شەهلا ڕێکانی
سەرکردایەتیکرن د سەدێ بیست و ئێکێ دا ب تنێ وەک چەمکەکێ کارگێری ناهێتە پێناسە کرن، بەلکو وەک هێزەکا کاریگەر بۆ دارشتنا پاشەڕۆژا جڤاکان دهێتە نیاسین. ل ڤێرە ئافرەت وەک ستوینەکا سەرەکی یا ڤێ پرۆسەیێ دهێتە دیتن، کو شیانێن وێ د رێڤەبرن و بڕیاردانێ دا سەلماندییە کو سەرکردایەتی نە ڕەگەزە، بەلکو لێهاتن و ئیرادەیە، ئانکو ئەو ئەزمون و پێشەنگیا ئافرەتان د بیاڤێن ڕێڤەبرن و بڕیاردانێ دا نیشان دای، ئەو ڕاستییە سەلماند کو سەرکردایەتی چو جاران مۆرکەکا ڕەگەزی نەبوویە، بەلکو بەرهەمێ لێهاتن، شارەزایی و ئیرادەیەکا پۆڵایینە، ژن خودان هێز و کۆڵنەدان و ئازایەتییەکا وەسا مەزنە کو چ ئاستەنگێن جڤاکی یان دژواریێن ژیانێ نەشێن وێ ژ کاروانێ سەرکەفتنێ پاش بێخن.
د جیهانا ئەڤرۆدا، سەرکردایەتیکرن تنێ پلە و پۆست نینە، بەلکو شیانە بۆ کارتێکرنێ و چێکرنا گوهۆڕینێن ئەرێنی، ئافرەتا سەرکردە، نمونەیا بلند یا ژیری و دلسۆزیێ یە، کو دشێت ب حیکمەت و دیتنەکا ڕون، جڤاکی یان سازیان بەر ب سەرکەفتنێ ببەت.
* تایبەتمەندیێن ئافرەتا سەرکردە:
ئافرەتێن سەرکردە ب هندەک خالێن گەوهەری دهێنە نیاسین، ژ وان ژی:
ژیرییا سۆزداری: شیانەکا مەزن د نیاسین و ڕێڤەبرنا سۆزان دا هەیە کو ئەڤە دبیتە ئەگەرێ تێگەهشتنا پێدڤیێن تیمێ.
پەیوەندیێن ب هێز: یا خودان شیانە د گەهاندنا پەیامان دا ب ڕەنگەکێ ڕوون و کاریگەر.
خۆڕاگری و بەردەوامی: د ناڤ تەنگاڤی و کێشەیان دا، ب ئارامی و هێز بەرهنگاری ئاستەنگان دبیت.
دادپەروەری: دناڤبەرا ئەندامێن تیمێ دا جوداهیێ ناهێلیت و پشتەڤانییا خودان شیانان دکەت.
مەرجێن سەرکردایەتیکرنێ:
بۆ هندێ هەر ئافرەتەک ببیتە سەرکردە، پێدڤی ب هندەک بنەمایان هەیە:
– باوەری بخۆ هەبیت، خودان بڕیار بیت و ژ بەرپرسیاریەتێ نەترسیت.
– پێدڤییە د بوارێ کارێ خۆ دا، بەردەوام یا نویخواز و فێرخواز بیت.
– پلانێن دویر مەودا هەبن، نەک تنێ نقۆمبون دناڤ ئەرکێن ڕۆژانە یێن بچووک دا.
پشتەڤانیکرن و پێشخستنا ڕۆلێ ئافرەتێ د ناڤەندێن بڕیاردان و سەرکردایەتیێ دا، تنێ دۆزەکا هەڤسەنگیێ یان پشتەڤانیکرنا ڕەگەزەکێ نینە، بەلکو پێدڤییەکا حەتمی، نیشتمانی و جڤاکییە بۆ ئاڤاکرنا جڤاکەکێ پێشکەفتی، دیمۆکرات و دادپەروەر. ئەو جڤاکێ بڤێت بەر ب گەشەپێدانا بەردەوام پێنگاڤان بهاڤێژیت، نابیت شیانێن نیڤا جڤاکی پشتگوهـ بێخیت. ئافرەتا سەرکردە، ب ئیرادە و هێز و دیتنا خۆ یا بەرفرەهـ، دێ هەر وەک ستوینا سەرەکی یا گوهۆڕین و نویژەنکرنا جڤاکی مینیت.