دواجار پەرلەمانی عێراق، هەمواری یاسای هەڵبژاردنی پەسەند کرد و ئەمەش ڕێگای خۆشکرد بۆ ئەوەی گرفت لە بەردەم بەڕێوەچوونی هەڵبژاردنی ئەنجوومەنی پارێزگای کەرکووک نەمێنێت، کە چەندین ساڵە ئەو هەڵبژاردنە دواکەوتووە.
دوای پەسەندکردنی هەمواری یاسای هەڵبژاردن لە پەرلەمانی عێراق، شاخەوان عەبدوڵا، جێگری سەرۆکی پەرلەمانی عێراق، ڕایگەیاند؛ دەنگدان لەسەر یاسای هەلبژاردنی نوێنەران و ئەنجومەنی پارێزگاکان تەواو بوو، بەشێوەیەک تەواوی ئەو بەربەستانەی بەردەم هەلبژاردنی ئەنجومەنی پارێزگای کەرکووک لابران و بۆ یەکەم جار لە دوای ٢٠٠٣ سەرژمیری سالی ١٩٥٧ دەکریتە بنەما بۆ دەست نیشان کردنی هاووڵاتیانی شارەکە و هەروەها سەرگەران کە لەدوای ٥٧ ەوە لکێنراوە بەکەرکووکەوە دیسان دەبنە بەشیک لەخەلکی شارەکە و مافی دەنگدانیان دەبیت و بەناو زیاد کران بۆ پرۆژەکە.
ئەوەشی ڕاگەیاندووە؛ جگە لەوەش، ئەوەی مادەی ١٤٠ کردووە یان تەنها مامەڵەی پێشکەش کردووە، مافی دەنگ دانی هەیە. هەروەها ئەوەی پێش ٢٠٠٣ لەکەرکووک بووە و نفوسی شارەکانی دەرەوەی کەرکووک بووە و ٥٧ ی کەرکووکەو تەرحیل نەبووە بەلام بتاقەی کەرکووکی هەیە دیسان مافی دەنگدانی هەیە ، هەروەها هەموو ئەو هاووڵاتیانەی هێنراونەتە کەرکووک و بەئامانجی سیاسەتی تەعریب ناویان ڕەشکراوەتەوە لادەبرین و مافی دەنگ دانیان نییە.
ئەوەشی خستووەتەڕوو، بۆ یەکەم جارە لەبابەتی دابەش کردنی پۆستەکان ٣٢٪ هەلگیرا .
دەشڵێت: بەپێ یاسا ئەو دەسەلاتەمان لەسەرۆک وەزیران وەرگرتەوە کە بتوانیت هەڵبژاردن لە پارێزگایەک دوا بخات کە خەڵکانێک ئامانجیان بوو، ئەوەشی گوتووە: سوپاسی سەرجەم ئەو فراکسیونانە دەکەم لە کوردو دەرەوەی کورد کە هاوکار بون لەدەنگدان بۆ ئەم پرۆژە یاسایە.
لای خۆیشیەوە، شوان کەلاری، ئەندامی ئەنجوومەنی نوێنەرانی عێراق، هەر لەو بارەیەوە، ڕایگەیاندووە؛ یاسای هەڵبژاردنی ئەنجومەنی پارێزگاکان و پەرلەمانمان پەسەند کرد و کۆمەڵێک دەسکەوتی گرنگمان بەدەست هێنا، لەوانە:
ــ مادەی ٣٥ ی یاسای پێشوومان ئیلغا کردەوە کە پێشتر هەندێک تایبەت مەندی دابوو بە کەرکوک وە بەربەستی دروست کردبوو بۆ ئەنجامدانی هەڵبژاردن لە کەرکوک.
ــ ڕەغمی فشار و تەکتیکی زۆری لابەلا بۆ ئەوەی حیلەیەکی شەرعی بدۆزرێتەوە هەڵبژاردنی ئەنجومەنی پارێزگای کەرکووک ئەنجام نەدرێت، وەلێ نەمانهێشت. هەڵبژاردن لە یەک کاتدا لە کەرکووک و سەرجەم پارێزگاکانی تری عێراق (جگە لە هەرێمی کوردستان )ئەنجام دەدرێت .
لە چەند خاڵێکی دیکەشدا، دەڵێت: ئەوانەی لە چوار چێوەی پرۆسەی تەعریبدا هاوردەی کەرکووک کراون مافی دەنگدانیان نابێت و ئەو کوردانەی مامەڵەی مادەی ١٤٠ یان کردووە جا ( مامەڵەکەیان تەواو بووبێت یان نا) مافی دەنگ دانیان دەبێت .
ئەو پەرلەمانتارە دەشڵێت: زۆر هەوڵدرا کە نەهێڵن ئاوارەکانی شەنگال لە دەرەوەی شەنگال دەنگ بدەن و پابەند بکرێن بەوەی بگەڕێنەوە شەنگال دەنگبدەن ( بۆ ئەوەی نەتوانن دەنگ بدەن و دەنگەکانیان بفەوتێت) چونکە شەنگال حەشد و pkk داگیریان کردووە و خەڵکی شەنگال بەو شێوە ناتوانن بگەڕێنەوە! بەڵام توانیمان تایبەتمەندی بدەین بە ئاوارەکانی شەنگال، بە شێوەیەک کە ئاوارەی کەمپەکان یان دەرەوەی کەمپەکان دەتوانن دەنگی خۆیان بدەن .
هەروەها ڕایگەیاندووە؛ سەبارەت بە کۆتایی مەسیحی، توانیمان هەرێمی کوردستان ( دهۆک و هەولێر ) بکەین بە یەک بازنە و باقی ناوچەکانی عێراق بکرێت بەیەک بازنە ، ئیتر کۆتایەکی مەسیحی موصڵ یان بەغداد ناتوانێت کۆتاکەی هەولێر و دهۆک ببات.