رێڤەبەرێ سکرێ دهۆکێ:پتر ژ١٥ مەتران ئاستێ ئاڤا سکرێ دهۆکێ داکەفتییە

سەجا شێرزاد – دهۆک

پتر ژ١٠ ساڵانە ئاڤا سکرێ دھۆک ب ڤی رەنگی کێم نە بوویە، لێ ژبەر کێمییا باران بارینێن وەرزێن زڤستانێ یێن دەربازبووی و نە پاراستنا رێژا ھەیی یا ئاڤێ، نێزیکی ٧ مەلیون مەترێن سێ جار یێن ئاڤێ ژسکرێ دھۆک دئەڤ ساڵەدا و بەرامبەر ب پار ساڵ کێم بووینە.

فەرھاد موحەمەد تاھر، رێڤەبەرێ سکرێ دھۆکێ: رێژەیا ئاڤێ دسکرێ دھۆکێ دا کێم بوویە و ئەگەر رێژەیا ئاڤێ یا نوکە دسکری دا ھەیی بەراورد بکەین دگەل رێژەیا ئاڤێ ئەگەر سکر یێ پر بیت، دیاردبیت کو ١٥ مەتر و ٣٧ سەنتیمان ئاڤ کێمە، و ئەڤە ژی پتر بۆ بابەتێ ھشکە ساڵیێ ڤەدگەریت.
پار ساڵ ل ڤی دەمی دسکری دا ٢٦ مەلیون مەترێن سێ جار یێن ئاڤێ ھەبوون، لێ ئەڤ ساڵە ب تنێ ١٩ مەلیون و ٥٠٠ ھزار مەترێن سێ جار یێن ئاڤێ دسکری دا ھەنە، ئانکو رێژەیا ئاڤێ یا ئەڤ ساڵە دسکری دا بەرامبەر ب پار ساڵ، ٦ مەلیون و ٥٠٠ ھزار مەترێن سێ جار یێن ئاڤێ کێمترن.
ب گور گوتنا رێڤەبەرێ سکرێ دھۆک پشبەستنا ئاڤا سکرێ دھۆکێ یا سەرەکی ل سەر ڤەرێژا ئاڤا بارانانە، و ب گور ئامارێن رێڤەبەرییا کەشناسیێ ل پارێزگەھا دھۆکێ، ماوێ دوو وەرزانە ئاستێ باران بارینێ ژرێژا پێدڤی کێمترە، چونکە ل ھەر وەرزەکێ زڤستانێ دڤێت ئاستێ باران بارینێ ژ٥٣٥ ملیمان کێمتر نەبیت و ب گور ئامارێن ئەڤ ساڵە ل دھۆکێ ب تنێ ٢٥٠ ملیمێن بارانێ بارینە، ئانکو کێمتر ژنیڤا رێژا پێدڤی.
ئومێد مەعسووم، رێڤەبەرێ کەشناسیێ ل پارێزگەھا دھۆک: مە وەکو رێڤەبەرییا کەشناسیێ رێژەیەکا دانایی یا باران بارینێ ل پارێزگەھا دھۆکێ ھەیە، و ئەگەر ھات و رێژا باران بارینێ بۆ دوو وەرزان ل دویف ئێک کێمتر بوو ژرێژا سەرەکی یا دانایی، ١٠٠ ژ١٠٠ ئەم دشێین بێژین ھشکە ساڵی رویدایە، و ل دھۆکێ ژی دئەڤ ساڵە دا ئەم تووشی ھشکە سالیێ بووینە، چونکە وەرزێ چویی ئاستێ بارانان کێمتربوون ژرێژا پێدڤی و وەرزێ پێشتر ژی ب تنێ ٢٦٨ ملیمێن بارانێ باری بوون.
سکرێ دھۆکێ شیانێن ھەلگرتنا ٥٢ مەلیون مەترێن سێ جار یێن ئاڤێ ھەنە، و دنوکە دا ب تنێ ١٩ مەلیون و ٥٠٠ ھزر مەترێن سێ جار یێن ئاڤێ تێدا ھەنە، و ئەڤ رێژا ئاڤێ یا ھەیی ژی، ب تنێ بۆ پێدڤیاتییا ڤەخوارنێ ھاتییە ھەلگرتن.