ئەزموونی نووسینم لە شارەوانیی هەولێر
شێرزاد هەینی
من لە شارەوانیی هەولێر ڕووپێو”مساح” بووم، لە رۆژانی ئیشکردنم ڕۆژنامە و کتێب “کوردی و عەرەبی” بەردەوام لەناو ژوور، چەکمەجە، ئۆتۆمبێلەکەمدا هەبوون، ئەوەی دەیخوێندەوە، ژن و پیاوان کتێبم بۆ دەبردن. هەندێک لە فەرمانبەرەکانم دەبردە کۆڕ، کۆبوونەوە، شانۆگەریی و بوارە ئەدەبییەکانی تریش!
پێش من لە شارەوانیی هەولێر؛ محەمەد مەولوود مەم، ئەندازیار هاشم عەبدوڵا، ئەندازیار مەجید عومەر، پیرباڵ مەحمود، سەعدوڵا پەرۆش، جەوهەر کرمانج، مەغدید سۆران، دکتۆر عەبدوڵا حەداد و .. لەوێ بوون. ژمارەیەک لەو بەڕێزانە گۆڤاری هەولێریان دەرکردبوو. هەولێر؛ گۆڤارێکی ئەدەبی ناوازەی ناوداریش بوو. زووتریش لە هەولێر ڕۆژنامەی اربیل _ هەولێر دەرچووە، بەڵام ڕۆژنامەیەکی گشتی بوو.
لەیادی سەد ساڵەی شارەوانیی هەولێر لەساڵی ١٩٨٥ کتێبێکم بەناوی هەولێر ئامادە و چاپ کرد، ئەندازیار “تەحسین چیچۆ” سەرۆک شارەوانی بوو، هاوکارم بوو، ناویشی لەسەرە.
پاش ڕاپەڕین لەساڵی ١٩٩٢ بە مۆڵەتی وەزارەتی ڕۆشنبیری، بە پشتیوانی دارایی شارەوانی و بە ڕەزامەندی سەرۆک شارەوانی ئەندازیار یاسین تەها موحمەد و دواییش ئەندازیار عەبدولقەهار عەزیز عەلی، ڕۆژنامەی هەولێرم دەرکردووە.
ژمارەی یەکەمی لە ١٥/١١/١٩٩٢ بە چوار لاپەڕەی بچووک دەرچووە، زۆربەی بابەتەکانی من نووسیومە.
ژمارە ٣ و ٤ پێکەوە بە قەبارە گەورە لە رۆژی ٣١/١/١٩٩٣ دەرچووە، بابەتی فرەلایەنی تێدا بوو، بە بەشداری نووسەرانی شارەوانی و دەرەوەشی دەرچووە.
ژمارە ٦ و ٧ پێکەوە لە ٢٨/٣/١٩٩٣ دەرچووە، لەو ژمارەیەدا سەرۆک شارەوانی ئەندازیار عەبدولقەهار عزیز علی بە وتار و رێنمایی بەشداری زۆری کردبووم.
دوا ژمارەشی لە ٨ حوزەیرانی ١٩٩٣ دەرچووە، بابەتی باش و لێکۆڵینەوەی زۆرە.
کە سەیری ئەو ژمارانە دەکەم، وتارەکان پێشبینی و لێکۆڵینەوەی زۆری بۆ شارەکە تێدایە.
ڕۆژنامەکە بە تایپی دەستی بوو، کاک “تەها زادە” بە پارە بۆی دەکردین، هەڵەی چاپی کەم بوو، چونکە خۆی ڕۆژنامەی ئاڵای ئازادی تایپ دەکرد، ئەزموونی زۆر بوو. نەخشەسازی و هیڵکارییەکانی هونەرمەند و ڕۆژنامەنووسی گەورە “موحمەد زادە” دەیکرد، ڕۆژنامەکە لەڕووی دیزاین و فۆتۆ و هێڵکارییەوە نایاب بوو. قەڵەمی ژنیشی تێدا بووە. لە چاپخانەی ڕۆشنبیری بە پارە چاپ دەبوو.
تێچووی پارەی چاپ و هاوکارییەکان و پاداشتی نووسەران لەلایەن شارەوانییەوە دەدرا، خۆم سەرپەرشتی هەموو لایەنەکانم دەکرد. ئەوە بە مێژوویەکی جوانی قەڵەم و کۆششی خۆمی دەزانم! ئەوەی ماوە دەڵێم لاپەڕەکانی ڕۆژنامەکە بۆن و ڕەنگ و هەستی حزبایەتی و ململانێیەکانی ئەودەمانەی تێدا نەبووە، نووسینەکانی ماون و شاهیدن.