سەرۆکی هەرێمی کوردستان، لە وتارێکدا ڕاگەیاندنی “تۆڕی ڕابوونەوەی ڕزگاربووان”ی ئێزدی بە هەنگاوێکی گرنگ لەقەڵەم دا کە تيایدا ڕزگاربووان خۆیان ببنە خاوەن دەستپێشخەری، دەنگ و ڕۆڵی کاریگەر لە پرس و بڕیارەکانی پەیوەست بە ماف و داهاتوویانەوە. هەروەها دووپاتی کردەوە کە تا دوا ڕفێندراو نووسینگەکەی لە کارکردن بۆ ئازادکردن و گەڕاندنەوەیان بەردەوام دەبێت و پشتگیریی تەواوی هەرێمی کوردستان بۆ بەدیهێنانی مافەکانیان و ئاوەدانکردنەوەی شنگال ڕاگەیاند.
به‌يانيى ئه‌مڕۆ چوارشه‌ممه 21ـی تشرینی یەکەمی 2026، له هه‌ولێر ڕێوڕه‌سمێک بۆ ڕاگه‌ياندنى (تۆڕى ڕابوونه‌وه‌ى ڕزگاربووان)ى ئێزدى ساز كرا كه به ئاماده‌بوونى ژماره‌يه‌ک لە به‌رپرسان و ميوانان له ناوخۆ و ده‌ره‌وه‌ى هه‌رێمى كوردستانه‌وه، به‌ڕێوه‌چوو.
تيايدا به نوێنه‌رايه‌تيى نێچيرڤان بارزانى، سه‌رۆكى هه‌رێمى كوردستان، دلشاد شەهاب یاریده‌ده‌ری سەرۆکی هه‌رێم، په‌يامى سەرۆکی هەرێمی کوردستانی پێشكه‌ش كرد.
ئه‌مه ده‌قه‌كه‌يه‌تى:
ئاماده‌بوویێن هێژا،
خوشک و برایێن ڕزگاربووی،
ڕۆژ باش،
هوين هه‌مى بخێر بێن بۆ هه‌ولێرێ..
جهێ خۆشحاليێ يه ئەڤرۆ ئه‌ڤ ڕێوڕه‌سمێ جودا تێته گێڕان، كو وه‌كى به‌رێ نه بۆ ساخكرنا بيره‌وه‌رييه‌كا بئێش و جينۆسايدێ و تاوانێن تيرۆرستێن داعشێيه ده‌رهه‌ق وه‌لاتى يێن مه يێن ئێزدى، به‌لكى بۆ هندێيه کو ببينه شاهدێت دەستپێشخەری و دەستپێکەکا نوى يا ڕزگاربوویا، ب ئیرادە و پێداگریا خۆ بۆ ئاڤاکرنا ژيانه‌كا نوى و پاشەڕۆژەکا باشتر.
ئێزدیيا، ب خۆڕاگری و چاڤنەترسيیا خۆ، سەلماند کو تیرۆرێ دگه‌ل هەمی تاوان و هۆڤاتييا خۆ، نەشیا ئیرادا وان بشکێنیت، یان ئومێدا وان يا بژیانێ ژناڤ ببەت. وان دیار کر کو ئه‌و ڕژدن ل سەر وێ یەکێ کو جارەکا دی ڕابنەڤە سەر پێیێن خۆ، مافێن خۆ ڤەگێڕن و پاشەڕۆژەکا باشتر بۆ خۆ و زارۆکێن خۆ ئاڤا بکەن.
ڕاگەهاندنا (تۆڕا ڕابوونا ڕزگاربوویان) ئەڤرۆ، دەربڕینە ژ ڤێ ئیرادێ و گاڤەکا گرنگە بەرەڤ قۆناغەکا نوى کو تێدا ڕزگاربووی بخۆ ببنە خودان دەستپێشخەری، دەنگ، و ڕۆلێ کاریگەر د پرس و بڕیارێن گرێدایی ماف و پاشەڕۆژا وان.
