هاودەنگ فارووق
ئەمڕۆ كە یادی ٨٠ ساڵەی دامەزراندنی پارتی دیموكراتی كوردستان و جەژنی لەدایكبوونی مەرجەعی باڵای گەلی كوردستان دەكەینەوە، نەوەیەکی نوێ هاتووەتە مەیدان؛ نەوەیەک، کە جیهان بە شێوەیەکی جیاواز دەبینێت؛ دنیای تۆڕە کۆمەڵایەتییەکان، زیرەکیی دەستکرد، میدیای دیجیتاڵ، ئابووریی ئازادو زانیاری و گۆڕانکارییە خێرا سیاسی و کۆمەڵایەتییەکان.
ئەم نەوەیە تەنها گوێ لە چیرۆکی شۆڕش و خەباتی ڕابردوو ناگرێت؛ بەڵکوو پرسیار دەکات کە ئایندەی کوردستان چۆن دەبێت و چۆن دەتوانین ئەو داهاتووە دروست بکەین؟ لەبەر ئەوە، ئەگەر ٨٠ ساڵی ڕابردوو بە بەرخودان و قوربانی ” یا كوردستان یا نەمان” ناسراوە، قۆناغی داهاتوو پێویستی بە تێكۆشانێكی نوێ هەیە؛ خەبات بۆ زانست و پەروەردە، بۆ ئابوورییەکی بەهێز، دامەزراوەیەکی کارا، یەکگرتوویی کۆمەڵایەتی و سیاسی، بەشداریی زیاتر و کاریگەرترى گەنجان و ژنان.
هاتنە پێشەوەی ئەم سەردەمە تازەیە، کە بە قۆناغی زیرەکی و خێرایی ناسراوە، ئەركی حیزبێکی گەورە و مێژوویی وەک پارتی نەک هەر کەم ناکاتەوە، بەڵکو چەندین هێندە قورستر و ئاڵۆزتر دەکات. بۆیە پێویستە لە ئاستی تاک، دامەزراوە و پلاندانانی پێشوەختەدا ئەم پرسیارە لە خۆمان بکەین:
چی بکەین پارتی لە سەردەمی نوێدا هەر پێشەنگ بێت و لە لووتکەدا بمێنێتەوە؟
بۆ پارتی نابێت پرسیار تەنها ئەوە بێت کە: “چۆن لە سەردەمی نوێدا بمێنینەوە؟”؛ بەڵکو بڵێین: چۆن لە لووتکەیەکەوە بۆ لووتکەیەکی بڵندتر پێگەیەكی نوێتر بڕۆین؟ چۆن بە میکانیزمی نوێ کۆمەڵگەی کوردستان بەڕێوە ببەین و ئەزموونی دەوڵەتداریی کورد دەوڵەمەندتر بکەین؟ چۆن وا بکەین گەنجان بەتایبەتی و هاووڵاتییان بە گشتی، ئینتیمایان بۆ خاک و نەتەوەی خۆیان زیاتر و بەهێزتر بێت؟
لە ژێر هەر یەکێک لەو پرسیارانەدا، چەندین بابەت و سێکتەری زیندوو و کاریگەر هەن. بە کردنەوە و لێکدانەوەی ئەو دۆسیانە، جیهانێکی نوێ دێتە بەردەستمان؛ جیهانێک کە بە هیچ شێوەیەک نابێت لێی بێخەم بین، چونکە پڕە لە ئاڵنگارییە نوێ و جیاوازەکان.
لە ٨٠ ساڵەی خەباتی پارتیدا، بە سوودوەرگرتن لە ڕێنماییەکانی سەرۆک بارزانی و لە کولتووری دەوڵەمەندی خەباتی ئەم حیزبە، گرەو لەسەر داهاتوو دەکەین؛ گرەو لەسەر بردنەوەی دڵی نەوەی نوێی ئەم نەتەوەیە دەکەین.
بۆ ئەمەش دەبێت بە سیاسەتی باش و دادپەروەری و زانیاری و تەكنەڵۆژیای سەردەم خۆمان پڕچەک بکەین و پلان دابنێین بۆ ئەوەی پارتی بە گەنجی، بە نوێبوونەوە و بە پێشەنگی بمێنێتەوە.
ڕاستیەكەی هەڵگرتنی باری قورسی سەرشانی پارتی و دواندنی نەوەی نوێی بە زمانی سەردەم و خۆگونجاندن لەگەڵ کولتوور و پێداویستییەکانی سەدەی ژیریی دەستكرد، پێویستییەکی سەرەکی و ئەولەویەتێکی پلەی یەکەمی بەردەم پارتییە.
٨٠ ساڵی ڕابردوو شانازییە؛ بەڵام ٨٠ ساڵی داهاتوو پێویستی بە ئامادەکارییە. نەوەی نوێ تەنها میراتگری مێژوو نییە؛ بەڵکوو دروستکەری داهاتووشە.
میراتگرانی ٨٠ ساڵە چۆن ئایندە دروست دەكەن؟
