ئه‌مڕۆ پێنجه‌م د.هەڤاڵ ئەبوبەکر پارێزگاری سلێمانی پێشوازی کرد لە ئەحمەد موفتی بریکاری وەزارەتی سامانە سروشتییەکان، لە کۆبوونەوەیەکدا گفتوگۆ لەسەر چۆنییەتی جێبەجێکردنی بڕیاری حکوومەتی هەرێمی کوردستان بۆ دابینکردنی بەنزینی نۆرماڵ بە نرخی 800 دینار بۆ لیترێک کرا.
لە کۆبوونەوەکەدا بڕیاردرا لە سبەینێ هه‌ینییه‌وه و بۆ هه‌موو ڕۆژێك له 33 بەنزینخانەی سنووری پارێزگای سلێمانی دەست بە دابەشکردنی بڕی زیاتر لە ملیۆنێک لیتر بەنزین بکرێت.
لە سەرەتای پڕۆسه‌كه‌دا ئەولەوییەت بە دابینکردنی بەنزین بۆ ئۆتۆمبێلی تەکسی و هێلی گواستنەوەی گشتی ده‌درێت و دواتریش هەموو ئۆتۆمبیلێک دەگرێتەوە.
هه‌روه‌ها بەڕێوەبەرێتی نەوت و کانزاکان و لیژنە هاوبەشەکانی قائیمقامییەتیش ڕاسپێردران بە چاودێریکردنی وردی قەبارە و کوالیتی و نرخ و دابەشکردنی بەسەر بەنزینخانەکاندا، بە شێوەیەک کە بە کوالیتی باش بگاتە دەستی هاووڵاتییان.
لە هەمان کاتیشدا جەخت لە هەموو کارئاسانییەکی کارگێڕی و دارایی و تەکنیکی بۆ هێنانی بەنزینی بازرگانیی لە دەرەوەی هەرێمی کوردستان لەلایەن بازرگانانەوە بە مەرجی پاراستنی کوالیتی کرایەوە.
به‌مه‌ش له سبه‌ی هه‌ینییه‌وه لەسەر بنەمای ژمارەی تاک و جووت دەست بە دابەشکردنی بە نزین دەکرێت لە تەواوی سنووری پارێزگای سلێمانی و دەوروبەریدا.