لە ھە‌كبە‌ی بیرە‌وە‌ریمدا.. كاتێ خووڕە‌وشت دە‌بێتە میداڵی شە‌رە‌ف..
ئه سعه د عه دۆ
دەمێك بوو بە خۆزگەی ئەوە بووم نوسینێك دەربارەی هیممەتی خەڵكی هەولێر بەرامبەر بە (گێژنیكان) بنووسم بەڵام ئەوكات بۆ منی هەولێری كارێكی ئەستەم بوو .
هێندەی نەبرد مامۆستاو برای بەڕێزم مەرحوم دكتۆر (سەعدی بەرزنجی) لەسەر لاپەڕەی رۆژنامەی (خەبات) نوسینێكی بە پێزی لەسەر ئەو لایەنە نوسی كە جێگای رێزو سوپاسی ئەو خەڵكە بوو، منیش بە دكتۆری زێدە بەرێزم گووت : ماڵت حەوت ماڵی دیكەی لێ بێتەوە .. وەك چۆن ئەو دەرگایەت بۆ خستینە سەرپشت ، شایانی وەبیرهێنانەوەیە : لە گەرمەی شەڕی یەكێتی و بزووتنەوەی ئیسلامیدا ، لە گۆشەكەم (خۆزگە) بابەتێكم لەژێر ناونیشانی(بە فرمێسكەوە ساڵی ۱۹۹۳ خواحافیز ، بە فرمێسكە بەخێرهاتی ساڵی ۱۹۹٤)ئەگەر هەلە نەبم لە ۱۹۹٤/۱/٦بوو ، بۆ هەفتەی دوایی دكتۆر بابەتێكی گلەیی ئامێزی لەسەر نووسیم كە بۆ هێندە رەشبینم ! هێندەی نەبرد ، لەشەوی ۱۹۹٤/۱۲/۲۹ رفێندرام ! بە داخەوە دكتۆریش سەرەڕای ئەوە كە سەرۆكی زانكۆ بوو لەچەقی شاردا بێڕێزیان دەگەڵ كرد ! دڵنیام لەوكاتوساتەدا رەشبینی منو گەشبینی
جەنابی هێرشیان بۆ هزری دەهێنا !
رۆژی شەممە رێكەوتی ۱۹۸۸/۱۲/۱۰ بۆ ژووانی ئەحمەد شێواوی شاعیر لە دوكانی محمەدی فەقێ رەحمان چاوەڕوان بووم تاكو چاوپێكەوتنێ بۆ بەرنامەی (لەكەلەپوورەوە) ساز بكەین ، لە گەرمەی گفتۆگۆدا بووین شێواو سەری بۆ لای قەڵای دێرین بەرزكردەوە بینی دوو لۆری یەكیان تەژی بوو لە (لانك) ئەوی تریان لە (مەسینە) ئینجا رووی لە ئێمە كردو گووتی : ئەوە چیە؟
كاك محمەدیش لەسەرخۆ گووتی : بۆ گێژنیكانە !
لە رێگادا بووین بۆ تۆماركردن ، شێواوی شاعیر وتی : كاكە عەدۆ ئەو خووڕەوشتە بەرزەی خەڵكی هەولێر شایستەی كۆپڵە شعرێكە ، تۆ بڵێی نەتوانین لە بەرنامەكەدا بەسەریان بكەینەوە ؟
بۆ نا ؟!
لە دوا دوای بەرنامەكەو لەسەر شاشەی تەلەفزیۆنی كەركوك لە ساڵی (۱۹۸۹)گووتی :
هەولێر شارە خۆشەكەی روحمو وژدانم
مایەی شانازی و فەخری كوردانم
چوار دەورت باخو سەراو و كانیی
پڕە لە خۆشی و دیمەنی جوانی
یاخوا تێك نەچێ دابودەستوورت
بژین دانیشتوی مەندو مەستوورت
لە گەڕانەوەماندا باسی ئەو كەسانەم كرد كە رۆڵی گرینگیان لە خزمەتكردنی خەڵكی مشەختی بادینان و هەلەبجەی شەهید بینیوە ، كە چۆن ئەو خەڵكە گەورەو بچووك ، مامۆستاو قوتابی ، ئافرەت و پیاو ، دەوڵەمەندو هەژار ، ئیسلام و مەسیحی ، بگرە ئەو كەسانەیش كە تا دوێنێ سەرزەنیشتمان دەكردن ، كەچی كۆمەك و یارمەتیدانی كوردپەروەرانەی هەولێر بۆ كۆسكەوتووان هیچ جیاوازیەكی لە نێوانماندا نەهێشت ، خراپ و چاك و مام ناوەندی بوون بە یەك ، كەسانێ هەبوون پایەوپلە رێگای گرتبوون بۆ سەردانیان ، بەڵام لە رێگای من و تۆو ئەوانی دیكە دڵی خۆیان ساكین دەكرد .
دەتوانم سوێندی سێ بە سێ بخۆم خەڵكانێكی ئەوتۆم لە ئاقاری گێژنیكان بینی بە خەونیش لەو بڕوایەدا نەبووم لەوێ ببینرێن بەڵام لەوێش بوون !
بۆیە دەڵێم كورد ئەگەر بیەوێ شتێ بكات ، دەیكات ! ئەگەر لە خەیاڵیشدا نەبێ ، لە ناخەوە هەروان .
بۆیە ئەنجامی پاشەرۆژمان گەیشتە ئازادی و دیموكراتی و پەرلەمان و حكوومەتی هەرێم ، بە هیچ جۆرێك نامەوێ ناوی یەكێك لەو مەردایەتیە تۆمار بكەم چونكە مەردایەتی هەموو هەولێر بوو كەچی بە دەست خۆم نیە ناوی پیاوماقووڵ و ردێن سپی و دەوڵەمەندی ناوچەكە (حاجی فازیل گێژنیكانی) وەك خێراخواز ، ناندەر خۆی تۆمار دەكات چونكە تا كۆچی دوایی كرد درێغی نەكردو رەوسەی خۆی لە گەڵ خەڵكی هەژار بڕ دەكرد !
خۆزگە مام حاجی و هەزارانی تریش وەكو تۆ (دڵنیام هەن) ناویان تۆمار دەكرا .
كاتێ بە دیداری بادینان شاد دەبین دبێژن “ ئەم گووری هەوە بین “خەڵكی هەلەبجەی شەهیدیش دەڵێن : ” یاخوا خەڵكی هەولێر بێوەی بین .