ئەمڕۆ چوارشەممە 13ـی تشرینی دووەمی 2024، وەزارەتی کارەبای حکوومەتی هەرێمی کوردستان لەمیانەی ڕاگەیەندراوێکدا، ئاماژەی بەوە دا: لە چوارچێوەی پرۆژەی ڕووناکیی بۆ مەبەستی دابینکردنی کارەبای بەردەوامی نیشتمانی، کارەبای گەڕەکی سەربەستی – 32 پارک لە سەنتەری شاری هەولێر دەکرێتە 24 کاتژمێری.
وەزارەتی کارەبا، دانیشتووانی گەڕەکەکە دڵنیا دەکاتەوە لە ماوەیەکی نزیکدا، کارەباکەیان دەبێتە 24 کاتژمێری و لە پچڕانی بەردەوامی کارەبا ڕزگاریان دەبێت.
وەزارەتەکە ئاماژە بەوە کرد، لە ماوەی جێبەجێکردنی پڕۆژەکە بۆ دابینکردنی کارەبای 24 کاتژمێری، کارەبای گەڕەکەکە تووشی هەندێ پچڕانی کاتی دەبێت، بۆ ئەوەی تیمەکانی کارەبا بتوانن کارەبای 24 کاتژمێری بگەینە گەڕەکەکە.
بەمەش گەڕەکی سەربەستی، دەبێتە چوارەم گەڕەکی شاری هەولێر لە کارەبای 24 کاتژمێر سوودمەند دەبن، پێشتر هەر یەک لە گەڕەکەکانی، شادی، نازناز و بەختیاری کارەبایان بووەتە 24 کاتژمێری.
دوای نیوەڕۆی ڕۆژی پێنجشەممە، 17ـی تشرینی یەکەمی 2024، لە کاتی سەردانێکیدا بۆ گەڕەکی شادی لە شاری هەولێر، مەسرور بارزانی، سەرۆکی حکوومەتی هەرێمی کوردستان، پڕۆژەی ڕووناکی ڕاگەیاند.
سەرۆکی حکوومەتی هەرێمی کوردستان، گوتی: پرۆژەی ڕووناکی یەکێکە لە گرنگترین پرۆژەکانی خزمەتگوزاریی بۆ هاووڵاتییانی خۆشەویستی هەرێمی کوردستان، کە مەبەستمانە تا کۆتایی ساڵی 2026 کارەبای سەرتاسەری هەرێمی کوردستان بکەینە 24 کاتژمێری.
کارەبای گەڕەکی سەربەستی – 32 پارک دەبێتە 24 کاتژمێری
