دەشتی ئیسماعیل – هەولێر
ئەمڕۆ دووشەممە، نێچیرڤان بارزانی، سەرۆکی هەرێمی کوردستان بە سەردانێکی فەرمی گەیشتە شاری دەوحەی پایتەختی دەوڵەتی قەتەر. ئەم سەردانەی سەرۆکی هەرێم بەمەبەستی دەربڕینی هاوخەمی و بەشداریکردنە لە ڕێوڕەسمی سەرەخۆشیی کۆچی دوایی شێخ حەمەد بن خەلیفە ئال سانی.
بەپێی زانیارییەکانی ئاژانسی فەرمیی قەتەر، لە کاتی گەیشتنی بۆ فڕۆکەخانەی دەوحە، نێچیرڤان بارزانی بە گەرمی لەلایەن شێخ محەمەد بن عەبدوڵا بن محەمەد ئال سانی، وەزیری گواستنەوەی قەتەر پێشوازیی لێکرا. هاوکات محەمەد جەعفەر سەدر، باڵیۆزی کۆماری عێراق لە قەتەر، لە تیمی پێشوازیکردنی سەرۆکی هەرێمی کوردستاندا بوو.
کۆچی دوایی شێخ حەمەد بن خەلیفە ئال سانی (باوکی شێخ تەمیم بن حەمەد ئال سانی، میری ئێستای قەتەر) کە دوێنێ یەکشەممە ڕوویدا، هۆکاری سەرەکیی ئەم سەردانە خێرایەی سەرۆکی هەرێمی کوردستانە بۆ دەوحە، تاوەکو لە نزیکەوە هاوسۆزی و سەرەخۆشیی هەرێمی کوردستان بگەیەنێتە خێزانی فەرمانڕەوای ئەو وڵاتە.