بەیانیی ئەمڕۆ یەكشەممە 2023/10/8 نێچیرڤان بارزانی، سەرۆكی هەرێمی كوردستان، پێشوازی لە ئەحمەد ئیبراهیم ئەلزاهری، كونسولی گشتیی ئیمارات لە هەرێمی كوردستان كرد.
لە دیدارێكدا، وێڕای گەیاندنی سڵاو و ڕێزی سەرۆكی ئیمارات بە سەرۆكی هەرێمی كوردستان، كونسولی گشتیی ئیمارات بانگهێشتنامەیەكی سەرۆك شێخ محەمەد بن زاید ئال نەهیانی بە نێچیرڤان بارزانی گەیاند بۆ سەردانی ئیمارات و بەشداریكردن لە كۆبوونەوەی لوتكەی جیهانیدا بۆ كاری كەشوهەوا (COP28) كە ڕۆژانی یەك و دووی دیسەمبەری داهاتوو لە شاری ئێكسپۆ دوبەی ئەنجام دەدرێت و لەگەڵ ڕۆژی نیشتمانیی ئیماراتدا هاوكاتە.
كۆبوونەوەكە لە چوارچێوەی گەڕی بیست و هەشتەمینی كۆنگرەی لایەنەكانی ڕێككەوتنی نەتەوە یەكگرتووەكاندا دەربارەی گۆڕانی كەشوهەوا دێت كە ئیمارات سەرۆكایەتیی ئەم گەڕەی دەكات و لەسەر بنەمای ڕێككەوتنی پاریس پرسەكانی تایبەت بە گۆڕانی كەشوهەوا و چۆنیەتیی ڕووبەڕووبوونەوەی لێكەوتەكانی و ڕۆڵی وڵاتانی جیهان لە كەمكردنەوی مەترسییەكانیدا، تاوتوێ دەكات.
دەرفەتەكانی وەبەرهێنانی ئیماراتی لە عێراق و هەرێمی كوردستان و برەودان بە پەیوەندییەكان، دوایین پەرەسەندنەكانی ناوچەكە بەگشتی و چەند پرسێكی جێی بایەخی هاوبەش، تەوەرێكی دیكەی دیدارەكە بوو.
سەرۆكی هەرێمی كوردستان پێشوازی لە كونسولی گشتیی ئیمارات لە هەرێمی كوردستان كرد
