ئەمڕۆ سێشەممە 2024.11.26، لەسەر بانگهێشتى وەزیرى بازرگانى وڵاتى تورکیا، شاندێکى هەرێمى کوردستان، کە پێکهاتبوو لە ئانۆ جەوهەر، وەزیرى گواستنەوە و ئومێد خۆشناو، پارێزگارى هەولێر وئایدن مەعروف، وەزیرى هەرێم بۆ کاروبارى پێکهاتەکان و بریکارى وەزارەتى بازرگانى و سەرۆک و ئەندامانى ژوورە بازرگانییەکانى هەولێر و سلێمانى، بەشداربوون لە کردنەوەى پیشانگاى MUSIAD EXP 2024 لەشارى ئیستەنبۆڵ، کە بە ئامادەبوونى جێگرى سەرۆککۆمار و ژمارەیەکى تر لە وەزیرى و بەرپرس و کاربەدەستانى وڵاتەکە بەرێوەچوو.

لە پیشانگاکەدا، کە کۆمپانیاکانى 100 وڵات تێیدا بەشدارن، هەرێمى کوردستانیش بەشدارە لە پیشانگاکەدا و لە پەراوێزى پیشانگاکەشدا چەندین دیدار و کۆبوونەوەیان دەبێت.