بەرەبەیانی ئەمڕۆ هەینی، بەهۆی دابەزینی بەهای دۆلار، نرخی زێڕ خاڵێکی بۆ دابەزینەکانی هەفتەی رابردووی دانا و بەرزبووەوە. نرخی نەوتی برێنتیش زیاتر لە 40 سەنت دابەزیوە و بە 86 دۆلار مامەڵەی پێوەدەکرێت.
ئەمڕۆ هەینی، 30-9-2022، نرخی یەک ئۆنسە زێڕ بە هەزار و 662 دۆلار مامەڵەی پێوەکرا و کەمێک بەرزبووەوە. هاوکات نرخی زێڕ بۆ گرێبەستەکانی داهاتوو زیاتر لە 2 دۆلار بەرزبووەوە و هەر ئۆنسەیەک بە هەزار و 670 دۆلار مامەڵەی پێوەکرا.
بەهۆی کەمبوونەوەی خواست و سستبوونی ئابووریی جیهان، ماوەی شەش مانگی لەسەریەکە مامەڵەکردن بە زێڕ لە ئاستێکی نزمدایە. ئەم هەفتەیەش بەهۆی دابەزینی بەهای دۆلار، زێڕ لە دوو کاتی جیاوازدا نرخەکەی بەرزبووەوە و بەشێک لە زیانەکانی قەرەبوو کردەوە.
نرخی نەوت دابەزی
هەر ئەمڕۆ هەینی، لە دوای کردنەوەی بازاڕەکانی ئاسیا نرخی نەوت بۆ دووەم رۆژ لەسەر یەک لەم هەفتەیەدا دابەزی، دوای ئەوەی لە رۆژی چوارشەممە هەر بەرمیلێک نەوتی برێنت زیاتر لە سێ دۆلار بەرزببووەوە.
– نرخی نەوتی برێنت بەرەبەیانی ئەمڕۆ 43 سەنت دابەزی و بە 86 دۆلار و 76 سەنت مامەڵەی پێوەکرا.
– نرخی نەوتی سووکی تێکساسی ئەمریکا 38 سەنت دابەزی و بە 80 دۆلار و 85 سەنت مامەڵەی پێوەکرا.
هۆکاری دابەزینی نرخی نەوت بەشێکی زۆری پەیوەندی بە نیگەرانی لە سستبوونەوەی ئابووری و کەمبوونەوەی خواستە لەسەر بەکارهێنانی نەوت.
بەهای دۆلار بەرامبەر دراوە جیهانییەکان:
100 دۆلار بەرامبەرە بە 147 هەزار و 525 دیناری عێراقی
یۆرۆ – دۆلار 0.980 EUR/USD
پاوەند – دۆلار 1.11 GBP/USD
دۆلار – لیرە 18.54 USD/TRY
یەک دۆلار – ریاڵ (تمەن) 32 هەزار و 150 تمەن USD/IRR
یەک دۆلاری ئەمریکی: 57.23 روبڵی رووسی