هەوڵەکانی بۆ چارەکردنی گرفتی بەنزین و سووتەمەنی لە هەرێمی کوردستان، بەردەوامە و لەو پێناوەشدا، نوێنەرانی کورد لە بەغدا ناڕەزایی خۆیان لەبارەی بڕی سووتەمەنی دیاریکراو بۆ هەرێمی کوردستان گەیاندووەتە بەرپرسانی عێراق و داوای زیادکردنی دەکەن.
شاندێکی پەرلەمانی عێراق بە سەرۆکایەتی فەرهاد ئەتروشی سەردانی وەزیری نەوتیان کرد بە مەبەستی چارەسەرکردنی قەیرانی بەنزینی ئێستای هەرێمی کوردستان. لەو چوارچێوەیەدا، دانەر عەبدولغەفار رایگەیاند: “سەردانی وەزارەتی نەوتمان کرد و لەگەڵ وەزیری نەوت کۆبووینەوە، کێشەکە لای ئەوان روون بوو، کۆمەڵێک پێشنیازمان خستە بەردەمی و داوامان کرد بڕی نەوتی خاو کە ئێستا 50 هەزار بەرمیلە زیاد بکرێت، وەزیر رازی بوو بەڵام دەبێت سەرۆکوەزیرانی عێراق بڕیاری لەسەر بدات.”
دانەر عەبدولغەفار ئاماژەی بەوەش کرد، بۆ ئەم مەبەستە لە نووسینگەی جێگری سەرۆکی پەرلەمان، فەرهاد ئەتروشییەوە نووسراوێک ئاراستەی سەرۆکوەزیرانی عێراق دەکەن، تاوەکو بەگوێرەی رێککەوتنی نێوان حکوومەتی هەرێم و عێراق ئەو بڕە زیاد بکرێت.
لە لایەکی دیکەوە، سیپان شێروانی، ئەندامی لێژنەی نەوت و گاز لە پەرلەمانی عێراق رایگەیاند: “هۆکاری قەیرانی بەنزین لە هەرێمی کوردستان بۆ ئەوە دەگەڕێتەوە کە لە رێککەوتنی نێوان هەرێم و بەغدا، بڕی ئەو بەشەی بۆ بەکارهێنانی ناوخۆیی هەرێمی کوردستان دیاری کراوە تەنیا 50 هەزار بەرمیلە، ئەمە لە کاتێکدایە عێراق زیاتر لە یەک ملیۆن بەرمیل نەوت بۆ پارێزگاکانی دیکە بەکاردەهێنێت.”
سیپان شێروانی گوتیشی: “بە وەزیری نەوتمان راگەیاند کە پێویستە پێوەرێکی دادپەروەرانە هەبێت، چ لەسەر بنەمای رێژەی دانیشتووان بێت کە هەرێمی کوردستان 14%ی دانیشتووانی عێراق پێکدەهێنێت، یان لەسەر بنەمای ژمارەی ئۆتۆمبێل و بەکارهێنانی رۆژانە. ئێمە ئامادەین بۆ هەر پێوەرێک کە دادپەروەری تێدا بێت.” ئەو ئەندامەی لێژنەی نەوت و گاز جەختی کردەوە، کە ئەو بڕەی پێویستە بدرێتە هەرێمی کوردستان بۆ چارەسەری کێشەکە 140 هەزار بەرمیل نەوتی خاوە، چونکە “ئەگەر بڕی بەنزینی حکوومی زیاتر بێت، ئەوا نرخەکەی هەرزان دەبێت و بەمەش خواست لەسەر بەنزینی بازرگانی (تیجاری) کەم دەبێتەوە و بە شێوەیەکی ئۆتۆماتیکی نرخی بەنزینی بازرگانیش کەمدەبێتەوە.”