دابەشكردنی سەروەری، قۆناغی ئەوپەڕی فشار لەسەر هەرێمی كوردستان

مەشخەڵ كەوڵۆسی
وەك ڕەشبینی نا، بەڵام وەكو خوێندنەوەی بابەتی نیاز وئەقڵیەت و شێوازی مامەڵەی بەغدا لەگەڵ هەرێمی كوردستان، هەر چاودێرێكی بابەتی پێویستە سادەترین پرسیار لەخۆی بكات، دەستەڵاتێكی یاسایی كە بڕیارە مافی هەموو هاووڵاتییان بپارێزێت، ئامادە بێت لە پێناوی یەكلاییكردنەوەی كێشە سیاسییەكانیدا، لەپێناوی باڵبادانی بەرانبەرەكانیدا، مووچەی هاووڵاتیی خۆی ببڕێت و، ماوەی 12 ساڵی تەواو هاووڵاتیی وڵاتەكەی خۆی بچەوسێنێتەوە، ئایا هیچ گەرەنییەك هەیە بۆ ئەوەی دەست بۆ مەترسیدارترین كارت نەبات بۆ سەپاندنی خۆی؟ دەستەڵاتێك دوای نزیكەی 25 ساڵی تەواو ئامادەنەبێت بڕگەیەكی دەستوری جێبەجێ بكات كە هەر خۆیان پەسەندیان كردووەو، دەنگیان پێداوە، تەنها لەبەر ئەوەی ئەو مادە دەستورییە ماف دەگێڕێتەوە بۆ بەشێك لە هاووڵاتییەكانی خۆی كە ئەویش دۆخی تێكدراوی كەركووك و ناوچە داگیركراوەكانی تری كوردستانە، ئایا چۆن چاوەڕوانی خێری لێدەكرێت؟ چۆن لە پەنایدا هەست بەئارامی دەكرێت؟ چۆن دڵنیایت لەئایندەی پەیوەندی نێوان هەولێر و بەغدا لەكاتێكدا تەنانەت دەستوریش نەیتوانیوە ئەو مافەیان لێوەربگرێتەوە كە زەوتیان كردووەو، ئێستایشی لەسەر بێت زەوی و خاك و ئاوی كورد داگیردەكەن و، بەشێوازێكی ئاشكرا هەوڵی گۆڕینی دیموگرافیای كوردستان و، سەپاندنی واقیعی تەعریبكراوی كەركووك و ناوچە داگیركراوەكانی تریش دەدەن؟ هەر بەڕاستی، دەوڵەتێك بیر لە بڕینی مووچەی خەڵكی خۆی بكاتەوە، چۆن دەتوانی لەتەنیشتی دڵنیابیت؟.
مەبەستم لەو پێشەكییە ئەوەیە ڕاستەوخۆ بڵێم: قۆناغی ئایندە، قۆناغی ئەوپەڕی فشار دەبێت لەسەر هەرێمی كوردستان، بەڕادەیەك دەتوانم بڵێم: قۆناغی ئەوپەڕی فشار هیچ بەربەستێكی نابێت و، ئامانجیان لەو گوشارانە ئەوەیە هەرێمی كوردستان هەڵبوەشێتەوە، یان لە باشترین حاڵەتدا هەموو دەستەڵاتەكانی لێوەربگرنەوەو، تەنها وەكو جیهازێكی ئیداری بمێنێت و، سەرجەم بڕیارەكانی بەغدا جێبەجێ بكات و، بەتەواوی دایبماڵن لەهەموو ڕواڵەتێكی بڕیار و سەروەری.
هادی عامری لەدوایەمین وتاریدا ڕۆژی 28ی8ی2026 بەئاشكرا و بێ پەردە، مەرجەكانی خۆیانی بۆ ڕادەستكردنی چەك بەدەوڵەت ئاشكرا كرد و، تیایدا بەڕوونی و بێ پێچ و پەنا گوتی: سەروەری دابەشناكرێت و، پێویستە بست بە بستی خاكی عێراق لەژێر دەستەڵات وڕێنمایی بەغدا بێت و، سەرجەم دەروازە سنورییەكانیش لەژێر كۆنترۆڵی بەغدا بن.
ئەمەی وەكو یەكێك لەمەرجەكان بۆ ڕادەستكردنی چەكی میلیشیاكان بە حكومەتی عێراق ئاشكرا كرد، بەواتایەكی پێچەوانە، ئەگەر ئەو بابەتە جێبەجێ نەكرێت ئەوان چەك دانانێن، وەك ئەوەی سفركردنەوەی هەرێمی كوردستان ئەركی چەكەكەی ئەوان بێت.
ئەوەی عامری گوتی، زەنگی هەرەمەترسیدارە لەبەغداوە بۆ كوردستان، چونكە وەك دەڵێت: قسەیەكی هەقە لەپێناوی ئامانجێكی ناهەقدا، ئەویش هەمان لۆژیكە. لەڕاستیدا سەروەری دەوڵەت نابێ دابەشبكرێت، لێرەوە ئیدی ئەوان بەبیانوی دابەشنەكردنی سیادە، هەناوەكانیان بۆ هەڵوەشاندنەوەی هەرێمی كوردستان دەستپێدەكەن و، لەگوشاركردن بۆ ڕادەستكردنی چەكی پێشمەرگەوە دەستپێدەكەن.
قۆناغی فشاری ئەم چەمكە دەستورییە، نوێترین جۆری فشارە لەسەر كورد و، كوردی فەقیریش بێئاگا و بێباك دانیشتووە و، هەر گوێیشی پێنادات!.
عامری بەناوی دەوڵەتی قووڵی عێراقەوە كۆدێكی فڕێداوەتە ناو گۆڕەپانەكە و، ئەوەی جێگەی سەرسامییەكی گەورەیە، كورد كاردانەوەی نیە و، هیچ حسابێكی بۆ ئەو مەترسییە نەكرد كە ئەم پرسیارە دەیهێنێتە كایەوە: كاتێ هەبوونی هەرێمی كوردستان بە دابەشكردنی سەروەری عێراق لەقەڵەم بدرێت، ئایا هەوڵدان بۆ هەڵوەشاندنەوەی ئەو هەرێمە و یەكخستنەوەی سیادەی عێراق نابێتە تەحسیل حاسل؟ وەڵامم دەوێت لە لایەنی پەیوەندیداری كورد.