قەرەنی قادری، نووسەر، ڕۆژنامەنووس و چاودێرێکی سیاسیی دیاری کورد بوو، کە تەمەنی خۆی لە خزمەتکردن بە دۆزی ڕەوای گەلەکەی و برەودان بە بیری سیاسی و ڕۆشنبیری بەسەربرد. ئەو وەک نوێنەری نەوەیەک لە ڕۆشنبیرانی خاوەن هەڵوێست، هەمیشە بە ڕوانگە وردبینەکانی و زمانە پاراوەکەی دەناسرایەوە.
قەرەنی قادری وەک شیکەرەوەیەکی سیاسیی لێهاتوو، خاوەنی تێڕوانینێکی قووڵ بوو بۆ هاوکێشە سیاسییەکانی ڕۆژهەڵاتی کوردستان، ئێراق و پەیوەندییە نێودەوڵەتییەکان. وتار و لێکۆڵینەوەکانی لە زۆربەی دەزگا میدیاییە باوەڕپێکراوەکان وەک (تۆڕی میدیایی ڕووداو)، (پێنووس) و (ڕۆژنامەی هەولێر) بڵاودەکرانەوە. ئەو زمانزان و لێکۆڵەرێکی هێمن بوو کە بە لۆژیک و بەڵگەوە دەینووسی، ئەمەش وایکردبوو ببێتە سەرچاوەیەکی جێی متمانە بۆ خوێنەران و ناوەندە سیاسییەکان.
سەرباری ئەوەی لە بنەماڵەیەکی ناسراو و ڕەسەنی ڕۆژهەڵاتی کوردستان بوو، بەڵام هەمیشە بە “مرۆڤە خاکەڕاکە” دەناسرایەوە. قەرەنی قادری نموونەی عیزەتە نەفس و بەرزەفڕی بوو؛ کەسایەتییەکی پۆڵایین لەسەر مافە نەتەوەییەکان و مرۆڤێکی نەرمونیان لە ئاکار و هەڵسوکەوتدا. تەنانەت لە دوایین مانگەکانی ژیانیدا، سەرباری تێکچوونی باری تەندروستی، دەستی لە پێنوس و کتێب هەڵنەگرت و بە شکۆوە خەریکی چاپکردنی دوایین بەرهەمی بوو، بەبێ ئەوەی ڕێگە بدات بارودۆخەکەی ببێتە مۆدێلێک بۆ داوای هاوکاری، چونکە مرۆڤێکی چاوتێر و خاوەن شکۆ بوو.
لە ڕێکەوتی ١٩ی نیسانی ٢٠٢٦، دوای ململانێیەکی سەخت لەگەڵ نەخۆشی، ئەم قەڵەمە بوێرە لە شاری هەولێر دڵە گەورەکەی لە لێدان کەوت و ماڵئاوایی لە نیشتمان کرد. کۆچی ئەو نەک تەنها بۆ بنەماڵەکەی، بەڵکو بۆ ناوەندی ڕۆژنامەوانی و سیاسیی کوردی خەسارەتێکی گەورە بوو.
ڕۆژنامەی هەولێر
٢١/ ٤/ ٢٠٢٦