هونەرمەندێ باژێڕێ زاخۆ هاشم بۆسەلی د دیدارەکێ دا بۆ ڕۆژناما “هەولێر” دیار کر کو هەر ل ژیێ زاڕۆکینیێ حەزا ستران گۆتنێ ل دەف من پەیدا بوو، لێ ل سالا ١٩٩٢ ل کەمپا دیاربەکرێ من دەست ب گۆتنا سترانێن شەهیانان کر، ژبەرکو بەردەوام ل کەمپێ کۆچك و دیوان و شەڤبێری لێ هەبوون، ئو گەلەك هونەرمەندان سترانێن فۆلکلۆری د گۆتن وەکو عەبدولستار بۆسەلی و ئسکەندەر گولی و نایف گولی و فەریق ئێکمالەیی و حەکیم نزووری، ئەز ژی ل گەل وان بەرهەڤ دبووم و من گۆهداریا سترانێن وان دکر، لەوما ڤێ چەندێ حەزا گۆتنا سترانێن فۆلکلۆری ل دەف من پەیدا کر، چونکی بنیاتێ هەمی سترانان فۆلکلۆرە.
هونەرمەندێ ناڤهاتی، ئاماژە ب وێ چەندێ ژی کر کو پشتی من ستران ل کۆچك و دیوان و شەڤبێرییان گۆتین، ئو دەنگێ من دەنگڤەدا و خەلکێ گەلەك حەز ژێ کر، ئو دوست و هەڤالان ژی پشتەڤانیا من کر، هینگێ گەلەك ڕێگر ژی هەبوون کو مالا مە و نێزیکێن مە نە دڤیان ئەز سترانان بێژم، لێ من ئەڤ سنوورە بەزاند، ئو مە دەست پێکر ل کۆچك و دیوانان و من خوە گەهاندنە دەنگبێژان، ئو من گۆهداریا محەمەد عارفێ جزیری و سەعید گاباری و ڕەمەزان مەلا سمایل بۆسەلی و ئسکەندەر گولی و عەبدولستار ستار بۆسەلی دکر، ئو ئێك هەبوو مامۆستا و قوتابخانە بوو ژ بۆ من و گەلەك هونەرمەندان ئەو ژی حەجی مووسا بلکی بوو، دشیا حەفت و ڕۆژ و حەفت شەڤان بێ دووبارە سترانان بێژیت، من گەلەك حەز ژ دەنگێ وی و سترانێن وی دکرن، ئەز بەردەوام بووم هەتا کو من سەرکەفتن ئینایی، زێدەباری ستران گۆتنێ ژی من چەندین بەڕنامێن فۆلکلۆری ل کەنالێن ناڤخۆیی و ئاسمانی پێشکێش کرینە، د نوکە دا ئەز و دژوار ڕەزیکی پێکڤە بەرنامەکێ فۆلکلۆری بناڤێ پەسار ل کەنالێ وار پێشکێش دکەین.
هاشم بۆسەلی گۆت:”هەر سترانەكا فۆلکلۆری چیڕۆك و سەرهاتی و ڕوودانەکا ژیواری یا ل پشت هەی، ئو چیرۆك و سەرهاتیا سترانێن فۆلکلۆری ناهێتە گۆهۆڕین، بتنێ هندەك گۆهوڕینێن بچووك یێن هەین کو ژ دەڤەرەکێ بۆ دەڤەرەکا دی شێوێ گۆتنێ یا جیاوازە، ئو هەر دەڤەرەکێ تاما خوە یا جودا هەیە، ئو خەلکێ بیانی ئەم وەکو کورد یێ ب فۆلکلۆرێ مە و سترانێن فۆلکلۆری نیاسینە، سترانێن فۆلکلۆری کارتێکرنەکا مەزن ل سەر خەلکێ هەیە، چونکی من یا گۆهـ لێ بوویی کو هندەك کەسان یا گۆتی دەمێ ئەم تۆڕە دبین، ئەم گۆهداریا سترانێن فۆلکلۆری دکەین چونکی ئەم پێ ئارام دبین و تویڕەبوونا مە دهێتە خوار، ل کۆچك و دیوان و شەڤبێرییان هندەك کەس بێزار دبن یان خەم و ئاریشە یێن هەین، لێ ئەگەر مرۆڤ سترانێن ب دلێ وان بێژیت دێ ژ وی سەقایی دەرکەڤن و دێ مێشکێ وان ئارام بیت و سەبرێ وان هێت”.
گۆت ژی:”گەلەك چەق ژ فۆلکلۆری دچن وەکو ستران و سەرهاتی و چیڕۆك و حەیرانۆك و مەتەلۆك و پایزۆك و گۆتنێن مەزنان، هەر چەندە ئەز حەز ژ هەمی جۆران دکەم، لێ من پتر شارەزایی و حەز و ڤیان یا بۆ سترانێن فۆلکلۆری و حەیرانۆکان هەی، ل ڤان سالێن دوماهیێ خەلك گەلەك گرنگیێ ب سترانێن فۆلکلۆری ددەن، ئو حەز دکەن بەردەوام ل کۆچك و دیوان و شەڤبێری و شەهیانێن وان سترانێن فۆلکلۆری بهێنە گۆتن، ئو گەنجێن مە پتر حەز ژ سترانێن فۆلکلۆری دکەن، چونکی ئەو دزانن سترانا هەڤچەرخ یا دەمەکییە و زوو دمریت، لێ سترانا فۆلکلۆر یا ژ باب و باپیران بۆ مە مایی و یا نەمرە”.
زێدەتر ژی گۆت: “ل سالا ٢٠٠٩ـێ من سترانەکا فۆلکلۆری کلیپ کر بناڤێ لۆلۆ میرۆ کو ب بەدرخان بەگێ میرێ جزیرا بۆتان هاتیە گۆتن، هەتا نوکە نێزیکی ملیۆنەك و ٥٠٠هزار کەسان ل یۆتیوبێ کەنالێ ڤین تیڤی تەماشەیی وێ کلیپێ کرییە، ئو پشتی هینگێ من چەندین سترانێن دی ژی تۆمار کرینە و کلیپ کرینە، ئو ل داهاتی ژی من ل بەرە ب هەڤکاریا مامۆستا قادر قەچاخی، داستان و بەندێن سترانا لەعلی خانێ و هەسامی و سترانا شاهینی و مێموکێ ب تەمامی ب شێوێ دوو قۆلی لگەل سترانبێژەکا دەنگ خوەش یا ژن تۆمار بکەم، ئو ئەز بەندا زەلامی بێژم و ئەو بەندا ژنێ بێژیت”.
د .دلۆڤان هاڵۆ – زاخۆ