ھاودەنگ فاروق
حکوومەتی ئێســـتای بەغدا، بە دادگا، بە فشـــاری دەرەکی و ناوخۆیی، میراتی مێژووی ســـتەم و زوڵمی حکوومەتەکانی مەلیک و مالیکی و، مێژووی ڕەشی سەدساڵە وەبیر خەڵکی گەلی کوردستان دێنێتەوە، هەموو توانستێکی خۆیان خستۆتە گەڕ بۆ ئەوەی سامانە سروشتییەکەی کوردستان، وەک موڵکی عێراق تاپۆ بکەن. تەنگهەڵچنین بە حكوومەت و خەڵكی كوردســـتان، پلانێكی وردداڕێژراوی ئاراســـتەكراوی ئامانجداری قۆناغبەندە، مەبەست لێی چۆكپێدادانی هەرێمی كوردستان و سڕینەوەی هەموو ماناكانی دەوڵەتداری و سەروەری كوردە لەخاكی خۆیدا.
بەغدا لەبری ئەوەی قەرەبووی مێژووی ســـتەمكاری خۆی لە كوردســـتان بكات، لەبری ئەوەی پردەكانی پەیوەندی لەگەڵ كورد تۆكمە بكات و، هەوڵبدات تاوانەكانی ئەو دەوڵەتە لەكوردســـتان بسڕێتەوە، كەچی بەپێچەوانەوە، ئەوەی حكومەتەكانی پێشوو نەیانكردووە، ئیستا لەڕێی دادگای فیدراڵییەوە ئەم توێژە حوكمڕانەی ئێراق دەیكەن، تاڕادەی شكاندنی ئێسقانەكان دەڕۆن، ئەگەر ئیستیان پێنەكرێت.
دووبارەكردنەوەی فشـــارەكان، بەكارهێنانی كارتەكان بۆ ســـەغڵەتكردنی كورد، ناوە ناوە بیانوگرتن بە هەرێمی كوردســـتان، چی لێچاوەڕوان دەكرێت، جگەلە شكستهێنانی ئەزمونی فیدراڵی لەئێراق.
شكستی ئەم ئەزمونە كە نزیكەی ۲۰ ساڵە كاری پێدەكرێت، هانی كورد دەدات بیر لەڕێگاچارەو ئۆپشنی تر بكاتەوە، نەك وەك ئەوەی ئەوان بیری لێدەكەنەوە كەلەژێر فشارەكاندا كورد دەستەمۆ بكەن و، هەموو جۆرە دەستەڵاتێكی لێوەربگرنەوە.
لەم كات و ساتەدا، پێویستە كوردیش كاردانەوەی پڕ بەپێستی هەبێت، هەرچەندە ئەوان فشار زیاتر بكەن، بەو ڕادەیەش كورد ئۆپشنەكانی دی پیشـــان بدات، وەك: ئیبرازكردنی كارتی كۆنفیدراڵی، ڕاوەســـتاندنی هەماهەنگی لەگەڵ بەغدا لەدۆســـیە ئەمنییەكاندا، مەســـەلەی ئاو، ئاوارەكان، قەرەبووی قوربانییەكانی سەردەمەكانی پێشوو، مادەی ١٤۰…تاد.
كورد دەبێ لە ســـەر ئاســـتی سیاسی و میڵی داوای ناڕەوای حکوومەتی ئێراق ڕەت بکاتەوەو زۆر بەڕوونی پیشانی بەغدا بدات كە هەر جۆرە فشارێكی لێ بكرێت، زیاتر لەبەغدا دوور دەكەوێتەوە، جارێکی دی ناگەڕێتەوە نێو قەفەزی داگیركەران.