پیرۆزباهیێ ل ڤێ پێنگاڤا وان دکەین و پشتەڤانیا خۆ بۆ بزاڤ و ئارمانجێن وان دوباره دکەین. د ڤێ دەستپێشخەریێدا ئەم ده‌لیڤه‌یه‌كا گرنگ دبینین بۆ موکومکرنا هاریکاری و هەڤسۆزیێ د ناڤبەرا ڕزگاربوویێن هەمی پێکهاتێن بووينه قوربانيێن تاوانێن داعشێ.
ئاماده‌بوويێن هێژا،
ئه‌ركێ مه بوويه و مە هەردەم د ڕه‌وشێن دژوار و گراندا پشته‌ڤانييا ئێزدیيا كريه. د ڤێ هه‌لكه‌فتنێدا ژى ديسا دوباره دكه‌ين كو ل کوردستانێ، ل عیراقێ و ل هەر جهەکێ بيت، دێ بەردەوام پشەڤانێن وان و پاره‌زه‌رێن مافێن وان یێن ڕەوا و ناسنامەیا وان بين. هه‌روه‌سا هندى ڕه‌ڤاندييه‌ك مابيت، نڤيسنگه‌ها مه دێ به‌رده‌وام بيت بۆ ئازادكردن و ڤه‌گه‌ڕاندنا وان و دياركرنا چاره‌نڤيسێ وان.
بجهئینانا دادپەروەریێ، مسۆگه‌ركرنا مافێن ڕزگاربوویا، ئاشکراکرنا چارەنڤیسێ بێسەروشوينا، جيبجيکرنا یاسایا ڕزگاربوویێن ئێزدی، پەیداکرنا ڕەوشەکا دروست بۆ زڤڕینا ئاوارەیا و ئاڤەدانکرنا شنگالێ و ده‌ڤه‌رێن دى يێن ئێزدييا، ئەرکێن مه يێن سەرەکینە و بۆ ڤێ ئێكێ چ ژ ده‌ستێ مه بێت، هيچ خه‌مساريێ ناكه‌ين.
مافێ ڕزگاربوویانە کو دادپەروەری بۆ وان بهێتە بجهئینان، هەروەسا مافێ وانە کو هه‌تاهه‌تا ژیانا وان ئێخيسرا جينۆسايدێ نه‌بيت، بەلکى پێويسته دەلیڤە بۆ بهێنە چێكرن داكو ببنە هەڤپشکێن کاریگەر يێن ئاڤاکرنا پاشەڕۆژ و جڤاكا خۆ.
باوه‌رييا مه ئه‌وه كو گوهداريكرنا دەنگێ ڕزگاربوویا و بەشداریپێکرنا وان د بڕیارێن گرێدایی ژیان و مافێن واندا، پشکەکا سه‌ره‌كى يا دادپەروەریێ و ڕێزگرتنا ل کەرامەتا وانه. ژ بەر هندێ ژی، سەرکەفتنا ڤێ تۆڕێ دێ سەرکەفتنا هەر بزاڤەکێ بیت بۆ بدەستڤەئینانا دادپەروەری، چێبوونه‌ڤێ، ئاشتی و پێکڤەژیانێ.
خوشک و برایێن هێژا،
پيرۆزباهيێ ل وێره‌كى و خۆڕاگرييا ڕزگاربوویا و ڕژدبوونا وان دکەم بۆ پێشڤەچوونێ. پیرۆزباهیێ ل ڤێ دەستپێشخەریێ بۆ ڕاگەهاندنا (تۆڕا ڕابوونا ڕزگاربوویان) دکەم، هێڤیدارم ببیته دەستپێکا قۆناغەکا نوى يا ئومێد و کار و دەستکەفتان.
هەروەسا دەستخۆشیێ ل بزاڤێن ڕێکخراوا یەزدا دکەم. سپاسيیا حکوومەتا ئەلمانی، ئاژانسا هاریکاریا نێڤدەولەتی یا ئەلمانی (GIZ) و هەمی هەڤپشک و پشتەڤانێن ڤێ دەستپێشخەریێ دکەم.
هه‌ر سه‌ركه‌فتى بن، گه‌له‌ك سپاس.
نێچيرڤان بارزانى
سه‌رۆكێ هه‌رێما كوردستانێ
21/10/2026