جنوب ئیسماعیل
د سەردەمێ ئەڤرۆ دا، بەرپرسیارەتیێن ئافرەتێ ئێدی د ئێک ڕۆلی بتنێ دا ناهێنە سنووردارکرن وەک بەری نوکە، بەلکو بەرپرسیارەتیێن وێ زێدەتر و ئارمانجێن وێ مەزنتر بوونە. ئەڤ گوهۆڕینە ژی بۆ گەلەک ئەگەران دزڤڕیت، وەک گوهۆڕینا دابونەریتێن جڤاکی و عەقلیەتا گشتی. ئەڤێ چەندێ ژی و کریە کو ئافرەت پتر باوەریێ ب کەسایەتیا خوە بینیت و هەست ب هەبوونا خوە بکەت. نها مل ب ملێ ڕەگەزێ بەرامبەر کار دکەت و ب هێز دهێتە د ناڤا جڤاکێ دا، بوویە پشکەکا گرنگ د پێشڤەبرنا وی دا و ڕۆلەکێ وەسا دگێڕیت کو ئێدی جڤاک نەشێت ژێ دەستبەردار بیت.
جاران، بارا پتر یا ئافرەتان دکەفتە د ناڤبەرا دوو بژاردەیان دا: یان دڤیابا د کاری دا سەرکەفتی بیت، یان ژی دڤیابا خێزان و ژیانا خوە یا کەسی هەلبژێریت. گەلەک جاران بۆ سەرکەفتنێ د ڕۆلەکێ دا، پێدڤی بوو یێ دی بکەتە قوربانی. لێ ئافرەتا ئەڤرۆ، حەتا ڕاددەیەکی باش، ئەڤ بەند و قەید شکاندینە و بوویە نموونەیەکا سەرکەفتی. نها ئەو دشێت هەم د ئەرک و ئارمانجێن خوە یێن پیشەیی دا سەرکەفتی بیت و هەم ژی خێزانەکا مکم و ئارمانجدار ئاڤا بکەت.
ڕاستە، دبیت گەلەک جاران ئافرەتا خێزاندار پێدڤی ببیت پچەکێ ل ڕۆلەکێ خوە پاشڤە بمینیت، دا کو هەڤسەنگیێ د ڕۆلێ خوە یێ دووێ دا بپارێزیت. ئەڤە دبیت و بکەت کو ب تایبەت بەرامبەر ڕەگەزێ دی پچەکێ گیرۆ ببیت. لێ ئەڤ گیرۆبوونە نیشانا شکەستنێ نینە؛ بەلکو ستراتیژییەکە بۆ سەرکەفتنێ. کورتکرن د ڕۆلەکێ دا بۆ تەمامکرنا ڕۆلەکێ دی، ب خوە سەرکەفتنەکا گەلەک مەزنە کو ئافرەت ب دەستڤە دئینیت.
ژ بەر هندێ یە بەردەوام دهێتە گۆتن: “ئافرەت نیڤا جڤاکی یە و نیڤا دی پەروەردە دکەت”. هەڤسەنگی ئەو خالا جەوهەری یە یا ئافرەت خوە تێدا دبینیت. پاراستنا ڤێ هەڤسەنگیێ ئەرکەکێ قورسە، لێ د هەمان دەم دا گەلەک ب بهایە. چونکی ئافرەتا بهێز، ئافرەتەکا هەڤسەنگە؛ و ئافرەتا هەڤسەنگ، ئافرەتەکا سەرکەفتی و دلخۆشە.