دوێنێ هەینی لە گەڕی 11ی خولی بۆندس لیگای ئەڵمانی، هاری کەین هێرشبەری ئینگلیزی سەرکردایەتی یانه‌ی بایرن میونشنی کرد و به سێ گۆلی بێ به‌رامبه‌ر سەرکەوتنی بەسەر ئۆگسبۆرگی میوانەکەیدا بەدەستهێنا.
یاریزانە ئینگلیزییەکە هاتریکی تۆمارکرد و دەرفەتی ئەوەی بۆ بایرن ڕەخساند بۆ ماوەیەکی کاتی بە کۆکردنەوەی 8 خاڵ لە پێشەنگی لایپزیگی ڕکابەرەکەی دووربکەوێتەوە.
بەگوێرەی تۆڕی ئاماری ئۆپتا، کەین گەیشتە 50هەمین گۆڵی خۆی لە خولی ئەڵمانی، تەنها لە 43 یاریدا.
ئاماره‌كه ئاماژەی بەوەشکردووە، ئەمە ژمارەیەکی پێوانەییە لە بۆندسلیگادا، چونکە هیچ یاریزانێک لە 43 یاریدا نەگەیشتووەتە 50 گۆڵ.
لای خۆیەوە تۆڕی بلیچەر ڕیپۆرت بڵاویکردەوە کەین لە دوای هاتنی بۆ یانه‌ی باڤاریا حەوتەم هاتریکی خۆی لە خولی ئەڵمانیا تۆمارکردووە.
جێگای سەرنجە کەین لە مانگی ئابی 2023 پەیوەندی بە بایرن میونشنەوە کرد، لە تۆتنهامەوە هاتبوو بە بڕی 110 ملیۆن یۆرۆ، لەگەڵ هاندانی زیادە، بەمەش بووە گرانترین یاریزان لە مێژووی بۆندسلیگادا.