موسا ئەحمەد، سەرۆکی دەزگای خێرخوازیی بارزانی، ڕایگەیاند؛ لەم قۆناخەدا، هاوکاریی پێشکەشکی 541 خێزانی زەرەرمەندی شاری هەولێر دەکرێت؛ هاوکارییەکان دەگەیەنرێنە 300 خێزانی هەردوو گەڕەکی سێبەردان و شێخ ئەحمەد و لە چەند رۆژی داهاتووش، 241 خێزانی دیکە هاوکاریی دەکرێن.
دوێنێ، موسا ئەحمەد، سەرۆکی دەزگای خێرخوازیی بارزانی، لە کۆنگرەیەکی ڕۆژنامەوانیدا، هاوکارییەکانی دەزگای خێرخوازیی بارزانی بۆ زیانلێکەوتووانی شاری هەولێر ڕاگەیاند و ئاماژەی بەوە کرد، 15 تیمیان لە یەکەم ساتەوەختی روودانی لافاوەکەوە، بە هاوکاری لەگەڵ تیمەکانی حکوومەتی هەرێمی کوردستان، دەستیان بە کارەکانیان کردووە و زیاتر لە 1447 شوێنیان تۆمارکردووە کە زەرەرمەند ببوون.
سەرۆکی دەزگای خێرخوازیی بارزانی باسی لەوەش کرد، 100 لیتر نەوت بۆ هەر خێزانێکی زەرەرمەند دەدرێت و هەوڵدەدرێت ئەم هاوکارییە پێش هاتنی سەرمای زستان بگاتە دەستی لێقەوماوان. هەروەها، بۆ هەر خێزانێک بڕی دوو فەرش و بەتانی و دۆشەک و پێداویستیی دیکەی وەک خۆراک، سوپا و شیری منداڵان دابین دەکرێت.
ڕۆژی ٥ی تشرینی دووەم شەپۆلێکی بەهێزی باران ناوچەکانی هەرێمی کوردستانی گرتەوە و شەوی شەممە، 7ی تشرینی دووەم گەیشتە لووتکە. بارینی بڕێکی یەکجار زۆری باران لە ماوەیەکی کورتدا بووە هۆی دروستبوونی لافاو لە چەندین گەڕەک و شەقامی شاری هەولێر.