لە پێناوی نیشتمانیشجارێك بەخت بكەن گیان
هاودەنگ فارووق
كوردستان نیشتمانی پێكەوەژیانی هەموو نەتەوە و ئایین و مەزهەب و ڕەنگە جیاوازەكانە، مێژووی ئایینی ئیسلام و موسوڵمانیەتیی كوردیش لە سەردەمی هاوردەكردنی ئایدیای ئیسلامیی سیاسییەوە دەستی پێ نەكردووە، بەڵكو لە ئەخلاق و پەروەردەی كوردایەتی و ئایینیی ناو تەكییە و حوجرە و خانەقاكانەوە لەسەردەستی گەورە پیاوانی ئایینی و نەتەوەیی و بیرمەندان و ڕووناكبیرانی ڕەسەنی كوردەوە دەستی پێ كردوە.
پەروەردەی ئایینی لە كوردستاندا، زۆر پێش دامەزراندنی حزبە ئیسلامییەكان هەبووە بەڵام بەشێوازێکی ڕەسەن و کوردانەی بەدوور لە بڵاوکردنەوەی قین و بوغز و توندوتیژی، بۆیە ئەگەر حكوومەتی كوردستان، نیەتی گۆڕین یان لابردنی پەروەردەی ئیسلامیی هەبوایە، جارێ نەیدەهێشت سی ساڵە حزبە ئیسلامییە سیاسییەكانی كوردستان، موسوڵمانیەتیی پاك و بێگەردی كورد، بە سیاسی بكەن و ئایین لە مزگەوت و تەكییە و خانەقاكانەوە بەرنە ناو مەقەڕی حزبەكانیان و بۆ مەرامی سیاسی و بەرژەوەندیی خۆیان بەكاری بێنن.
ئەگەر وڵاتێك بیەوێ دەرسی دین لە قوتابخانەكان لابدا، دەبێ لەوانەوە دەست پێ بكات كە ساڵەهایە بەناهەق پیرۆزییەكانی ئایینیان بە بارمتە گرتووە و موسوڵمانیەتیی سەدان ساڵەی میللەتەكەیان خستۆتە ژێر پرسیارەوە.
ئەم مامۆستا بەڕێزە ناهەقی نییە كە زوو زوو حەجمی ڕاستەقینەی خۆیانی لێ بزر دەبێ و لە بن كاریگەریی ڕەزایەتی ئیلهامبەخشەكانی ئیخواندا، بە دەنگی دلێرەوە بانگەشەی گیانبەختكردن دەكات، وەك ئەوەی لە مەملەكەتی كافرستاندا نەفیرعامی گیانبەختكردن بكات، گیانبەختكردنێك نەك لە پێناوی نەتەوەو نیشتماندا، نەك لە ئانی شەڕی داعشدا.
بە داخەوە ئەو هێزە سیاسییانە جگە لە دروشم، تا ئێستا ئاوڕێكی جددییان لە مەسەلە نەتەوایەتییەكانی كورد نەداوەتەوە، ته‌نانه‌ت له هه‌موو قۆناغه مێژووییه‌کاندا به تایبه‌ت له کاره‌ساتی ئه‌نفال و کیمیابارانکردنی هه‌ڵه‌بجه و جینۆسایدی کورد شەڕی داعشدا بە حەرفێك بە دروشمی سەرلافیتەیەك( گیانی خۆیانیان بەخت نەكردووە) هه‌ڵوێستێکیان نه‌نواندووه که له خزمه‌تی کورد و کوردستاندا بێت.
لە لایەکی دیکەوە، ئاساییە کە بڵێین گیانبەختکردن بەبێ جیهاد نابێت، ئایا ئەو حزبەی کە ساڵەهایە بانگەشەی مەدەنییەت و سنگفراوانی دەکات، بانگەشەی خەباتی بێچەک دەکات، چییە وا لەبەرامبەر دەنگۆیەکدا کە هەر زوو وەزارەتی پەروەردە ڕەتی کردەوە، چۆن وا زوو گەشتە قۆناغی هەڕەشەی گیانبەختکردن و جیهاد و خەباتی سوور؟ ئەم گۆڕانکارییە سیاسی و فیکریەی حزبێکی ئیخوانی جێگای ڕامان و بەخۆداچوونەوەی جیدییە. ڕاستی ئەو بۆچوونانە دەسەلمێنێت کە لە جەوهەردا هەموو حزبە دینییەکان یەکن و لە هەر قۆناغێکدا دەکرێ پەنا ببەنە بەر گیانبەختکردن.