کەسێ زانا خودان سالۆخەتێن جوانە

دلۆڤان هالۆ
کەسێ زانا زێدەباری هەبوونا زانست و زانین و سەربۆرا خۆ، هێشتا خۆ ب کەسەکێ نەزان دبینیت و ب بۆچوونا وی ئەو زانست و زانینا تا نوکە ب دەست خۆ ڤە ئینایی تەمەت دلۆپەکا ئاڤێ یە ژ دەریایەکا مەزن. کێماسی یێن خۆ دبینیت و دانپێدانێ ب شاشی یێن خۆ دکەت و پێکۆلا ڕاستڤەکرن و ژ ناڤبرنا وان دکەت. ل دەمێ کو کەسەك ل دەڤ وی پەسنێن وی دکەت، شەرم دکەت و خۆ شەهمزار دبینیت ژ ترسا وێ چەندێ نە کو نە ل دووڤ وێ زانست و زانینێ بیت یا ژ وی دهێتە چاڤەڕێ کرن.
کەسێ زانا هەر دەم خۆ دبینیت شاگردێ زانست و زانینێ. چ جاران نە ل هیڤیا وێ چەندێ یە کو دێ ڕۆژەکێ گەهیته گۆپیتکا زانست و زانینێ و دێ بێژیت ئەز بوومە کەسەکێ زانا و ئێدی ب دەستڤەئینانا زانست و زانینێ بەسە. چەند پتر زانست و زانینا وی پتر ببیت سادە تر دبیت د ڕەفتارێن خۆ دا بەرامبەر خەلکێ.
کەسێ زانا زانینا خۆ وەك ئێمانەتەکێ ل قەلەم ددەت کو ژ لایێ خودێ ڤە پێ هاتیە دان و ل سەر وی پێدڤیە وێ زانست و زانینێ بگەهینیتە شاگردێن خۆ و هەمی کەسان. لەوما یێ مەردە د بەخشینا زانست و زانینا خۆ دا، و حەز دکەت هەمی کەس ژ وی تێگەهشتی تر و زانا تر بن.
کەسێ زانا بەردەوام دووڤچوونا زانست و زانینێ دکەت هەر وەکی ژ نوو ل دەستپێکا ڕێکێ. دەمێ ڤالا و بێ مفا نینە، لەوما هەر دەم پێکۆلان دکەت دەمێ خۆ ب وێ چەندێ ڤە ب بورینیت یان زانینێ وەرگریت یان ژی ب بەخشیت. کەسێ زانا تڕانێن خۆ ب کەسێن نەزان ناکەت، بەلکو پێکۆلا وێ چەندێ دکەت کەسێن نەزان ژ تاریاتیا نەزانینا خۆ دەرکەڤن، و بەرەڤ ڕۆناهیا زانینێ ڤە بچن و خۆ و مللەتێ خۆ ب زانینا خۆ پێش بێخن و ببنە کەسێن کاریگەر و مفادار د جڤاکی دا.
کەسێ زانا چ جاران خۆ مەزن ناکەت، چونکی د بنیات دا یێ مەزنە، و یێ خۆ مەزن دکەت ژی د بنیات دا یێ بچووكە. ب گۆتن و کریار و ڕەفتارێن خۆ یێ مەزنە. گەنگەشێ ل گەل کەسێن نەزان ناکەت چونکی ب بێدەنگیا خۆ و ژ دل پێڤە مانا خۆ یاریێ د بەرژەوەندیا کەسێن نەزان دا ب دوماهیك د ئینیت، ژ بەر کو گەنگەشە ل گەل کەسێن نەزان بێ مفا و ئارمانجە.
کەسێ زانا نە هەڤڕکیا کەسێن ژ خۆ زاناتر دکەت و نە ژی هەڤڕکیا کەسێن ژ خۆ نەزانتر دکەت، نە ژی هەڤڕکیا کەسێن هەڤکویفی خۆ دکەت، بەلکو ئێکانە کەسێ هەڤڕکیا وی دکەت ئەو ب خۆ یە. یێ سینگ بەرفرەهە بۆ ڕەخنە و تێبینیان و ڕێزێ ل هەمی بۆچوونان دگریت، خۆ ئەگەر هەتا بۆچوونێن دژی وی ژی بن.
کەسێ زانا سنوورێن خۆ دزانیت و ناهێلیت چ کەس سنوورێن وی ژی ببەزینیت. خودان کەسایەتیەکا مەزن و ئاڤایە. نە کەسەکێ خۆپەرسته، لەوما هەر تشتەکێ ژ بەری بۆ خۆ بڤێت بۆ کەسێن بەرامبەری ژی خۆ دڤێت پاشی بۆ خۆ. هەست ب ئێش و ژانێن کەسانێن دەوروبەر دکەت و هەڤخەم و هەڤشادێ وانە. بێ داخوازکرن دەستێ هاریکاریێ بۆ دەستکورتان درێژ دکەت، خۆ ئەگەر ب پەیڤەکێ ژی بیت.