حکوومەتی هەرێمی کوردستان ڕایگەیاند کە لە ڕێگەی پڕۆژەی ستراتیژیی “ڕووناکی”یەوە توانیویانە کۆتایی بە کێشەی لەمێژینەی کەموبکورتیی کارەبا لە هەرێمەکەدا بهێنن. بەرپرسانی حکوومەت ئاماژە بەوە دەکەن کە ئەم پڕۆژەیە، کە ئامانجی دابینکردنی کارەبای 24 کاتژمێرییە، توانیویەتی ڕەزامەندییەکی فراوانی هاووڵاتییان بەدەست بهێنێت و یەکێک لە ئاڵۆزترین گرفتە خزمەتگوزارییەکانی چەند دەیەی ڕابردوو چارەسەر بکات. ئەم پڕۆژەیە کە لە چوارچێوەی چاکسازییەکانی کابینەی نۆیەمدایە، بە یەکێک لە دەستکەوتە هەرە گرنگەکان دادەنرێت بۆ ڕێکخستنەوەی ژێرخانی وزە و کەمکردنەوەی تێچووی مانگانەی ماڵان. بەپێی ئامارەکانی وەزارەتی کارەبا، پڕۆژەی ڕووناکی توانیویەتی هاووڵاتییان لە پشتبەستن بە مۆلیدە ئەهلییەکان ڕزگار بکات، کە ساڵانێکی زۆر بارگرانییەکی دارایی و ژینگەیی گەورە بوو لەسەر شانی گەڕەک و کۆڵانەکان. ئامانجی ستراتیژیی ئەم دەسپێشخەرییە ئەوەیە کە تاوەکو کۆتایی ساڵی 2026، تەواوی ناوچەکانی کوردستان ببنە خاوەن کارەبای 24 کاتژمێریی بەردەوام. حکوومەتی هەرێم جەخت دەکاتەوە کە سەرکەوتنی ئەم پڕۆژەیە نەک هەر خزمەتگوزارییەکی بنەڕەتی بۆ ماڵان دابین دەکات، بەڵکو دەبێتە هۆی بوژانەوەی کەرتی پیشەسازی و بازرگانیش، کە پێشتر بەهۆی پچڕانی بەردەوامی تەزووی کارەباوە ڕووبەڕووی ئاستەنگی گەورە بوبوونەوە.
حکوومەتی هەرێم: بە پڕۆژەی “ڕووناکی” کۆتایی بە کێشەی کارەبا هات
