مه‌سرور بارزانی: داواتان لێده‌كه‌م نیشتمانپه‌روه‌ر و ژیان دۆست و ژینگه پارێز بن
ئەمڕۆ چوارشەممه 20ی تشرینی یەکەمی 2021، بە ئاماده‌بوونی مه‌سرور بارزانی، سه‌رۆكی حكوومه‌تی هه‌رێمی كوردستان، لە شاری هەولێر رێوڕەسمێک بۆ خه‌ڵاتكردنی قوتابییه یه‌كه‌مه‌كانی قۆناغی 12ی ئامادەیی لە هەرێمی کوردستان و ناوچە کوردستانییەکانی دەرەوەی ئیدارەی هەرێم بەڕێوە چوو، تێیدا سەرۆکی حکوومەتی هەرێمی کوردستان گوتارێکی پێشکەش کرد.
پوختەیەک لە گوتەکانی سەرۆکی حکوومەتی هەرێمی کوردستان:
• پیرۆزباییەكی گەرم لە ئێوەی ئازیز دەكەم بۆ دەرچوونتان و تەواوكردنی ئەم قۆناغە لە خوێندن بە پلەی یەكەم و دووەم و سێیەم لە سەر ئاستی كوردستان و ناوچە كوردستانییەكانی دەرەوەی ئیدارەی هەرێم.
• هیوادارم لە قۆناغەكانی دیكەش كە دەچنە زانكۆ، هەروا سەركەوتوو بن و ببن بە كەسی كاریگەر و سەركەوتوو بۆ كۆمەڵگەكەتان.
• زانست و خوێندن هێزە، چەند زیاتر خۆتان پێ بگەیەنن، چەند زیاتر خۆتان فێر بكەن، ئەوەندە كەسایەتییەكی بەهێزتر بۆ خۆتان دروست دەكەن و دەتوانن ببن بە كەسێكی كاریگەر بۆ كۆمەڵگەكەتان و وڵاتەكەتان.
• هیوادارم خوێندن تەنیا لە پێناو خوێندن نەبێت، بۆ ئەوە بێت وەكوو كەرەستەیەك خوێندن بەكار بهینن كە چۆن بتوانن كاریگەرییەكی زیاتر لەسەر پێشخستنی كۆمەڵگە و وڵاتەكەتان بكەن و وڵاتەكەتان ئاوەدانتر بكەن.
• ئێوە دەتوانن لە داهاتوودا ببن بە سەركردە و رێبەر و مامۆستای باش بۆ نەوەكانی دوای خۆشتان.
• من داواتان لێدەكەم لەم قۆناغە و لە قۆناغەكانی داهاتووشدا سێ شت لەبەرچاو بگرن، نیشتمانپەروەری و ژیاندۆستی و ژینگەدۆستی.
• نیشتمانپەروەر بن بۆ ئەوەی بتوانن وڵاتەكەی خۆتان بپارێزن و بنیادی بنێن و بەرەوپێشەوەی ببەن.
• ژیاندۆست بن بۆ ئەوەی یەكترتان خۆش بوێ و جیاوازییەكانی نێوان خۆتان قەبووڵ بكەن.
• ژینگەدۆست بن بۆ ئەوەی سرووشتی وڵاتەكەتان بپارێزن، ئاو و خاك و هەوای وڵاتەكەتان بە پاكی رابگرن. وڵاتێك دروست بكەن كە جێی سەرنجی نەك تەنیا خەڵكی كوردستان، بەڵكو گەشتیارانیش بێت تاوەكوو بێن ئەم سرووشتە جوانەی كوردستان لە نزیكەوە ببینن.
• سوپاسی هەموو ئەو فەرمانبەر و مامۆستا بەڕێزانە دەكەم كە بەردەوام بوون لە درێژەدان بە پرۆسەی خوێندن و دروستكردنی كەش و هەلومەرجێكی وا كە قوتابییەكان بەردەوام بن چ بە شێوەی ئۆنلاین یان بە شێوەی ئەلیكترۆنی و تەلەڤزیۆنی.
• خوێندنی ئەمڕۆ داهاتووی وڵاتەكەمان وێنا دەكات، توانای ئەمڕۆ هێزی داهاتووی وڵاتەكەمان پیشان دەدات.
• تكاتان لێ دەكەم ماسك ببەستن كە لە شوێنە گشتییەكاندا كۆدەبنەوە. بەستنی ماسك بۆ پاراستنی خۆتان گرنگە. ڤاكسین وەربگرن بۆ ئەوەی هەموومان بتوانین پێكەوە بە شێوەیەكی ئاسایی دەست بە كارەكانمان بكەینەوە.