تیپا ڕۆژ یا ستران و مۆزیکێ ل سالا ٢٠١٢ـێ ل ئیدارەیا سەربخوە یا زاخۆ هاتیە دامەزراندن، ئو ل سالا ٢٠٢٣ـێ دەست ب مۆزیکا گەڕۆك کرییە ل کۆڕنیشێ پرا دەلال و سیکا تاری، ل ڕۆژێن پێنج شەمب و ئەینییێ دەست ب ژەنینا مۆزیکێ و ستران گۆتنێ دکەن، بڤێ چەندێ دیمەنەکێ جوانتر دایە کۆڕنیشێ پرا دەلال.
حسێن پیرۆ، بەرپڕسێ تیپا ڕۆژ یا ستران و مۆزیکێ ل زاخۆ بۆ ڕۆژناما “هەولێر” دیار کر کو پشتی کۆڕنیشێ پرا دەلال و سیکا تاری هاتیە ڤەکرن، مە پێ باش بوو ل وان جهان مۆزیکا گەڕۆك دەست پێ بکەین، ئو پشتی جارەکێ مە دەستپێکری ڕەنگڤەدانەکا باش ل تۆڕێن جڤاکی هەبوو، ئو مە دیت خەلکێ ئەڤ کارێ مە پێ باش بوو، لەوما ئەم بەردەوام بووین، پشتی هینگێ ئیدارەیا سەربخوە یا زاخۆ و ڕێڤەبەرییا ڕەوشەنبیری و هونەری یا زاخۆ پشتەڤانیا مە یا ماددی و مەعنەوی کرن.
ناڤهاتی ئاماژە ب وێ چەندێ ژی کر کو پشتی مە دەست ب کارگێرییا تیپێ کری مە دوو پەیام هەبوون کو یا ئێکێ کارەکێ بکەین کو ژبەری نوکە نە هاتبیتە کرن داکو بشێن جیاواز تر بین، یا دووێ ژی دانانا مۆزیکا گەڕۆك کو ل هەموو جیهانێ هەیە، مە دیت زاخۆ ژی گۆنجایە بۆ ڤێ مۆزیکا گەڕۆك کو جهێن تایبەت و گەشتیاری هەنە و گەشتیارێن بیانی سەرەدانا باژێڕی دکەن، ئو ئارمانجا مە بڤێ چەندێ ئەوە کو ئەم ڕوویەکێ هونەری یێ جوان یێ باژێڕێ زاخۆ نیشا گەشتیاران بدەین.
گۆت ژی: “خەلك ئەگەرێ بەردەوامیا کارێ مە بوو، ب تایبەت خەلکێ زاخۆ پسیارا مە دکرن کو هوون دێ ڤێ حەفتییێ ل کیڤە بن، لەوما مە هەست پێ کر کو خەلکێ زاخۆ تێهنیێ ڤی جۆرێ مۆزیکا گەڕۆکە، ئو ئەگەر پشتەڤانی هەبیت ئەم دشێن وەکو کەمپینەکا مۆزیکا گەڕۆك بۆ دەمێ حەفتیەکێ بچینە هەمی باژێڕێن کوردستانێ”.
زێدەتر ژی گۆت: “تیپا ڕۆژ ئێکەم تیپە کۆ بشێت بەردەوامیێ ب مۆزیکا گەڕۆك بدەت و پتری ٤٠ کەسان د ڤێ تیپێ دا ئەندامن کو پێك دهێن ژ کۆڕ و کچێن موسلمان و مەسیحی و ئێزدی، زێدەباری دەستەکا کارگێری کو ژ پێنج کەسان پێك دهێت، پێشتر ڕێژا مۆزیکژەنان ل سەر دەپێ شانوویێ ل زاخۆ کێم بوو، لێ پشتی تیپا ڕۆژ هاتی ئەو ڕێژە زێدە بوو، دیسان مە شیایە دوو مۆزیکژەنێن ئامیرێن نوو یێن کلارنێت و قانوونێ ژی ل زاخۆ زێدە بکەین کو پێشتر نەبوون، ئو پشکداریکرنا کچێن سترانبێژ دناڤ تیپا مە دا”.ڕ.دلۆڤان هاڵۆ – زاخۆ