له راگه‌یه‌ندراوه‌كه‌دا ماتیۆ توله‌ر، باڵیۆزی ئه‌مه‌ریكا له به‌غدا رایگه‌یاندووه، “ویلایەتە یەکگرتووەکانی ئەمه‌ریکا ئیدانەی ئەو هێرشە تاوانکارییە دەکات، کە بۆ سەر ئامانجی مەدەنی لە هەولێر ئەنجامدرا”.
هه‌روه‌ها هاتووه: “پێکهاتەکانی سەر بە رژێمی ئێران بەرپرسیارێتی ئەنجامدانی ئەم هێرشەیان گرتووەتە ئەستۆ و دەبێت رووبەڕووی بەرپرسیارێتی بکرێنەوە لەبەرامبەر ئەم پێشێلکاریە زەقەی سەروەریی عێراق و هەروەها لە بەرامبەر هێرشی تیرۆرستی بۆ سەر موڵك و ماڵی کەسانی مەدەنیی بێتاوان”.
كاتژمێر (1:00)ی شه‌وی رابردوو به كاتی هه‌ولێری پایته‌خت، سوپای پاسدارانی كۆماری ئیسلامی ئێران په‌لامارێكی مووشه‌كییان به 12 مووشه‌كی بالیستی كرده سه‌ر شاری هه‌ولێر و دامه‌زراوه‌ی كوردستان24 و چه‌ند شوێنێكی دیكه‌ی مه‌ده‌نیی كرابوونه ئامانجی په‌لاماره‌كه.
په‌لاماره‌كه له ئاستی ناوخۆ و عێراق و نێوده‌وڵه‌تییدا كاردانه‌وه‌ی زۆری لێكه‌وتووه‌ته‌وه و رووبه‌ڕووی شه‌پۆلێك له ئیدانه‌كردن بووه‌ته‌وه.
حكومه‌تی هه‌رێمی كوردستان له به‌یاننامه‌یه‌كدا، داوایكرد، نه‌ته‌وه‌یه‌كگرتووه‌كان و كۆمه‌ڵگه‌ی نێوده‌وڵه‌تی و كۆمكاری عه‌ره‌بی و عێراق بێنه ده‌نگ بۆ رێگرتن له به‌رده‌وامیی ئه‌و جۆره په‌لامارانه.
هه‌رێمی كوردستان ره‌تیشیكرده‌وه، هیچ بنكه و ناوه‌ندێكی ئیسرائیلی له هه‌ولێر هه‌بێت و ئه‌و بانگه‌شه‌یه‌ی سوپای پاسداران، وه‌ك پاساو بۆ په‌لاماره تیرۆریستییه‌كه‌ی به‌كاری ده‌هێنێت، ره‌تده‌كاته‌وه.