ئێوارەی ئەمرۆ چوارشەممە 22ی تەممووزی 2026، بە ئامادەبوونی د.سامان بەرزنجی، وەزیری تەندروستی و ئومێد خۆشناو، پارێزگاری هەولێر و د.سالار عوسمان، بەرپرسی بەشی ڕۆشنبیری و ڕاگەیاندنی پارتی و موسا ئەحمەد، سەرۆکی دەزگای خێرخوازی بارزانی و ژمارەیەکی تر لە بەرپرسانی حزبی، حکومی، کەسایەتییە نیشتمانییەکان و خانەوادەی سەربەرزی شەهیدان و ئەنفالکراوان، بەشی ڕۆشنبیری و ڕاگەیاندنی پارتی ڕێوڕەسمێکی تایبەتی بۆ نمایشکردنی فیلمی بەڵگەنامەیی (عەرعەر و سەگەکانی عەجاج) ساز كرد.
ئەم بەڵگەفیلمە مێژووییە، کە لەلایەن تۆڕی میدیایی کوردستان (KMN) بەرهەم هێنراوە و لەلایەن ڕۆژنامەنووس (محەمەد حاجی قادر)ئامادەکراوە، تیشک دەخاتە سەر لاپەڕە تاریکەکانی تاوانەکانی ئەنفال و جینۆسایدی گەلی کوردستان، وەک بەڵگەیەکی زیندوو بۆ ناساندنی زیاتری ئەو کارەساتە مرۆییانە بە نەوەی نوێ و کۆمەڵگەی نێودەوڵەتی.
بەرنامەی ڕێوڕەسمەکە چەندین بڕگەی گرنگ و فەرمی لەخۆگرتبوو، وەك پێشکەشکردنی چەند گوتارێکی فەرمی و نیشتمانی، پەیقین، پێشکەشکردنی ڕێزلێنان و گوڵی وەفا. هەروەها لەم بۆنە نیشتمانییەدا، بە شکۆوە ڕێز لە پارێزەری داکۆکیکاری کەیسی ئەنفال و ئەو سکاڵاکارانە گیرا كە ڕۆڵی سەرەکی هەبوو لە دەستگیرکردنی تاوانبار عەجاج.