دەرهاوێشتەکانی سەردانەکەی سەرۆکی حکوومەتی هەرێمی کوردستان بۆ واشنتن

عارف ڕوشدی

لە هەڵساندنێکی سیاسی وردبیندا، بومان دیاردەبێت دەرهاوێشتەی ئەرێنی سەردانەکەی سەرۆکی حکوومەتی هەرێمی کوردستان، مەسرور بارزانی بۆ واشنتن لە ماوەی (٢٦/ ٢/ – ٢/ ٣ی / ٢٠٢٤) دا، بە زەقی لە دید و بۆچوونەکانی سەرۆک بایدن و بەرپرسانی دیکەی ئەمریکادا لە چوارچێوەی کارنامەی سەردانی سەرۆک وەزیرانی عێراقیدا ڕەنگدانەوەی خۆیان هەیە، بۆ سەلماندی ئەو ڕاستییە، لە ڕاگەیاندراوی کۆبوونەوەی تایبەتی بایدن و سودانی، کۆبوونەوەکانی وەزیر و بەرپرسانی پێنتاگون و ڕاوێژکاری ئاسایشی ئەمریکاشدا بە ڕون و ئاشکرا، جەختکراوەتەوە، لەسەر گرنگی و پێویستی چارەسەرکردنی کێشە هەڵپەسێردراوەکانی (سیاسی، ئابوری و ئەمنی) نێوان هەرێمی کوردستان و بەغدادا بە ڕەچاوکردنی بنەمادەستورییەکان، هەروەها سەقامگیری و پێشکەوتنی پەیوەندییەکانی نێوان هەر دوو حکوومەتدا وەک بەردی بناغەی هەبوونی عیراقێکی خاوەن سیستمی فیدراڵی و دیموکرتدا دەنرخێنن .
لە بارەی هەڵبژاردنەکانی پارلەمانی کوردستانەوە: خودی سەرۆک بایدن لە کۆبوونەوەکەیدا ڕاشکاوانە پێداگیری کردووە لە سەر پیادەکردنی پرۆسەیەکی هەڵبژاردنی ( دادپەروەر، پاک، ڕون و ئازاد)دا،(دوور لە هەر دەستوەردانێک) بۆ ئەوەی دەنگدەران ئازادانە بتوانن پارلەمانی کوردستان سەر لە نوێ دامەزرێننەوە، ئەم هەڵوێستانە خۆی لە خۆیدا هاوتەریبی هەڵوێستی تەندروستی سەرۆک بارزانی و پارتی دیموکراتی کوردستانن لەلایەک و نیشاندانی بە هێزی و هەستیاری پێگەی سیاسی، جیۆپۆلیتیکی و پێشکەوتنی دیبلۆماسییەتی کارای هەرێمی کوردستانن لە لایەکی دیکەوە.