەکە بەپێی گرێبەستێک دەبێت، کە وەزارەت ئامادەی کردووە کە مافی پڕۆژە و سەرپەرشتیاران دەستەبەر بکرێت، کە مووچەیان نابێت لە ٣٥٠ ھەزار دینار کەمتر نەبێت و ئەوەی دیکەش بەپێی بڕوانامە و پسپۆری و لێھاتووی مووچەیان بۆ دیاری دەکرێت.
ناوبراو جەختیش دەکاتەوە: “ئەوانەی فۆرمەکە پڕدەکەنەوە پێویستە دەرچووی بەشەکانی کشتوکاڵ یاخود فێتەرنەری بن، کە ئەوەش خزمەتێکی باش بە ھاووڵاتیان دەکرێت، چونکە ئەم فۆرمەی پڕدەکرێتەوە بەخۆڕایی دابەش دەکرێتە سەر ئاستی فەرمانگە کشتوکاڵیەکانی ھەرێمی کوردستان.