سلوی سەعید
شۆڕەشا ٢٦ێ گولانێ (١٩٧٦) شۆڕشەکا نەتەوەیی و بەردەوامییا شۆڕەشا ئەیلوولێ بوو. پاش نسکۆیا ١٩٧٥ێ ب ڕێبەرایەتییا پارتی هەڵگیرساڤە، داکو بسەلمینیت کو ئیرادەیا گەلێ کورد بۆ ئازادیێ تەسلیم نەبوویە. خەباتا ئافرەتێ د ناڤبەرا باژێڕ و گوندی دا د شۆڕەشا ٢٦ێ گولانێ دا، تەنێ لاپەڕەکێ سادە یێ دیرۆکێ یان پشکداریەکا دەمکی نەبوو، بەلکو ئاڤاکرنا کۆلەکەکا سەرەکی یا مان و بەردەوامبوونا نەتەوەیی بوو. وێ ب خوین، فرمێسک و ناسۆریێن خۆ، مێژوویا ڕزگاریخوازییا گەلێ خۆ ژ بنبڕبوونێ پاراست.
بەڕێز (نەزیر حەسەن) بۆ “هێلین میدیا” گۆت: “رۆڵێ ئافرەتا کورد د شۆڕەشا گولانێ دا، نە تەنێ پشتەڤانی بوو، بەلکو ئەو بخۆ سەرکێشا قۆناغەکا سەخت یا خەباتێ بوو. نرخاندنا جەنابێ سەرۆک بارزانی و سەرکردایەتییا کوردستانێ بۆ ڤی رۆڵی، ل سەر بنەمایێ وێ ڕاستیێ یە کو ئافرەت شریکەکا ڕاستەقینە یا سەرکەفتن و ڕزگارییا گەلێ کوردستانێ یە، و دیرۆکا وان جهێ شانازییا هەر کوردەکی یە.”
رۆڵێ ئافرەتێ د شۆڕەشا گولانێ دا، تەنێ گێڕانەوەیا مێژوویێ نینە، بەلکو دانپێدانانە ب ڤێ ڕاستییێ کو ئافرەتا کورد هەوێنێ مان و بەردەوامییا شۆڕەشێ بوو. وێ ب خوین، ئەشکەنجە و پەروەردەکرنا نەوەیەکێ کوردپەروەر، پشتا سەنگەرێن پێشمەرگەی پاراست. لەوما، ئەو پێگەهێ بلندێ ئافرەتێ و ئەو نرخاندنا جەنابێ سەرۆک بارزانی بۆ دکەت، دەرئەنجامێ ڕاستەقینە یێ وێ مێژوویا پڕی شانازی یە، کو پێدڤییە وەک قوتابخانەکا نیشتمانی بۆ نەوەیێن داهاتوو بهێتە پاراستن.
هەروەسا ل دۆر هەمان مژار، خانم (ئیلهام ڕەمەزان)، بەرپرسا پشکا جڤاکی، گۆت:
“ئەز وەک ئافرەتەکا کورد دبێژم؛ ئەگەر چەکێ پێشمەرگەی ل سەر چیایی هێمایا شۆڕەشێ بووبیت، هەڵگرتنا بارێ گران یێ مالێ ب بێ زەلام، خودانکرن و پەروەردەکرنا زارۆکان ل بن سێبەرا ترس و بۆردۆمانان، و چاندنا تۆڤێ کوردایەتیێ د مێشکێ وان دا، شۆڕەشا هەرە مەزن یا ئافرەتێ بوو.”
باجا ڤێ هشیاریێ گەلەک گران بوو؛ ئەشکەنجە، زیندان و گرتن بوونە پشکەک ژ ژیانا ڕۆژانە یا ئافرەتێ. شەهیدبوونا پڕی شکۆ یا دایکا قارهمان (قومری ئیسماعیل) و کۆڕێ وێ ل سەر سێدارێ، ڕامانەکا کوور یا فیداکاریێ دایە مە. وێ ب چوونە ل سەر سێدارێ، سەلماند کو ژیان ل ڤێ خاکێ دا بێ ئازادی چ ڕامان بۆ نینە.